Han gindara ni Nabukodonosor ha Babilonya an mga prinsipe han Juda, iya ginsugo hi Aspenas nga opisyal ha palasyo nga panginanoon hira. Iya ginsidngan hi Aspenas nga pilion an pinakamahimsog ngan pinakabaltok nga mga batan-on nga kalalakin-an. Babansayon hira ha sulod hin tulo ka tuig. Mabulig ito basi maiandam hira para ha hitaas nga posisyon ha Babilonya. Kinahanglan mahibaro hira pagbasa, pagsurat, ngan pagyakan han Akkadiano nga yinaknan han Babilonya. An ira liwat kakaunon pariho han ginkakaon han hadi ngan han iya mga opisyal. Upod ha napili nga mga batan-on hira Daniel, Hanania, Misael, ngan Asaria. Gintagan hira ni Aspenas hin mga ngaran nga kanan Babilonya: Beltesasar, Sadrak, Mesak,  ngan Abednego. Ini ba nga pagbansay makakapaundang ha ira ha pag-alagad kan Jehova?

Inin upat nga batan-on determinado nga sumugot kan Jehova. Maaram hira nga diri hira puydi kumaon han mga pagkaon han hadi kay nasiring an Balaud ni Jehova nga mahugaw an iba hito. Salit nagsiring hira kan Aspenas: ‘Alayon, ayaw kami pakaona han pagkaon han hadi.’ Hi Aspenas nagsiring: ‘Kon diri kamo kumaon ngan makita han hadi nga baga hin maluyahon kamo, papatayon niya ako!’

May nahunahuna hi Daniel. Nagsiring hiya ha tinaporan: ‘Alayon tagi la kami hin utan ngan tubig ha sulod hin napulo ka adlaw. Katapos, itanding kami ha mga batan-on nga nakaon han pagkaon han hadi.’ Tumugot an tinaporan.

Katapos han napulo ka adlaw, mas mahimsog pagkit-on hi Daniel ngan an iya tulo nga kasangkayan kay ha iba nga batan-on. Nalipay hi Jehova nga sumugot hira ha iya. Gintagan pa ngani niya hi Daniel hin kinaadman nga makasabot han mga bisyon ngan mga inop.

Han natapos na an pagbansay, gindara ni Aspenas an mga batan-on kan Nabukodonosor. Nakiistorya ha ira an hadi ngan nakita niya nga hira Daniel, Hanania, Misael, ngan Asaria mas baltok ngan alerto kay ha iba nga batan-on. Iya ginpili hira nga magtrabaho ha palasyo. An hadi agsob magpasagdon ha ira mahitungod ha importante nga mga butang. Ginhimo hira ni Jehova nga mas maaramon kay ha ngatanan nga kanan hadi mag-aramon nga kalalakin-an ngan madyikero.

Bisan kon nakadto hira Daniel, Hanania, Misael, ngan Asaria ha iba nga nasud, waray nira kalimti nga katawohan hira ni Jehova. Pirme mo ba liwat hinunumdoman hi Jehova, bisan kon diri mo kaupod an imo mga kag-anak?