Katapos ni Josue manguna ha katawohan ni Jehova ha sulod hin damu ka tuig, namatay hiya han 110 anyos hiya. Han buhi pa hiya, nagsisingba an mga Israelita kan Jehova. Pero kamatay niya, nagsingba hira ha mga dios-dios pariho han mga taga-Canaan. Tungod kay waray na hira magsunod kan Jehova, gintugotan niya nga pakurian hira han usa nga hadi han Canaan nga hi Jabin. Nakimalooy hira kan Jehova nga buligan hira. Salit gintagan hira ni Jehova hin bag-o nga lider, hi Barak. Bubuligan hira ni Barak nga bumalik kan Jehova.

Iginpatawag ni propetisa Debora hi Barak. May isusumat hiya nga mensahe tikang kan Jehova: ‘Pag-upod hin 10,000 nga kasundalohan ngan pakig-away ha kasundalohan ni Jabin ha salog han Kison. Didto, mapipirde mo hi Sisera, an kumander han kasundalohan ni Jabin.’ Hi Barak nagsiring kan Debora: ‘Makadto la ako kon maupod ka ha akon.’ Hi Debora nagsiring: ‘Maupod ako. Pero hibaroi nga diri ikaw an mapatay kan Sisera. Nagsiring hi Jehova nga papatayon hiya hin babaye.’

Hi Debora umupod kan Barak ngan ha iya kasundalohan ngadto ha Bukid Tabor basi mangandam ha pakig-away. Han hinbaroan ito ni Sisera, gintirok dayon niya ha walog an iya mga karuwahe ha pakig-away  ngan kasundalohan. Hi Debora nagsiring kan Barak: ‘Hini nga adlaw, ihahatag ni Jehova ha imo an kadaogan.’ Hi Barak ngan an iya 10,000 nga kasundalohan linusad ha bukid basi makig-away ha makusog nga pwersa-militar ni Sisera.

Katapos ginpahinabo ni Jehova nga humitaas an tubig ha salog han Kison. An mga karuwahe ni Sisera nahilubong ha lapok. Ginbayaan ni Sisera an iya karuwahe ngan dinalagan. Napirde ni Barak ngan han iya kasundalohan an kasundalohan ni Sisera, pero nakapalagiw hi Sisera! Nagtago hiya ha tolda han babaye nga hi Jael. Ginpainom hiya ni Jael hin gatas ngan gintaklapan. Nahingaturog inin kapoy nga girriro. Tapos, hinay-hinay nga kumadto hi Jael ha iya nga may dara nga usok hin tolda ngan iginpukpok ito ha iya ulo, salit namatay hiya.

Umabot hi Barak nga nagpipinamiling kan Sisera. Ginawas hi Jael ha iya tolda ngan nagsiring: ‘Tara, sulod. Adi an lalaki nga imo ginbibiling.’ Sumulod hi Barak ngan nakita niya an patay nga hi Sisera. Gindayaw nira Barak ngan Debora hi Jehova pinaagi hin kanta tungod han kadaogan nga iginhatag ha mga Israelita. Ha sumunod nga 40 ka tuig, nagkaada kamurayawan ha Israel.