Efeso 6:1-24
6 Mga anak, magmasinugtanon kamo ha iyo mga kag-anak kahiusa han Ginoo, kay matadong ini.
2 “Pasidunggi an imo tatay ngan an imo nanay,” kay ini an siyahan nga sugo nga may saad:
3 “Basi maghingaopay ka ngan maghilawig an imo kinabuhi ha tuna.”
4 Ngan mga amay, ayaw niyo pag-aringita an iyo mga anak, lugod atamana hira uyon ha disiplina ngan sagdon* ni Jehova.
5 Kamo nga mga uripon, magmasinugtanon kamo ha iyo tawhanon nga mga agaron, nga may respeto, kahadlok, ngan pagkasinsero ha iyo kasingkasing, sugad han iyo pagsugot ha Kristo,
6 diri kon may-ada la nakakakita basi lipayon an mga tawo, kondi sugad nga mga uripon han Kristo, nga bug-os-kalag nga nagbubuhat han kaburut-on han Dios.
7 Kinaburut-on nga magpauripon kamo, sugad hin ngadto kan Jehova ngan diri ha mga tawo,
8 kay maaram kamo nga bisan ano nga maopay nga ginbubuhat han kada tagsa, babalosan hiya ni Jehova, uripon man hiya o diri.
9 Kamo liwat nga mga agaron, tratara niyo hira hin maopay, nga diri nananarhog, kay maaram kamo nga an ira ngan an iyo Agaron aadto ha langit, ngan waray hiya ginpapaurog.
10 Ha kataposan, magpadayon kamo pagkuha hin gahum tikang ha Ginoo ngan ha iya gamhanan nga kusog.
11 Isul-ot niyo an kompleto nga armas tikang ha Dios, basi kamo makatindog hin marig-on kontra ha tuso nga mga buhat* han Yawa;
12 kay nakikig-away* kita, diri kontra ha dugo ngan unod, kondi kontra ha mga gobyerno, kontra ha mga awtoridad, kontra ha mga magmarando hinin masirom nga kalibotan, kontra ha magraot nga espiritu ha langitnon nga mga lugar.
13 Tungod hini, isul-ot niyo an kompleto nga armas tikang ha Dios, basi pag-abot han maraot nga adlaw makaato kamo ngan makatindog hin marig-on katapos niyo tumanon an ngatanan.
14 Salit tindog kamo hin marig-on nga may paha han kamatuoran ha iyo hawak, may kutamaya han katadongan,
15 ngan an iyo mga tiil may sandalyas han pagin andam ha pagpasamwak han maopay nga sumat mahitungod han kamurayawan.
16 Ha ngatanan nga kahimtang, gamita an daku nga taming han pagtoo nga ipaparong niyo ha ngatanan nga naglalaga nga pana han usa nga maraot.*
17 Karawata liwat an helmet han katalwasan, ngan an espada han espiritu, nga amo an pulong han Dios,
18 samtang ha tagsa nga higayon magpadayon kamo ha ngatanan nga klase han pag-ampo ngan pangamuyo uyon ha espiritu. Ngan tungod hini padayon kamo nga magmata ngan mangamuyo para ha ngatanan nga baraan,
19 ngan para liwat ha akon, basi pagbuka ko han akon baba makayakan ako nga may kagawasan, ha pagpahibaro han sagrado nga tinago han maopay nga sumat,
20 nga tungod hito nagbubuhat ako sugad nga embahador nga nakakadena, basi waray kahadlok nga makayakan ako mahitungod hito sugad la nga angay ako magyakan.
21 Yana, basi mahibaro liwat kamo han akon ginbubuhat ngan kon ano an nahitatabo ha akon, hi Tiquico, nga hinigugma nga bugto ngan matinumanon nga ministro han Ginoo, an magsusumat ha iyo han ngatanan.
22 Tungod hini ginsusugo ko hiya ngada ha iyo, basi mahibaroan niyo an amon kahimtang ngan basi maliaw niya an iyo kasingkasing.
23 Hinaot an kabugtoan magkaada kamurayawan ngan gugma nga may pagtoo tikang ha Dios nga Amay ngan ha Ginoo nga hi Jesu-Kristo.
24 Makarawat unta han ngatanan nga may tinuod nga gugma ha aton Ginoo Jesu-Kristo an diri-matupngan nga pagkabuotan.
Mga footnote
^ Ha literal, “pagbutang ha hunahuna.”
^ O “mga pamaagi.”
^ O “nakikigdulong.”
^ Karuyag sidngon, hi Satanas.
