Pakadto ha sulod

Ano an Ginhadian han Dios?

Ano an Ginhadian han Dios?

An baton han Biblia

An Ginhadian han Dios usa nga tinuod nga gobyerno nga gin-establisar ni Jehova nga Dios. Ha Biblia, “an Ginhadian han Dios” gintatawag liwat nga “an Ginhadian han langit,” tungod kay nagmamando ito tikang ha langit. (Marcos 1:14, 15; Mateo 4:17) Damu an kaparihoan hito ha mga gobyerno han tawo, pero mas labaw gud ito ha tanan nga aspekto.

  • Magmarando. Ginpili han Dios hi Jesu-Kristo sugad nga Hadi han Ginhadian ngan gintagan hiya hin awtoridad nga labaw gud kay ha awtoridad nga mahimo makarawat han bisan hin-o nga magmarando nga tawo. (Mateo 28:18) Ginagamit ni Jesus ini nga iya awtoridad para la ha kaopayan, kay iya na ginpamatud-an nga masasarigan hiya ngan maloloy-on nga Lider. (Mateo 4:23; Marcos 1:40, 41; 6:31-34; Lucas 7:11-17) Ha paggiya han Dios, nagpili hi Jesus hin mga indibiduwal tikang ha ngatanan nga nasud nga makakaupod niya ha langit basi ‘magmando sugad nga mga hadi ha bawbaw han tuna.’—Pahayag 5:9, 10.

  • Kaihaon han pagmando. Diri pariho han mga gobyerno han tawo nga diri permanente, an Ginhadian han Dios “diri gud mabubungkag.”—Daniel 2:44.

  • Sakop. An bisan hin-o nga nasunod ha mga sugo han Dios mahimo magin sakop han Ginhadian han Dios, anoman an ira lahi o lugar nga natawhan.—Buhat 10:34, 35.

  • Balaud. An mga balaud (o mga sugo) han Ginhadian han Dios diri la kay nagdidiri han sayop nga mga binuhatan. Nakakabulig ini nga magin mas maopay nga tawo an mga sakop hito. Pananglitan, an Biblia nasiring: “‘Higugmaa hi Jehova nga imo Dios ha bug-os mo nga kasingkasing ngan ha bug-os mo nga kalag ngan ha bug-os mo nga hunahuna.’ Ini an pinakaimportante ngan siyahan nga sugo. An ikaduha, nga puropariho hini, amo ini: ‘Higugmaa an imo igkasi-tawo sugad ha imo kalugaringon.’” (Mateo 22:37-39) An gugma ha Dios ngan ha igkasi-tawo nagpapagios ha mga sakop han Ginhadian nga magbuhat hin maopay ha iba.

  • Edukasyon. Bisan kon naghahatag an Ginhadian han Dios hin hitaas nga mga patakaran ha mga sakop hito, gintututdoan liwat hito an mga tawo kon paonan-o ito masusunod.—Isaias 48:17, 18.

  • Misyon. Diri ginpapariko han Ginhadian han Dios an mga magmarando hito samtang an mga sakop nag-aantos. Lugod, tutumanon hito an kaburut-on han Dios, pati na an saad nga adton nahigugma ha iya mabubuhi ha waray kataposan ha paraiso nga tuna.—Isaias 35:1, 5, 6; Mateo 6:10; Pahayag 21:1-4.