Galacia 1:1-24
1 Tikang kan Pablo, apostol nga ginpili, diri pinaagi han mga tawo o hin usa nga tawo, kondi ginpili ni Jesu-Kristo ngan han Dios nga Amay nga nagbanhaw ha iya,
2 ngan tikang liwat ha ngatanan nga kabugtoan nga kaupod ko, para ha mga kongregasyon ha Galacia:
3 Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan tikang ha Ginoo nga hi Jesu-Kristo.
4 Iginhatag niya an iya kalugaringon tungod han aton mga sala basi talwason kita tikang ha maraot nga sistema yana uyon ha kaburut-on han aton Dios ngan Amay.
5 Paghimayaon unta an Dios ha kadayonan. Amen.
6 Nahipapausa ako nga kadagmit niyo tumalikod ha Iya nga nagtawag ha iyo pinaagi han diri-matupngan nga pagkabuotan han Kristo tungod ha iba nga klase hin maopay nga sumat.
7 Pero waray na iba;* may-ada la mga tawo nga nagsasamok ha iyo ngan naruruyag pagbaliko han maopay nga sumat mahitungod han Kristo.
8 Pero bisan kon usa ha amon o usa nga anghel tikang ha langit an magpahayag ha iyo hin maopay nga sumat nga iba han amon iginpahayag ha iyo nga maopay nga sumat, angay hiya hukman.
9 Sugad han amon ginsiring na, uutruhon ko na liwat pagsiring yana, An bisan hin-o nga nagpapahayag ha iyo han maopay nga sumat nga iba han iyo ginkarawat, angay hiya hukman.
10 An mga tawo gud ba an karuyag ko kombinsihon o an Dios? O an mga tawo ba an karuyag ko lipayon? Kon an mga tawo pa gihapon an akon ginlilipay, diri ako magigin uripon han Kristo.
11 Kay karuyag ko nga hibaroan niyo, mga kabugtoan, nga an maopay nga sumat nga akon iginpahayag ha iyo diri tikang ha mga tawo,
12 kay waray ko ito makarawat tikang ha mga tawo ngan waray ito igtutdo ha akon, kondi iginpahayag ito ha akon ni Jesu-Kristo.
13 Sigurado nga nakabati kamo mahitungod han akon panggawi hadto han membro pa ako han Judaismo, nga gintitimaraot ko gud an kongregasyon han Dios ngan nangangalimbasog pagbungkag hito,
14 ngan mas nag-uswag ako ha Judaismo kay ha damu nga akon kaedad ha amon nasud, kay mas matinumanon gud ako ha mga tradisyon han akon kaapoy-apoyan.
15 Kondi han an Dios, nga nagpagawas ha akon tikang ha tiyan han akon nanay ngan nagtawag ha akon tungod han iya diri-matupngan nga pagkabuotan, nalipay
16 nga igpahayag an iya Anak pinaagi ha akon, basi igpahayag ko ha mga nasud an maopay nga sumat mahitungod ha iya, waray ako komunsulta ha bisan hin-o nga tawo.*
17 Waray liwat ako kumadto ha Jerusalem ha mga apostol nga nahiuna ha akon, lugod kinadto ako ha Arabia, katapos binalik ako ha Damasco.
18 Paglabay hin tulo ka tuig, kinadto ako ha Jerusalem basi bisitahon hi Cefas, ngan inukoy ako ha iya hin 15 ka adlaw.
19 Pero waray ko igkita an iba nga apostol, labot la kan Santiago nga bugto han Ginoo.
20 Yana mahitungod han mga butang nga akon iginsusurat ha iyo, ginsisiguro ko ha iyo ha atubangan han Dios nga diri ako nagbubuwa.
21 Katapos, kinadto ako ha mga rehiyon han Sirya ngan Cilicia.
22 Pero diri ako kilala han mga kongregasyon ha Judea nga kahiusa han Kristo.
23 Hinbatian la nira ha iba: “An lalaki nga nagtimaraot hadto ha aton nagpapahayag na yana han maopay nga sumat mahitungod han pagtoo nga iya hadto ginpangalimbasogan nga bungkagon.”
24 Salit gindayaw nira an Dios tungod ha akon.
Mga footnote
^ Karuyag sidngon, waray na iba nga maopay nga sumat.
^ Ha literal, “ha unod ngan dugo.”
