Galacia 6:1-18
6 Mga kabugtoan, kon an usa nga tawo makahimo hin sayop nga pitad antes niya masantop ito, kamo nga may espirituwal nga mga kwalipikasyon mangalimbasog nga tadungon utro an sugad nga tawo pinaagi han espiritu han pagkamalumo. Pero bantayi hin maopay an imo kalugaringon, kay bangin masulay ka liwat.
2 Padayon nga magbinuligay kamo ha pagdara han iyo mga pinas-an, ngan hini nga paagi matutuman niyo an balaud han Kristo.
3 Kay bisan hin-o nga naghuhunahuna nga importante hiya pero diri ngay-an, ginlilimbongan niya an iya kalugaringon.
4 Lugod, usisahon han kada tagsa an iya mga buhat, ngan magkakaada hiya hinungdan nga malipay ha iya la kalugaringon, ngan diri igintatanding an iya kalugaringon ha iba nga tawo.
5 Kay an kada tagsa magdadara han iya kalugaringon nga pinas-an.
6 Dugang pa, an bisan hin-o nga gintututdoan han pulong han Dios sadang maghatag han ngatanan nga mag-opay nga butang ha nagtututdo ha iya.
7 Ayaw kamo palimbong: An Dios diri angay tamayon. Kay anoman an iginsasabwag han usa nga tawo, ito liwat an iya aanihon;
8 kay hiya nga nagsasabwag uyon ha iya makasasala nga lawas mag-aani hin kadunot tungod han iya makasasala nga lawas, kondi hiya nga nagsasabwag uyon ha espiritu han Dios mag-aani hin kinabuhi nga waray kataposan tikang ha espiritu han Dios.
9 Salit ayaw kita pag-undang ha pagbuhat han maopay, kay pag-abot han panahon mag-aani kita kon diri kita manluya.*
10 Salit samtang may higayon* kita, buhaton naton an maopay ha ngatanan, pero labi na gud ha mga kapariho naton hin pagtoo.
11 Kitaa niyo kon mationan-o kadagku an mga letra han akon surat ha iyo nga ako mismo an nagsurat.
12 An ngatanan nga nagpapakita hin maopay nga impresyon uyon ha mga suruklan han tawo* amo an nagpipirit ha iyo nga magpaturi, pero ginbubuhat nira ito basi diri hira pagtimarauton tungod han pasakitan nga kahoy* ni Kristo Jesus.
13 Kay bisan an mga nagpapaturi diri nagtutuman han Balaud, pero karuyag nira nga magpaturi kamo basi may hinungdan hira ha paghambog mahitungod ha iyo.*
14 Pero diri ko gud karuyag maghambog labot la han pasakitan nga kahoy han aton Ginoo nga hi Jesu-Kristo. Ha akon paghunahuna, an kalibotan iginraysang ha kahoy pinaagi ha iya, ngan ha paghunahuna han kalibotan iginraysang ako ha kahoy.
15 Kay an importante, diri an pagin turi o diri-turi, kondi an pagin bag-o nga hinimo han Dios.
16 Ngan hinaot an ngatanan nga magkikinabuhi ha husto nga paagi uyon hini nga surundon ha panggawi magkaada kamurayawan ngan kalooy, oo, an Israel han Dios.
17 Tikang yana, waray bisan hin-o nga magsinamok ha akon, kay aadi ha akon lawas an mga marka nga nagpapakilala nga uripon ako ni Jesus.
18 Mga kabugtoan, makarawat unta niyo an diri-matupngan nga pagkabuotan han aton Ginoo nga hi Jesu-Kristo samtang nagpapakita kamo hin maopay nga disposisyon. Amen.
Mga footnote
^ O “umundang.”
^ Ha literal, “itinanda nga panahon.”
^ Ha literal, “uyon ha unod.”
^ Kitaa an Apendise 6.
^ Ha literal, “ha iyo unod.”
