Galacia 5:1-26
5 Gintagan kita hin kagawasan han Kristo basi mapahimulosan naton ito nga kagawasan. Salit magmarig-on kamo ngan ayaw na kamo pagpasakop utro ha yugo han pagkauripon.
2 Pamati kamo! Ako, hi Pablo, nagsusumat ha iyo nga kon magpaturi kamo, magigin waray pulos an Kristo ha iyo.
3 Dugang pa, ginpapamatud-an ko utro ha tagsa nga tawo nga nagpapaturi nga obligado hiya nga tumanon an bug-os nga Balaud.
4 Nahibubulag kamo ha Kristo, bisan hin-o pa kamo, kon nangangalimbasog kamo nga maipahayag nga matadong pinaagi han balaud; nabaya kamo ha iya diri-matupngan nga pagkabuotan.
5 Ha aton bahin, pinaagi han espiritu ginpapamulat gud naton an ginlalaoman nga pagkamatadong nga resulta han pagtoo.
6 Para ha mga kahiusa ni Kristo Jesus, diri importante an pagturi o diri-pagturi kondi an nahihimo han pagtoo tungod han gugma.
7 Nadalagan kamo hin maopay hadto. Hin-o an nag-ulang ha iyo ha padayon nga pagsugot ha kamatuoran?
8 Ini nga klase han pangatadongan diri tikang ha Dios nga nagpili ha iyo.
9 An gutiay nga libadura nakakapatubo han bug-os nga minasa.
10 Nasarig ako nga kamo nga kahiusa han Ginoo diri maghuhunahuna hin iba. Pero an bisan hin-o nga nagsasamok ha iyo makarawat han paghukom nga angay ha iya.
11 Mahitungod ha akon, mga kabugtoan, kon iginsasangyaw ko pa gihapon an pagturi, kay ano nga gintitimaraot pa ako? Kon iginsasangyaw ko pa ito, kon sugad an pasakitan nga kahoy* diri na hiparakdolan.*
12 Karuyag ko unta nga an mga lalaki nga nagsisinamok ha iyo magpakapon na la.*
13 Mga kabugtoan, gintawag kamo basi magkaada kagawasan. Pero ayaw niyo gamita ini nga kagawasan sugad nga higayon ha pagbuhat han makasasala nga mga hingyap, lugod pinaagi han gugma magpauripon kamo ha usa kag usa.
14 Kay an bug-os nga Balaud ginsumaryo* ha usa nga sugo: “Higugmaa an imo igkasi-tawo sugad ha imo kalugaringon.”
15 Pero kon padayon nga nagkakagatay ngan naglalamoyay kamo, pag-ikmat nga diri kamo magparaptayay.
16 Kondi ginsisidngan ko kamo, Magpadayon kamo ha pagkinabuhi uyon ha espiritu ngan diri gud kamo magbubuhat uyon ha makasasala nga hingyap.
17 Kay an hingyap han lawas nakontra ha espiritu, ngan an espiritu nakontra ha hingyap han lawas. Tungod kay magkakontra ito, diri niyo nabubuhat an mga butang nga karuyag niyo buhaton.
18 Dugang pa, kon ginigiyahan kamo han espiritu, diri kamo sakop han balaud.
19 An mga buhat han makasasala nga lawas masayon makita, ngan ito nga mga buhat amo an imoralidad,* kahugaw, mangil-ad nga paggawi,*
20 idolatriya, espiritismo,* pagkontrahay, araway, pangabugho, mga kasina, diri-pagkauruyon, pagkabahin-bahin, pagporma hin mga sekta,
21 kaawa, paghubog, karisyohan nga waray-kontrol, ngan iba pa nga buhat nga sugad hini. Mahitungod hini ginpapahamangnoan ko kamo, pariho han iginpahamangno ko na ha iyo, nga an mga nagbubuhat hini diri makakapanunod han Ginhadian han Dios.
22 Ha luyo nga bahin, an bunga han espiritu amo an gugma, kalipay, kamurayawan, hilawig nga pagpailob, pagkabuotan, pagkamaopay, pagtoo,
23 pagkamalumo, ngan pagpugong ha kalugaringon. Waray balaud nga nakontra ha pagbuhat hini.
24 Dugang pa, iginraysang ha kahoy han mga sumurunod ni Kristo Jesus an makasasala nga lawas upod na an malaw-ay nga mga hingyap ngan mga tinguha hito.
25 Kon nagkikinabuhi kita uyon ha paggiya han espiritu, padayon nga maglakat liwat kita ha husto nga paagi uyon ha paggiya han espiritu.
26 Diri kita magpaimportante ha kalugaringon, diri makigkompetensya, ngan diri maggiawa-awa.
Mga footnote
^ Kitaa an Apendise 6.
^ Kitaa an “Kahipakdol” ha Glossary.
^ O “magin mga yunuko,” salit diri na kwalipikado ha pagbuhat han balaud mismo nga ira iginpapatuman.
^ Ha literal, “natuman.”
^ Kitaa an footnote ha Mat 5:32.
^ Kitaa an “Mangil-ad nga paggawi” ha Glossary.
^ Kitaa an “Espiritismo” ha Glossary.
