Amoxa 2:1-16
2 “Yihoowi hagaadan gees,‘“Moꞌabi makkalido heezzu, ubba oyddu makkalaa* gishshawu, taani ta kuuyidobaa laammikke,Ayssi giikko, I aannuwa kessanawu Edoma kawuwa meqettata xuuggiis.
2 Yaatiyo gishshawu, taani Moꞌaba giddo tamaa yeddana,Qassi hegee Qiriyota mino gimbbeta maana;Moꞌabi shabbirssaa giddon hayqqana,Qassikka I gayruwa giddooninne malkkataa cenggurssaa giddon hayqqana.
3 Taani haariyagaa* I giddoppe diggana,Qassi aara issippe I daannata ubbaa worana,” yaagees Yihoowi.’
4 Yihoowi hagaadan gees,‘Yihuday makkalido heezzu, ubba oyddu makkalaa gishshawu, taani ta kuuyidobaa laammikke,Ayssi giikko, eti Yihoowa higgiya* ekkennan ixxidosona,Qassi A wogata naagibookkona;Shin eta mayzza aawati kaallido worddoti eta wora kaalettidosona.
5 Yaatiyo gishshawu, taani Yihudaa giddo tamaa yeddana,Qassi hegee Yerusalaame mino gimbbeta maana.’
6 Yihoowi hagaadan gees,‘Israaꞌeeli makkalido heezzu, ubba oyddu makkalaa gishshawu, taani ta kuuyidobaa laammikke,Ayssi giikko, eti birawu giidi xilluwa bayzzoosona,Qassi waatta caammawu giidi hiyyeesaa bayzzoosona.
7 Eti hiyyeesaa huuphiya baanan yedhdhoosona,Qassi ashkkiya ogiya gorddoosona.
Naꞌaykka A aawaykka issi naꞌeera zinꞌꞌoosona,Yaatidi ta geeshsha sunttaa tunissoosona.
8 Eti acuwawu oyqqido maayuwa bolli, yarshshiyo soho ubbaa matan zinꞌꞌoosona;Qassi maqqaccuwan ekkido miishshan, bantta xoossatu keettan* woyniya uyoosona.’
9 ‘Shin Amore yaraa eta sinttappe muleera xayssiday tana,I erzze giyo xiiddaadan adussa, qassi alone* mittaadan mino;Taani bollappe A ayfiya, qassi garssappe A xaphuwa xayssaas.
10 Taani inttena Gibxxe biittaappe kessada ehaas,Qassi intte Amore yaraa biittaa ekkana mala,Inttena 40 layttawu bazzuwara kaalettaas.
11 Taani intte attuma naatuppe amaridaageeta hiraagaa* yootiyageeta oottada,Qassi intte yelaga attumaageetuppe amaridaageeta Nazire* oottada denttaas.
Inttenoo, Israaꞌeela asawu, taani hegaadan oottabeykkinaa?’ yaagees Yihoowi.
12 ‘Shin Nazireti uyana mala woyniya immiyogaa aggibeekketa,Qassi hiraagaa yootiyageeta, “Intte hiraagaa yootana bessenna” yaagidi azazideta.
13 Yaatiyo gishshawu, cakkido kattaa caanido gaaree ba yedhdhiyo ubbabaa kinchcherettiyogaadan,Taani inttena intte deꞌiyo sohuwan kinchchana.
14 Eesotidi woxxiyagawu baqatiyosi xayana,Minoy ba wolqqaara deꞌiigenna,Qassi ay olanchchinne paxa* kessi ekkenna.
15 Wonddafiyan dukkiyagee eqqidi olettenna,Tohoy eesotiyogee kessi ekkenna,Qassi paraa toggidaagee paxa* kessi ekkenna.
16 Haray atto olanchchatu giddon ubbaappe aadhdhiya xalaykka*He gallassi kallo baqatana,’ yaagees Yihoowi.”
