Galacia 4:1-31
4 Yana susumatan ko kamo nga samtang bata pa an manurunod, waray hiya kaibahan ha uripon bisan kon ginoo hiya han ngatanan nga butang,
2 kay sakop pa hiya han mga magmarangno ngan mga tinaporan tubtob ha adlaw nga itinanda han iya amay.
3 Ha pariho nga paagi, han mga bata pa kita, uripon liwat kita han basihan nga mga prinsipyo han kalibotan.
4 Pero pag-abot han kataposan han itinanda nga panahon, ginsugo han Dios an iya Anak, nga igin-anak han usa nga babaye ngan sakop han balaud,
5 basi mapagawas niya an mga sakop han balaud pinaagi ha pagpalit ha ira, nga tungod hito magigin ampon kita han Dios.
6 Tungod kay mga anak kamo, ginsugo han Dios an espiritu han iya Anak ngadi ha aton kasingkasing ngan nasinggit ito: “Abba, Amay!”
7 Salit diri ka na uripon kondi anak; ngan kon anak ka, kon sugad ginhimo ka liwat han Dios nga manurunod.
8 Pero han diri pa niyo kilala an Dios, mga uripon kamo han diri totoo nga mga dios.
9 Kondi yana nga kilala na niyo an Dios, o yana nga kinikilala na kamo han Dios, kay ano nga nabalik kamo ha maluya ngan waray pulos nga basihan nga mga prinsipyo han kalibotan ngan nagpapauripon na liwat hito?
10 Gintatagan niyo hin espesyal nga pagtagad an mga adlaw, mga bulan, mga panahon, ngan mga tuig.
11 Nahahadlok ako para ha iyo, kay bangin nakarag la an akon pangalimbasog para ha iyo.
12 Mga kabugtoan, nakikimalooy ako ha iyo, Magsubad kamo ha akon, kay hadto pariho ako ha iyo. Waray kamo makasayop ha akon.
13 Pero maaram kamo nga tungod han akon sakit ha lawas nagkaada ako siyahan nga higayon nga magpahayag han maopay nga sumat ha iyo.
14 Ngan bisan kon an kahimtang han akon lawas nagin pagsari ha iyo, waray niyo ako tamaya o tuprahi tungod ha kasina; lugod ginkarawat niyo ako sugad hin anghel han Dios, o sugad kan Kristo Jesus.
15 Kon sugad, hain na an kalipay niyo hadto? Kay sigurado ako nga kon mahihimo la, lulukaton niyo an iyo mga mata ngan ihahatag ha akon.
16 Pero yana, kaaway na ba niyo ako kay ginsusumatan ko kamo han kamatuoran?
17 Nangangalimbasog gud hira nga makabig kamo, diri tungod ha maopay nga katuyoan, kondi karuyag nira nga ipahirayo kamo ha akon, basi maruyag gud kamo pagsunod ha ira.
18 Pero maopay nga may nangangalimbasog pirme ha pagkabig ha iyo, kon para ito ha maopay nga katuyoan, ngan diri la kon kaupod niyo ako,
19 hinigugma ko nga mga anak, kay tungod ha iyo sugad hin nakakaeksperyensya na liwat ako hin kasakit ha panganak, tubtob nga maipakita niyo an personalidad han Kristo.
20 Hingyap ko nga makaupod kamo yana ngan makaistorya kamo ha iba nga paagi, kay diri ako maaram kon ano an akon bubuhaton ha iyo.
21 Sumati ako, kamo nga karuyag magpasakop ha balaud, Namamati gud ba kamo ha Balaud?
22 Pananglitan, iginsurat nga hi Abraham may duha nga anak nga lalaki, an usa tikang ha surugoon nga babaye ngan an usa tikang ha may kagawasan nga babaye;
23 kondi an tikang ha surugoon nga babaye igin-anak ha normal nga paagi, pero an tikang ha may kagawasan nga babaye igin-anak pinaagi hin saad.
24 May simboliko nga kahulogan ini; kay ito nga kababayin-an nangangahulogan hin duha nga kasabotan, an usa tikang ha Bukid Sinai, nga nagkaada mga anak ha pagkauripon, ngan hiya hi Hagar.
25 An Hagar nangangahulogan hin Sinai, usa nga bukid ha Arabia, ngan nagsisimbolo hiya han Jerusalem yana, kay uripon hiya ngan an iya mga anak.
26 Pero an langitnon nga Jerusalem may kagawasan, ngan hiya an aton iroy.
27 Kay an Kasuratan nasiring: “Malipay ka, baog nga babaye nga diri nanganganak; guliat tungod ha kalipay, ikaw nga babaye nga waray mga kasakit ha panganak; kay mas damu an anak han babaye nga ginbayaan kay ha babaye nga may bana.”
28 Yana mga kabugtoan, mga anak kita pinaagi han saad pariho kan Isaac.
29 Pero sugad la nga hadto an igin-anak pinaagi han espiritu gintimaraot han igin-anak pinaagi han unod, sugad liwat hito an nahitatabo yana.
30 Kondi ano an siring han Kasuratan? “Paiwasa an surugoon nga babaye ngan an iya anak, kay an anak han surugoon nga babaye diri gud magigin manurunod pariho han anak han may kagawasan nga babaye.”
31 Kon sugad, mga kabugtoan, diri kita mga anak han surugoon nga babaye, kondi han may kagawasan nga babaye.
