Efeso 2:1-22
2 Dugang pa, ginbuhi kamo han Dios bisan kon patay kamo tungod han iyo mga pagtalapas ngan mga sala.
2 Nagkinabuhi kamo hadto uyon ha sistema hini nga kalibotan ngan uyon ha magmarando nga may gahum ha pagkontrol han hangin, an espiritu nga nag-iimpluwensya yana ha mga diri-masinugtanon.
3 Oo, kita ngatanan nagkinabuhi hadto upod nira uyon ha aton makasasala nga mga hingyap, ginbubuhat an mga hingyap han lawas ngan han aton hunahuna, ngan tikang ha aton katawo mga anak kita han kangalas pariho han iba.
4 Pero daku an kalooy han Dios, ngan tungod han iya daku nga gugma nga iginpakita ha aton,
5 ginbuhi kita niya basi magin kahiusa han Kristo, bisan kon mga patay kita tungod han aton mga pagtalapas—pinaagi han diri-matupngan nga pagkabuotan gintalwas kamo.
6 Dugang pa, ginbuhi kita han Dios ngan ginpalingkod ha langitnon nga mga lugar kahiusa ni Kristo Jesus,
7 basi ha tiarabot nga sistema maipakita niya an iya diri-matupngan nga pagkabuotan pinaagi han iya pagkamaloloy-on ha aton nga kahiusa ni Kristo Jesus.
8 Pinaagi hini nga diri-matupngan nga pagkabuotan gintalwas kamo tungod han pagtoo; ngan diri ini tungod ha iyo, lugod, regalo ini han Dios.
9 Diri ini tungod han mga buhat, basi waray hinungdan nga maghinambog an bisan hin-o.
10 Mga hinimo kita han Dios; ginhimo kita nga kahiusa ni Kristo Jesus para ha mag-opay nga buhat nga ginsiguro nga daan han Dios nga buhaton naton.
11 Salit hinumdumi nga hadto, kamo nga mga tawo han mga nasud tikang ha katawo gintawag nga “diri-turi” han mga gintawag nga “turi” nga ginturi han mga tawo.
12 Hito nga panahon kamo diri pa nakilala ha Kristo, bulag ha nasud han Israel, diri upod han mga kasabotan han saad, waray kamo paglaom, ngan waray kamo Dios dinhi ha kalibotan.
13 Pero yana sugad nga kahiusa ni Kristo Jesus, kamo nga hirayo hadto nagin hirani na tungod han dugo han Kristo.
14 Kay hiya an naghahatag ha aton hin kamurayawan, an nagtig-ob han duha nga grupo ngan nagbungkag han pader ha butnga nira.
15 Pinaagi han iya lawas* ginwara niya an away, an Balaud nga ginkukompwesto hin mga sugo ngan turumanon, basi an duha nga grupo magin usa nga bag-o nga tawo nga kahiusa niya ngan maipadapat niya an kamurayawan,
16 ngan basi pinaagi han pasakitan nga kahoy* bug-os nga maipahiuli niya ha Dios an duha nga grupo han katawohan ha usa nga lawas, kay ginwara niya an away pinaagi han iya kalugaringon.
17 Kinanhi hiya ngan iginpahayag an maopay nga sumat han kamurayawan ha iyo nga mga hirayo ngan ha mga hirani,
18 kay pinaagi ha iya, kita nga duha nga grupo waray kaulangan nga nakakadaop ha Amay pinaagi han usa nga espiritu.
19 Salit diri na kamo mga estranghero ngan mga dayo nga residente, lugod mga igkasi-tuminungnong na kamo han mga baraan ngan mga membro na kamo han panimalay han Dios,
20 ngan gintindog kamo dida ha pundasyon han mga apostol ngan mga propeta, samtang hi Kristo Jesus mismo an pundasyon nga pandugtong nga bato ha eskina.
21 Sugad nga kahiusa niya, an bug-os nga tinukod nagigin baraan nga templo para kan Jehova, nga an kada bahin marig-on nga nagkakaturugkop.
22 Kamo liwat, sugad nga kahiusa niya, gintindog upod han iba basi magin usa nga lugar nga urukyan han Dios pinaagi han espiritu.
