Efeso 1:1-23
1 Tikang kan Pablo, nga apostol ni Kristo Jesus pinaagi han kaburut-on han Dios, para ha mga baraan ha Efeso nga matinumanon nga kahiusa ni Kristo Jesus:
2 Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan ha Ginoo nga hi Jesu-Kristo.
3 Pagdayawon an Dios ngan Amay han aton Ginoo nga hi Jesu-Kristo, kay ginbendisyonan kita niya han tagsa nga espirituwal nga bendisyon ha langitnon nga mga lugar kahiusa han Kristo,
4 kay ginpili kita niya basi magin kahiusa han Kristo antes pa han tinikangan han kalibotan, basi kita magin baraan ngan waray-hugaw ha iya atubangan tungod han gugma.
5 Itinanda niya nga ampunon kita sugad nga iya kalugaringon nga mga anak pinaagi kan Jesu-Kristo, uyon ha iya kalipay ngan kaburut-on,
6 basi dayawon hiya tungod han iya makaruruyag nga diri-matupngan nga pagkabuotan nga mahigugmaon nga iginpakita niya ha aton pinaagi han iya Hinigugma.
7 Pinaagi ha iya nagkaada kita kagawasan kay ginlukat kita pinaagi han iya dugo, oo, napasaylo an aton mga pagtalapas tungod han pagkadaku han diri-matupngan nga pagkabuotan han Dios.
8 Hura nga nagpakita hiya ha aton hin diri-matupngan nga pagkabuotan pinaagi ha paghatag ha aton han bug-os nga kinaadman ngan pagsabot,
9 pinaagi ha pagpahibaro ha aton han sagrado nga tinago mahitungod han iya kaburut-on. Uyon ito ha iya kalipay nga iya mismo katuyoan
10 nga dumarahon an mga butang ha kataposan han itinanda nga mga panahon, basi tirukon utro ngadto ha Kristo an ngatanan nga butang, an mga butang ha langit ngan ha tuna. Oo, tirukon ngadto ha iya.
11 Kahiusa kita niya ngan ginpili sugad nga mga manurunod nga itinanda uyon ha katuyoan niya nga nagtutuman han ngatanan nga butang samtang nagdidesisyon uyon ha iya kaburut-on,
12 basi kita nga siyahan nga naglaom ha Kristo maghatag hin kadayawan ngan himaya ha Dios.
13 Kondi naglaom liwat kamo ha iya katapos niyo hibatian an pulong han kamatuoran, an maopay nga sumat mahitungod han iyo katalwasan. Han tinoo kamo, ginselyohan liwat kamo han baraan nga espiritu nga iginsaad pinaagi ha iya,
14 nga amo an abanse nga garantiya* han aton panurundon, basi magkaada kagawasan an kalugaringon nga katawohan* han Dios pinaagi han lukat, para ha iya kadayawan ngan himaya.
15 Salit han hinbatian ko an mahitungod han iyo pagtoo ha Ginoo nga hi Jesus ngan iyo iginpapakita ito ha ngatanan nga baraan, ako liwat
16 diri naundang ha pagpasalamat ha Dios tungod ha iyo. Pirme ko kamo gin-uupod ha akon mga pag-ampo,
17 nga an Dios han aton Ginoo nga hi Jesu-Kristo, an mahimayaon nga Amay, maghatag unta ha iyo han espiritu han kinaadman ngan pagsabot ha mga kapahayagan han husto nga kahibaro mahitungod ha iya.
18 Ginlamragan niya an mga mata han iyo kasingkasing basi hibaroan niyo kon ha ano nga paglaom gintawag kamo, kon ano nga mahimayaon nga karikohan an iya ihahatag sugad nga panurundon han mga baraan,
19 ngan kon mationan-o kadaku an nahihimo han iya diri-matupngan nga gahum ha aton nga mga tumuroo. Uyon ito ha paggios han iya gamhanan gud nga kusog,
20 nga iya iginpakita han ginbanhaw niya an Kristo ngan ginpalingkod ha iya too ha langitnon nga mga lugar,
21 nga mas hitaas gud kay ha ngatanan nga gobyerno, awtoridad, gahum, pagmando, ngan ha ngatanan nga ngaran, diri la hini nga sistema, kondi ha tiarabot liwat.
22 Iginpasakop liwat han Dios an ngatanan nga butang ha ilarom han iya mga tiil, ngan ginhimo hiya nga ulo han ngatanan nga butang may kalabotan ha kongregasyon,
23 nga amo an iya lawas, an iya kabug-osan, nga pinaagi ha iya nakukompleto an ngatanan nga butang ha ngatanan nga paagi.
