Efeso 3:1-21
3 Tungod hini, ako, hi Pablo, napriso tungod kan Kristo Jesus para ha kaopayan niyo nga mga tawo han mga nasud—
2 kon totoo gud nga hinbatian niyo an mahitungod han akon pagin tinaporan han diri-matupngan nga pagkabuotan han Dios para ha iyo kaopayan,
3 nga an sagrado nga tinago iginpahayag ha akon, sugad la han akon halipot nga ginsurat hadto.
4 Salit kon mabasa niyo ini, makakasantop kamo han akon pagsabot ha sagrado nga tinago mahitungod han Kristo.
5 Ini nga tinago waray ipahayag ha naglabay nga mga henerasyon pariho han pagpahayag hini yana ha iya baraan nga mga apostol ngan mga propeta pinaagi han espiritu.
6 Ini an tinago: An mga tawo han mga nasud, nga kahiusa ni Kristo Jesus ngan pinaagi han maopay nga sumat, sadang magin igkasi-manurunod, igkasi-membro han lawas, ngan igkasi-umarangbit namon han saad.
7 Nagin ministro ako hini nga tinago tungod han diri-matupngan nga pagkabuotan han Dios. Iginhatag niya ha akon ini nga regalo nga waray bayad sugad nga pagpakita han iya gahum.
8 Inin diri-matupngan nga pagkabuotan iginhatag ha akon nga ubos pa ha pinakaubos han ngatanan nga baraan, basi maipasamwak ko ha mga nasud an maopay nga sumat mahitungod han diri matugkad nga mga karikohan han Kristo
9 ngan maipakita ha mga tawo kon paonan-o gindudumara an pagpahayag han sagrado nga tinago nga ha sulod hin maiha nga panahon igintago han Dios, nga naghimo han ngatanan nga butang.
10 Ginbuhat ito basi pinaagi han kongregasyon maipahibaro yana ha mga gobyerno ngan mga awtoridad ha langitnon nga mga lugar an damu gud kalain nga kinaadman han Dios,
11 uyon ha iya waray kataposan nga katuyoan mahitungod han Kristo, hi Jesus nga aton Ginoo,
12 nga pinaagi ha iya may kagawasan kita ha pagyakan ngan pagdaop ha Dios nga may pagsarig kay natoo kita ha Kristo.
13 Salit ginhahangyo ko kamo nga diri umundang tungod han akon mga kakurian para ha iyo kaopayan, kay naghahatag ini ha iyo hin kadungganan.
14 Tungod hini naluhod ako ha pag-ampo ha Amay,
15 nga gintikangan han ngaran han tagsa nga pamilya ha langit ngan ha tuna.
16 Nag-aampo ako nga pinaagi han iya daku gud nga himaya pakusgon an iyo personalidad pinaagi han gahum han iya espiritu,
17 ngan pinaagi han iyo pagtoo mag-ukoy unta an Kristo ha iyo kasingkasing upod an gugma, basi kamo makagamot ngan makatindog hin marig-on ha pundasyon;
18 basi upod han ngatanan nga baraan, makasabot gud kamo hin bug-os han kahilapad, kahilaba, kahitaas, ngan kahilarom han espirituwal nga mga butang,
19 ngan masabtan niyo an gugma han Kristo nga labaw gud ha kahibaro, basi mapuno kamo han kabug-osan han mga kalidad han Dios nga iya iginhahatag.
20 An Dios nakakahimo gud hin mas damu pa kay ha ngatanan nga butang nga aton maaaro o mahuhunahuna, uyon ha gahum nga nagios ha aton.
21 Salit angay hiya dayawon pinaagi han kongregasyon ngan pinaagi kan Kristo Jesus ha ngatanan nga henerasyon ha kadayonan. Amen.
