GINSAYSAY AN MGA BERSIKULO HAN BIBLIA

Marcos 1:15—“Haraniay Na an Ginhadian han Dyos”

I-PLAY

“An itinanda nga panahon inabot na, ngan an Ginhadian han Dios hirani na. Magbasol kamo ngan magkaada pagtoo ha maopay nga sumat.”—Marcos 1:15, Bag-o nga Kalibotan nga Hubad.

“Inmabot na an igo nga panahon, . . . ngan haraniay na an Ginhadian han Dyos.’ Bayai an iyo mga sala ngan tuohi niyo an Maupay nga Sumat.”—Marcos 1:15, Baraan nga Biblia, An Maupay nga Sumat.

Kahulogan han Marcos 1:15

Hi Jesu-Kristo nagsiring nga an Ginhadian han Dios * “haraniay na” o “hirani na,” tungod kay, sugad nga magigin Hadi hito nga Ginhadian, nakada hiya hito nga takna kaupod han iya mamarati.

Diri iginpapasabot ni Jesus nga nagtikang na magmando an Ginhadian. Ha pagkatinuod, iginpasabot niya ha urhi ha iya mga disipulo nga ha tiarabot pa ito nga Ginhadian. (Buhat 1:6, 7) Pero, inabot hiya ha husto nga panahon, ha tuig mismo nga igintagna han Biblia nga maabot hiya sugad nga tiarabot nga Hadi. * Ini an rason nga nakagsiring hi Jesus: “An itinanda nga panahon inabot na”—an panahon nga titikangan na niya an iya ministeryo ha publiko pinaagi ha pagsangyaw han ebanghelyo, o maopay nga sumat, may kalabotan han Ginhadian.—Lucas 4:16-21, 43.

Basi makabenepisyo an mga tawo han maopay nga sumat han Ginhadian, kinahanglan magbasol hira, karuyag sidngon, umabat hin kasubo ha ira naglabay nga mga sala ngan magkinabuhi subay ha mga suruklan han Dios. Iginpapakita hadton mga nagbasol nga natoo hira han maopay nga sumat mahitungod hiton tiarabot nga Ginhadian.

Konteksto han Marcos 1:15

Ginyakan ni Jesus ini nga mga pulong ha tinikangan han iya ministeryo ha Galilea. “Tikang hito nga panahon,” siring han kapariho nga asoy ha Mateo 4:17, hi Jesus nagsangyaw mahitungod han Ginhadian han Dios. An Ginhadian amo an tema han iya ministeryo. Ha pagkamatuod, an Ginhadian gin-unabi hin sobra 100 ka beses ha upat nga Ebanghelyo *, kasagaran ha mga ginyakan mismo ni Jesus. Ha rekord han Biblia, mas agsob nga nagyakan hi Jesus mahitungod ha Ginhadian han Dios kay ha iba nga topiko.

Basaha an Marcos kapitulo 1 ngan kitaa liwat an mga footnote, mga cross-reference, mga piktyur, ngan mapa.

^ par. 3 An Ginhadian han Dios usa nga gobyerno ha langit nga gin-establisar han Dios basi matuman an iya kaburut-on para ha tuna. (Daniel 2:44; Mateo 6:10) Para ha dugang nga impormasyon, kitaa an artikulo nga “Ano an Ginhadian han Dios?”

^ par. 4 Kinahanglan magin hadi hi Jesus basi matuman niya an usa han iya mga papel sugad nga an igintagna nga Mesias, an espesyal nga representante han Dios. Para ha dugang nga impormasyon han mga tagna han Biblia nga nagtutudlok kan Jesus sugad nga an Mesias, kitaa an artikulo nga “An mga Tagna ba Mahitungod ha Mesias Nagpapamatuod nga hi Jesus an Mesias?”

^ par. 6 An Ebanghelyo amo an siyahan nga upat nga libro han Kristiano Griego nga Kasuratan, nga komon nga gintatawag nga Bag-o nga Tugon, nga nagsusulod han rekord han kinabuhi ngan ministeryo ni Jesus.