Efeso 4:1-32
4 Salit ako, nga napriso tungod han Ginoo, nakikimalooy ha iyo nga magkinabuhi* kamo uyon ha iyo pagin tinawag,
2 nga may bug-os nga pagpaubos ngan pagkamalumo, pasensyoso,* mahigugmaon nga nagpapailob ha kada tagsa,
3 ngan nangangalimbasog gud nga matipigan an pagkaurosa ha espiritu pinaagi han kamurayawan nga nagbubugkos ha iyo.
4 May usa nga lawas, ngan usa nga espiritu, sugad la nga may usa nga paglaom para han iyo pagin tinawag,
5 may usa nga Ginoo, usa nga pagtoo, usa nga bawtismo,
6 may usa nga Dios ngan Amay han ngatanan, nga labaw ha ngatanan ngan ginagamit niya an ngatanan ha pagbuhat han mga butang, ngan an iya gahum nagios ha ngatanan.
7 Yana iginhatag ha kada tagsa ha aton an diri-matupngan nga pagkabuotan uyon ha paagi han Kristo ha pagbahin-bahin han waray bayad nga regalo.
8 Tungod hito nasiring hiya: “Han sinaka hiya ha kahitas-an, nagdara hiya hin mga bihag; naghatag hiya hin regalo nga kalalakin-an.”
9 Ano an kahulogan han mga pulong nga “sinaka hiya”? Nangangahulogan liwat ito nga linusad hiya ha kahabub-an, nga amo an tuna.
10 Hiya mismo nga linusad amo liwat an sinaka lahos pa han bug-os nga kalangitan, basi matuman niya an ngatanan nga butang.
11 Ngan iginhatag niya an iba sugad nga mga apostol, an iba sugad nga mga propeta, an iba sugad nga mga ebanghelisador,* an iba sugad nga mga paraataman* ngan mga magturutdo,
12 basi tadungon utro* an mga baraan, para ha buruhaton ha ministeryo, basi maparig-on an lawas han Kristo,
13 tubtob nga makab-ot naton ngatanan an pagkaurosa ha pagtoo ngan an husto nga kahibaro mahitungod han Anak han Dios, ngan magin hamtong gud pariho han bug-os nga kahamtong han Kristo.
14 Salit diri na kita magin pariho han kabataan nga gin-aanod-anod han mga balud ngan ginpapalid-palid han tagsa nga hangin han katutdoan pinaagi han pagin tuso han mga tawo nga nagamit hin nakakalimbong nga mga taktika.
15 Kondi magyakan kita han kamatuoran ngan magpakita hin gugma, basi magin hamtong kita ha ngatanan nga butang uyon ha Kristo nga amo an ulo.
16 Pinaagi ha iya an bug-os nga lawas urosa nga nagkakauruyon ngan nakooperar pinaagi han tagsa nga kaluluthan nga naghahatag han ginkikinahanglan. Kon an tagsa nga bahin nagios hin maopay, nakakabulig ini ha pagtubo han lawas samtang ginpaparig-on hito an kalugaringon pinaagi han gugma.
17 Salit ginsisiring ko ini ha iyo ngan gin-aaghat ko kamo ha atubangan han Ginoo nga diri na kamo magkinabuhi sugad han pagkinabuhi han mga nasud uyon han ira waray pulos nga panhunahuna.
18 Madulom an ira panhunahuna, ngan nahibulag hira ha kinabuhi nga tikang ha Dios tungod han ira kaignorante, ngan tungod han katig-a* han ira kasingkasing.
19 Diri na hira maaram han mga prinsipyo ha moral ngan igintubyan an ira kalugaringon ha mangil-ad nga paggawi* ha pagbuhat nga may kahakog han ngatanan nga klase hin kahugaw.
20 Pero maaram kamo nga an Kristo diri sugad hini,
21 kon totoo gud nga hinbatian niyo hiya ngan gintutdoan kamo niya, sugad la nga an kamatuoran aada kan Jesus.
22 Salit sadang niyo hukason an daan nga personalidad nga uyon ha iyo panggawi hadto ngan gindadaot tungod han malimbong nga mga hingyap hito.
23 Ngan padayon nga bag-oha an iyo paagi han paghunahuna*
24 ngan isul-ot an bag-o nga personalidad nga ginhimo uyon ha kaburut-on han Dios, nga iginbasar ha totoo nga pagkamatadong ngan pagkamaunungon.
25 Salit yana nga ginbayaan na niyo an kabuwaan, an tagsa ha iyo magyakan hin kamatuoran ha iya igkasi-tawo, kay mga bahin kita han usa nga lawas.
26 Kangalas, pero ayaw pakasala. Ayaw pabay-i nga matunod an adlaw nga nasisina pa kamo,
27 ngan ayaw tagi hin higayon an Yawa.*
28 Hiya nga nangangawat diri na mangawat, lugod magtrabaho hiya hin maduruto, nga nagbubuhat hin maopay pinaagi han iya mga kamot, basi may maihatag hiya ha nanginginahanglan.
29 Diri gumawas ha iyo baba an maraot* nga pulong, kondi an maopay la para ha pagparig-on uyon ha panginahanglan, basi makahatag ito hin kapulsanan ha mga namamati.
30 Ayaw liwat niyo pasuboa an baraan nga espiritu han Dios, nga pinaagi hito ginselyohan kamo para ha adlaw han kagawasan pinaagi han lukat.
31 Bayai niyo an ngatanan nga klase hin pagdumot, kasina, kangalas, pagsinggit, ngan nakakasakit nga pulong, sugad man an ngatanan nga nakakadaot.
32 Lugod, magin buotan kamo ha usa kag usa, mapinairon, kinasingkasing nga nagpapasayloay sugad la nga an Dios pinaagi han Kristo kinasingkasing nga nagpasaylo liwat ha iyo.
Mga footnote
^ Ha literal, “maglakat.”
^ O “may hilawig nga pagpailob.”
^ O “mga parasamwak han maopay nga sumat.”
^ Kitaa an “Paraataman” ha Glossary.
^ O “bansayon.”
^ Ha literal, “kangarol.”
^ Kitaa an “Mangil-ad nga paggawi” ha Glossary.
^ Ha literal, “an espiritu han iyo hunahuna.” O “pwersa nga nagpapagios han iyo hunahuna.”
^ O “ayaw tagi hin lugar an Yawa.”
^ Ha literal, “dunot.”
