Amoxa 9:1-15
9 Yihoowi yarshshiyo sohuwappe bollaara deꞌiyagaa taani beꞌaas, I hagaadan giis: “Tuussaa huuphiya shoca, yaatin goccillati qaaxxana. Eta huupheta qanxxa, attidaageeta taani bisuwan worana. Baqatiya ooninne wora beenna, qassi kessi ekkanawu maliya ooyyonne ushachchenna.
2 Eti bookkidi Duufuwan* duge geliyakkokka,Ta kushee eta yaappe kessana;Qassi eti salota pude kiyiyakkokka,Taani eta yaappe duge wottana.
3 Qassi eti Qarmmelosa liiphiyan qosettiyakkokka,Taani yaappe eta koya demmada oyqqana.
Eti abbaa baasuwa wodhdhidi ta ayfiyappe geemmiyakkokka,Taani yan eta dukkanaadan shooshshaa azazana.
4 Eti bantta morkketuppe kasetidi omoodduwan biyakkokka,Taani yan bisuwa azazana, qassi hegee eta worana;Taani eta xeellanay iitabaassappe attin, loꞌꞌobaassa gidenna.
5 Ayssi giikko, Ubbaa Haariya Goday, olanchchatu Yihoowi biittaa* Bochchiyagaa,Yaatin biittay seerees, qassi an deꞌiya ubbay kayyottana;Biitta ubbay Nayledan kixxana,Qassi Gibxxen deꞌiya Nayledan duge wodhdhana.
6 ‘Salotun ba xekkata gimbbiyagee,Qassi saꞌaappe bollaara ba kaaraa* wottiyagee,Saꞌaa bolli duge tiganawu,Abbaappe haattaa shiishshiyagee,—A sunttay Yihoowa.’
7 ‘Inttenoo Israaꞌeela asawu, intte taayyo Kushatu naatu mala gidekketii?’ yaagees Yihoowi.
‘Taani Israaꞌeela Gibxxe biittaappe,Pilisxxeemata Qarxxeesappe, qassi Sooreta Qirappe kessada ehabeykkinaa?’
8 ‘Hekko! Ubbaa Haariya Godaa Yihoowa ayfeti nagaranchcha kawotettaa bollaana,Qassi I biittaa bollappe A xayssana.
Shin taani Yaaqooba keettaa muleera xayssikke,’ yaagees Yihoowi.
9 ‘Hekko! Taani azazays,Issi asi kattaa zazzariyogaadan,Qassi issi anccoynne saꞌan wodhdhennaagaadan,Taani deretu ubbaa giddon Israaꞌeela keettaa zazzarana.
10 “Bashshay nuukko shiiqenna, woy nuna gakkenna” yaagiyageeti,Ta asaa giddoppe nagaranchchati ubbay bisuwan hayqqana.’
11 ‘He gallassi taani kunddida Daawita daasiya denttana,Taani xooꞌeta* barana,Qassi laalettidabata zaarettada giigissana;Taani daro wodeppe kaseegaadan A zaarada keexxana,
12 Yaatikko eti Edomappe attidabaanne,Ta sunttan xeesettiya ubba deretubaa ekkana danddayoosona,’ yaagees Yihoowi, hagaa oottiyagee.
13 ‘Hekko! He gallassay yiiddi deꞌees,’ yaagees Yihoowi,‘He wode kattaa shiishshiyagee polennan, goyiyagee goshshaa doommana,Qassi woyniya yedhdhiyagee polennan, zeriyagee zerettaa doommana;Dereti malꞌꞌo woyniyan musana,Qassi ubba zumbbullatuppe hegee goggana.*
14 Taani ta asaa Israaꞌeelappe omooddettidaageeta zaarada shiishshana,Qassi eti baysa gidida katamata zaarettidi keexxananne etan deꞌana,Eti woyniya tokkananne appe uyana,Qassi ataakiltte sohota giigissananne etan ayfidabaa maana.’
15 ‘Taani eta biittan eta tokkana,Qassi taani etawu immido eta biittaappeEti naaꞌꞌantto mulekka shodettokkona,’ yaagees ne Xoossay Yihoowi.”
