Galacia 3:1-29
3 O waray sarabotan nga mga taga-Galacia, hin-o an nag-impluwensya ha iyo hin maraot, bisan kon dayag nga iginhulagway ha iyo hi Jesu-Kristo nga iginraysang ha kahoy?
2 Ini an karuyag ko igpakiana ha iyo: Nakarawat ba niyo an espiritu pinaagi han pagsunod ha balaud o tungod ha pagtoo ha iyo hinbatian?
3 Waray gud ba kamo sarabotan? Katapos niyo tikangan an paglakat uyon ha baraan nga espiritu, tatapuson ba niyo ito ha unudnon nga paagi?
4 Nakaeksperyensya ba kamo hin damu gud nga pag-antos nga waray la pulos? Sigurado ako nga diri kay waray ito kapulsanan.
5 Kon sugad, hiya nga naghahatag ha iyo han espiritu ngan nagbubuhat hin gamhanan nga mga buhat* ha butnga niyo, ginbubuhat ba niya ito tungod han iyo pagsunod ha balaud o tungod han pagtoo ha iyo hinbatian?
6 Sugad la kan Abraham nga “nagpakita hin pagtoo kan Jehova, tungod hito iginpahayag hiya nga matadong.”
7 Sigurado nga maaram kamo nga an mga may pagtoo amo an mga anak ni Abraham.
8 Han nakita nga daan han Kasuratan nga ipapahayag nga matadong han Dios an mga tawo han mga nasud tungod han ira pagtoo, abanse nga iginpahayag hito an maopay nga sumat kan Abraham: “Pinaagi ha imo an ngatanan nga nasud bibendisyonan.”
9 Salit an mga may pagtoo ginbibendisyonan upod han matinumanon nga hi Abraham.
10 An ngatanan nga nasarig ha ira mga buhat basi masunod an balaud maghihikaraot, kay ini an iginsurat: “Maghihikaraot an bisan hin-o nga diri nasunod ngan diri nagbubuhat han ngatanan nga iginsurat ha linukot nga basahon han Balaud.”
11 Dugang pa, klaro nga waray iginpapahayag nga matadong ha atubangan han Dios pinaagi han balaud kay “an matadong mabubuhi tungod han pagtoo.”
12 An Balaud diri nadepende ha pagtoo. Lugod, nasiring ito, “hiya nga nagbubuhat hito mabubuhi pinaagi hito.”
13 Ginpalit kita han Kristo, salit nakagawas kita ha panhimaraot han Balaud kay hiya an ginpanhimaraot imbes nga kita, tungod kay ini an iginsurat: “Ginpanhimaraot an tagsa nga tawo nga ginbitay ha kahoy.”
14 Nahitabo ito basi an bendisyon kan Abraham makaabot ha mga nasud pinaagi kan Jesu-Kristo, ngan basi makarawat naton an iginsaad nga espiritu pinaagi han aton pagtoo.
15 Mga kabugtoan, nagyayakan ako pinaagi hin ilustrasyon: Kon an ginhimo nga kasabotan ginparig-on na—bisan kon pinaagi la hin tawo—waray bisan hin-o nga puydi magbalewaray o magdugang hito.
16 Iginpahayag kan Abraham ngan ha iya binhi an mga saad. Diri ito nasiring: “Ngan ha mga binhi,” nga nagtutudlok ha damu, kondi nagtutudlok ha usa la: “Ngan ha imo binhi,” nga amo an Kristo.
17 Nasiring liwat ako: An Balaud nga iginhatag paglabay hin 430 ka tuig, diri nagbabalewaray han kasabotan nga ginhimo han Dios antes pa hito, ngan diri nakakawara han saad.
18 Kay kon an panurundon nadepende ha balaud, diri na ito nadepende ha saad; pero kinaburut-on nga iginhatag ito han Dios kan Abraham pinaagi hin saad.
19 Kon sugad, kay ano nga iginhatag an Balaud? Igindugang ito basi maipahayag an mga pagtalapas, tubtob nga umabot an binhi nga makarawat han saad; ngan an balaud iginhatag ha mga anghel ngan iginpahayag ito pinaagi hin tagapamutnga.*
20 Diri nagkikinahanglan hin tagapamutnga kon usa la nga tawo an nahidadabi, pero an Dios uusa la.
21 Kon sugad, nakontra ba an Balaud ha mga saad han Dios? Diri! Kay kon an usa nga balaud nga nakarawat makakahatag hin kinabuhi, kon sugad an pagkamatadong nadepende ha balaud.
22 Kondi an ngatanan nga butang igintubyan han Kasuratan ha pagkabihag ha sala, basi an saad nga resulta han pagtoo kan Jesu-Kristo makarawat han mga nagpapakita hin pagtoo.
23 Pero antes umabot an pagtoo, ginpanalipdan kita han balaud, igintubyan ha pagkabihag, ngan naghinulat han pagpahayag han pagtoo.
24 Salit an Balaud nagin parapanalipod* naton nga naggiya ngadto ha Kristo, basi maipahayag kita nga matadong tungod han pagtoo.
25 Kondi yana nga inabot na an pagtoo, diri na kita sakop han parapanalipod.
26 Ha pagkamatuod, kamo ngatanan mga anak han Dios pinaagi han iyo pagtoo kan Kristo Jesus.
27 Kay kamo ngatanan nga ginbawtismohan basi magin kahiusa han Kristo nagigin pariho han Kristo.
28 Waray Judio o Griego, waray uripon o may kagawasan nga tawo, waray liwat lalaki o babaye; kay kamo ngatanan nagkakaurosa kan Kristo Jesus.
29 Dugang pa, kon kamo kan Kristo, binhi* gud kamo ni Abraham, mga manurunod uyon han saad.
Mga footnote
^ O “milagro.”
^ Kitaa an “Tagapamutnga” ha Glossary.
^ O “paragtutdo.”
^ O “tulin; mga anak.”
