Phaṱhutshedzo Kha Vhane Vha Ṋea Mudzimu Vhugala
Phaṱhutshedzo Kha Vhane Vha Ṋea Mudzimu Vhugala
“Vha ḓo ḓa vha luvha Iwe, Muṋe wanga, vha ḓo ṋea dzina ḽau thendo.”—PSALME YA 86:9.
1. Ndi ngani ri tshi kona u ḓisela Mudzimu vhugala nga nḓila ine ya fhira zwine tsiko i sa tshili ya nga zwi ita?
YEHOVA o fanelwa nga u rendwa nga zwoṱhe zwe a zwi sika. Naho tsiko yawe i sa tshili i tshi mu ḓisela thendo yo fhumula, riṋe vhathu ri na vhukoni ha u humbula, ha u pfa, u livhuha, na u rabela. Nga zwenezwo, mupsalme uri vhudza uri: “Hee inwi mashango oṱhe, ḓalelani Mudzimu muḓalo. Bvumelani vhurena ha dzina ḽawe; simani zwirendo zwa u imbela [vhugala, NW] hawe.”—Psalme ya 66:1, 2.
2. Ndi vhafhio vhe vha aravha ndaela ya u ṋea dzina ḽa Mudzimu vhugala, nahone ndi ngani?
2 Vhathu vhanzhi a vha tendi kha Mudzimu kana u mu ṋea vhugala. Naho zwo ralo, mashangoni a fhiraho 235, Ṱhanzi dza Yehova dzi fhiraho milioni dza rathi dzi sumbedza uri dzi a vhona ‘pfaneleo dza Mudzimu dzi sa vhonali’ kha zwithu zwe a zwi sika na kha vhuṱanzi he dza vhu ‘pfa’ na kha tsiko i sa ambi. (Vha-Roma 1:20, vhambedzani NW; Psalme ya 19:2, 3) Nga u guda Bivhili, dzo dovha dza ḓivha na u funa Yehova. Psalme ya 86:9, 10 yo dzula yo amba u ri: “Vha-nnḓa vhoṱhe vhe wa vha ita, vha ḓo ḓa vha luvha Iwe, Muṋe wanga, vha ḓo ṋea dzina ḽau thendo. Ngauri Muhulu-hulu ndi Iwe Mu-ita-maḓembe; Mudzimu ndi Iwe, a huna muṅwe.”
3. “Gogo ḽihulu” ḽi shuma “masiari na vhusiku” nga nḓila-ḓe?
3 Ndzumbululo 7:9, 15 nga hu fanaho i ṱalusa “gogo ḽihulu” ḽa vhagwadameli sa vhane vha khou “shumela [Mudzimu] masiari na vhusiku nḓuni khethwa yawe.” Mudzimu ha khou kombetshedza vhashumeli vhawe uri vha mu rende vha sa imi, fhedzi vhagwadameli vhawe vha tou vha ndangulo ya shango ḽoṱhe. Ngauralo musi hu vhusiku kha maṅwe mashango, vhashumeli vha Mudzimu kha tshiṅwe tshipiḓa tsha shango vha vha vho farakanea nga u ṱanziela. Ndi ngazwo hu tshi nga ambiwa uri vha ḓisela Yehova thendo vhusiku na masiari. Nga u ṱavhanya “zwoṱhe zwi femaho” zwi ḓo takusela nṱha maipfi azwo u itela u renda Yehova. (Psalme ya 150:6) Naho zwo ralo, ndi zwifhio zwine ra nga zwi ita nga muthihi nga muthihi u itela u ṋea Mudzimu vhugala? Ndi vhuleme vhufhio vhune ra nga sedzana naho? Nahone ndi phaṱhutshedzo dzifhio dzo lindelaho vhane vha ṋea Mudzimu vhugala? Kha ri ṱhogomele mafhungo a Bivhili malugana na lushaka lwa Vhaisiraele lwa Gada.
Vhuleme ho Iteaho Kale
4. Lushaka lwa Gada lwo vha lwo sedzana na vhuleme vhufhio?
4 Musi vha sa athu dzhena Shangoni ḽo Fulufhedziswaho, miraḓo ya lushaka lwa Vhaisiraele lwa Gada yo humbela uri kholomo dzayo dzi fule vhubvaḓuvha ha Yorodane. (Numeri 32:1-5) U dzula henefho zwo vha zwi tshi ḓo amba u sedzana na vhuleme vhuhulwane. Dzitshaka dze dza vha dzi vhukovhela ha Yorodane dzo vha dzi tshi ḓo tsireledzwa nga Govha ḽa Yorodane—ḽine ḽa vha tsireledzo kha u vutshelwa nga maswole. (Yoshua 3:13-17) Naho zwo ralo, malugana na mashango a vhubvaḓuvha ha Yorodane, The Historical Geography of the Holy Land, yo ṅwaliwaho nga George Adam Smith, i ri: “[Mashango] oṱhe o ita bande, hune hu si vhe na mukano wo dzhenelelaho kha balethavha khulwane ya Vhaarabu. Nga zwenezwo vho vha vha tshi dzula vho sedzana na u vutshelwa nga vhatendeleki vha re na nḓala, nahone tshiṅwe tshigwada tshihulwane tsho vha tshi tshi vha vutshela ṅwaha muṅwe na muṅwe u itela pfulo.”
5. Yakobo o ṱuṱuwedza hani vhaḓuhulu vha Gada uri vha lifhedze musi vha tshi khou vutshelwa?
5 Lushaka lwa Gada lwo vha lu tshi ḓo sedzana hani na wonoyo mutsiko u sa fheli? Maḓanani a miṅwaha nga phanḓa, kha vhuporofita hawe musi e tsini na u fa, makhulukuku wavho Yakobo o dzula o amba u ri: “Gada u diiwa nga dzimmbi; ene u diya zwirethe.” (Genesi 49:19) Nga lwa u tou thoma, eneo maipfi a nga vhonala a tshi tsikeledza. Naho zwo ralo, zwi re zwone ndi uri zwi nga vha ndaela ya uri Vhagada vha lifhedze. Yakobo o vha khwaṱhisedza uri arali vha vhe vho ita nga u ralo, vhenevho vhavutsheli vho vha vha tshi ḓo ḓiṱukufhadza, nahone Vhagada vha kunda.
Vhuleme Vhurabelini Hashu Ṋamusi
6, 7. Vhuimo ha Vhakriste ṋamusi vhu fana hani na ha lushaka lwa Gada?
6 U fana na lushaka lwa Gada, Vhakriste ṋamusi vha sedzana na mitsiko na mihwalo ya maitele a Sathane; nahone a huna tsireledzo ya lwa vhuṱolo ya u ri vhofholola kha zwenezwo. (Yobo 1:10-12) Vhunzhi hashu ri fanela u sedzana na mitsiko ya tshikoloni, mushumoni wa u ḓitshidza, na u alusa vhana. Hu dovha ha vha na mitsiko ya muthu nga eṱhe. Vhaṅwe vha fanela u konḓelela “mupfa ṋamani” wa u vha na vhuholefhali ho kalulaho kana vhulwadze. (2 Vha-Korinta 12:7-10, vhambedzani NW.) Vhaṅwe vha vhaiswa nga u ḓipfa vhe si vha ndeme. “Misi mivhi” ya vhulala i nga thithisa Vhakriste vha vhalala uri vha si kone u shumela Yehova nga maanḓa e vha vhuya vha vha nao.—Muhuweleli 12:1.
7 Muapostola Paulo o dovha a ri humbudza uri “nndwa yashu . . . ndi ya u lwa na mimuya ya vhuvhi i re ṱaḓulu.” (Vha-Efesa 6:12) Tshifhinga tshoṱhe ri sedzana na “muya wa shango,” muya wa vhushandukwa na u tshinyala ha vhuḓifari zwine Sathane na madimoni awe vha zwi ṱuṱuwedza. (1 Vha-Korinta 2:12; Vha-Efesa 2:2, 3) U fana na Loto a ofhaho Mudzimu, na riṋe ṋamusi ri nga tsikeledzwa nga zwithu zwi songo kunaho zwine vhathu vhane ra tshila navho vha zwi amba kana u zwi ita. (2 Petro 2:7) Ri dovha ra sedzana na u vutshelwa nga Sathane nga ho livhaho. Sathane u khou lwa na masalela a vho ḓodzwaho, vhane ‘vha fara milayo ya Mudzimu, vha re na vhuṱanzi ha Yesu.’ (Ndzumbululo 12:17) “Dziṅwe nngu” dza Yesu dzi a sedzana na u vutshelwa nga Sathane nga u thivhelwa na u tovholwa.—Yohane 10:16.
Naa Ri Fanela u Kulea Nungo Kana Ri Fanela u Ḓilwela?
8. Ri fanela u aravha hani kha u vutshela ha Sathane, nahone ndi ngani?
8 Ri fanela u aravha hani musi ri tshi vutshelwa nga Sathane? U fana na lushaka lwa Gada lwa kale, ri fanela u khwaṱha muyani nahone ri lwe nae, u tendelana na vhulivhisi ha Mudzimu. Zwi ṱungufhadzaho, ndi uri vhaṅwe vho thoma u kulea nungo musi vhe nga fhasi ha mitsiko ya vhutshilo, vha dzhiela fhasi vhuḓifhinduleli havho ha zwithu zwa muya. (Mateo 13:20-22) Iṅwe Ṱhanzi yo amba zwi tevhelaho malugana na uri ndi ngani mbalo ya vhane vha ḓa miṱanganoni tshivhidzoni tsha hawe i fhasi: “Vhahashu vha khou neta zwa vhukuma. Vhoṱhe vho tsikeledzea vhukuma.” I ngoho, vhathu ṋamusi vha na zwiitisi zwinzhi zwa u neta. Nga zwenezwo, zwi a leluwa u dzhia vhurabeli ha Mudzimu sa muṅwe mutsiko, vhuḓifhinduleli vhu lemelaho. Fhedzi naa eneo ndi mavhonele a pfalaho kana o lugaho?
9. Ndi ngani u hwala dzhogo ya Kristo zwi tshi ita uri u awele?
9 Ṱhogomelani zwe Yesu a zwi amba kha mavhuthu a misini yawe e a vha o neta nga ṅwambo wa mitsiko ya vhutshilo: “Iḓani ha nṋe noṱhe no netaho, no lemelwaho; nṋe ndi ḓo ni awedza.” Naa Yesu o vha a tshi khou amba uri u awela hu vha hone nga u fhungudza tshumelo kha Mudzimu? U fhambana na zwenezwo, Yesu o ri: “Ḓi-hweseni dzhogo yanga, ni funzwe nga nṋe; ngauri ndo vuḓa, ndi mudzia-u-ḓi-ṱukufhadza mbiluni; ndi hone dzimbilu dzaṋu dzi tshi ḓo rula.” Dzhogo yo itwa nga thanda kana tsimbi zwine zwa ita uri muthu kana tshipuka tshi kone u hwala muhwalo u lemelaho. Nga zwenezwo, ndi ngani muthu naho e nnyi a tshi nga ṱoḓa u hwala yeneyo dzhogo? Naa a ri athu u ‘lemedzwa’? Ee, fhedzi luṅwalo lwa Lugerika lu dovha lwa vhalea nga u ri: “Hwalani dzhogo na nṋe.” Humbulani nga zwenezwo: Yesu u khou amba uri u ḓo ri thusa u kokodza muhwalo washu! A ro ngo fanela u u ita nga nungo dzashu.—Mateo 9:36; 11:28, 29, ṱhaluso i re magumoni a siaṱari, NW; 2 Vha-Korinta 4:7.
10. Ndi mini zwine zwa bveledzwa nga vhuḓidini hashu ha u ṋea Mudzimu vhugala?
10 Musi ri tshi hwala dzhogo ine Kristo a ri ṋea yone ya u vha vhafunziwa vhawe, ri vha ri tshi khou lwa na Sathane. Yakobo 4:7 i fulufhedzisa uri: “Ilwani na Diabolo, u ḓo ni shavha.” Hezwi a zwi ambi uri u ita zwenezwo zwi a leluwa.. U shumela Mudzimu zwi katela vhuḓidini ho engedzeaho. (Luka 13:24) Fhedzi Bivhili i fulufhedzisa hezwi kha Psalme ya 126:5: “Vha zwalaho vhé na nḓodzi, vha ḓo kaṋa vhé na mifhululu.” Ee, ri rabela Mudzimu ane a livhuha. Ndi ‘muṋei wa malamba kha vhane vha mu ṱoḓa,’ nahone u fhaṱutshedza vhane vha mu ṋea vhugala.—Vha-Heberu 11:6.
Ṋeani Mudzimu Vhugala sa Vhahuweleli vha Muvhuso
11. Vhuḓinḓa ha tsimu vhu shuma sa tsireledzo ya u lwa na u vutshelwa nga Sathane nga nḓila-ḓe?
11 Yesu o laedza u ri: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa.” (Mateo 28:19; Vha-Heberu 13:15) U vha hashu na ‘tho̗vho dze ra kungela milenzheni hú u dzula ró ḓi-dzudzanyela u yo amba mafhungo-maḓifha a mulalo’ zwi dovha zwa vha tshipiḓa tsha ndeme kha “mafumo oṱhe ashu”—kha u ḓilwela kha mvutshelo ya Sathane. (Vha-Efesa 6:11-15) U renda Mudzimu vhuḓinḓani ha tsimu ndi nḓila yavhuḓi ya u khwaṱhisa lutendo lwashu. (2 Vha-Korinta 4:13) Zwi ita uri ri dzule ri tshi humbula nga ha zwithu zwavhuḓi. (Vha-Filipi 4:8) U ṱanganela vhuḓinḓani ha tsimu zwi ita uri ri ḓiphine nga vhukonani vhu fhaṱaho na vhagwadameli nga riṋe.
12, 13. U ṱanganela vhuḓinḓani ha tsimu tshifhinga tshoṱhe zwi nga vhuyedza hani miṱa? Fanyisani.
12 Mushumo wa u huwelela u nga dovha wa vha mushumo wavhuḓi wa muṱa. Vhukuma, vhaswa vha fanela u linganyisela kha u ḓimvumvusa. Naho zwo ralo, tshifhinga tshine ra tshi fhedza ri muṱa vhuḓinḓani ha tsimu a tsho ngo fanela u vha tshi netisaho. Vhabebi vha nga ita uri tshi takadze vhukuma nga u gudisa vhana vhavho uri vha vhe vha bvelelaho vhuḓinḓani. Naa vhaswa a vha anzeli u ḓiphina nga zwithu zwine vha zwi kona? U sumbedza u linganyisela, na u sa kombetshedza vhaswa uri vha ite zwine zwa fhira nungo dzavho, vhabebi vha nga vha thusa uri vha wane dakalo vhuḓinḓani.—Genesi 33:13,14.
13 Zwiṅwe hafhu, muṱa une wa renda woṱhe Mudzimu u vha na vhuthihi. Ṱhogomelani muṅwe wahashu wa tshisadzini we a ṱutshelwa nga munna wawe a si mutendi nahone a siiwa na vhana vhaṱanu. Nga zwenezwo o vha a tshi khou konḓelwa u wana mushumo wa u ḓitshidza na u ṱhogomela vhana vhawe nga zwithu zwi vhonalaho. Naa o vhuya a neta lwe a nyadza madzangalelo a vhana vhawe a zwithu zwa muya? U ri: “Ndo guda Bivhili na khandiso dza Bivhili nga mafulufulu nahone nda lingedza u shumisa zwe nda vha ndi tshi khou zwi vhala. Ndo vha ndi tshi ṱuwa na vhana miṱanganoni na vhuḓinḓani ha nnḓu nga nnḓu tshifhinga tshoṱhe. Ho vha na mvelelo dzifhio dza honoho vhuḓidini? Vhana vhoṱhe vhaṱanu vho mbo ḓi lovhedzwa.” U ṱanganela vhuḓinḓani nga vhuḓalo na inwi zwi nga ni thusa kha vhuḓidini haṋu ha u alusa vhana vhaṋu “nga u vha laya na u vha kwengweledzela zwa Murena.”—Vha-Efesa 6:4.
14. (a) Vhaswa vha nga renda hani Mudzimu tshikoloni? (b) Ndi mini zwine zwa nga thusa vhaswa uri vha sa vhe ‘na ṱhoni kha mafhungo maḓifha’?
14 Vhaswa, arali ni tshi dzula shangoni hune mulayo wa zwi tendela, naa ni a ṋea Mudzimu vhugala nga u ṱanziela tshikoloni, kana naa ni a tendela u ofha vhathu zwi tshi ni thivhela? (Mirero 29:25) Ṱhanzi i re na miṅwaha ya 13 ya ngei Puerto Rico yo ṅwala ya ri: “A thi athu vhuya nda ḓipfa ndo shona nga u huwelela tshikoloni nga ṅwambo wa uri ndi a zwi ḓivha uri ndi mafhungo-ngoho. Ndi anzela u imisa tshanḓa tshanga kilasini nahone nda vha vhudza zwe nda zwi guda Bivhilini. Arali ndi na tshifhinga tsha u awela, ndi ya laiburari nahone nda vhala bugu ine ya pfi Young People Ask. * Naa Yehova o fhaṱutshedza vhuḓidini hawe? O ri: “Nga zwiṅwe zwifhinga vhane nda dzhena navho tshikolo vho mmbudzisa nahone vha ita na u humbela kopi ya yeneyo bugu.” Arali no vha ni tshi ofha u ita zwenezwi, khamusi ni fanela u zwi sumbedza uri ‘Mudzimu u funa zwivhuya na zwine zwa mu takadza, na zwi si tshiṱahe’ nga u ḓigudisa Bivhili nga mafulufulu. (Vha-Roma 12:2) Musi no no vha na vhungoho ha uri zwe na guda ndi mafhungo-ngoho, ni nga si ḓo vhuya na vha ‘na ṱhoni kha mafhungo maḓifha.’—Vha-Roma 1:16.
U ‘Vulea ha Muṋango’ wa Tshumelo
15, 16. Ndi ufhio “muṋango muhulu u isaho tshumeloni” we vhaṅwe Vhakriste vha dzhena ngawo, nahone ho vha na phaṱhutshedzo dzifhio?
15 Muapostola Paulo o ṅwala a ri “muṋango muhulu u isaho tshumeloni” wo vulea khae. (1 Vha-Korinta 16:9, vhambedzani NW.) Naa zwiimo zwaṋu zwi a ni tendela u dzhenela tshumelo yo engedzeaho? Sa tsumbo, u dzhenela vhuḓinḓa ha vhuvulanḓila ha tshifhinga tshoṱhe kana ha u thusa, zwi katela u fhedza awara dza 70 kana dza 50 ṅwedzi muṅwe na muṅwe mushumoni wa u huwelela. Nga ho ḓoweleaho, vhavulanḓila vha a dzhielwa nṱha nga Vhakriste ngavho nga ṅwambo wa u fulufhedzea tshumeloni yavho. Fhedzi mbuno ya uri vha fhedza tshifhinga tshinzhi vhe vhuḓinḓani a zwi iti uri vha ḓipfe vhe vha nṱha kha vhahavho vha tshinnani na vha tshisadzini. Nṱhani hazwo, vha ṱahulela mavhonele o ṱuṱuwedzwaho nga Yesu: “A ri vhalanda vha tshithu; ro shuma zwe zwa vha zwo ri fanela.”—Luka 17:10.
16 U vulanḓila zwi ṱoḓa u ḓilaya, u ḓidzudzanya, na u ḓiimisela u ḓikumedza. Naho zwo ralo, hu na phaṱhutshedzo kha u ita nga u ralo. Muṅwe muswa wa muvulanḓila ane a pfi Tamika o ri: “U kona u tshea fhungo ḽa ngoho u sa kombamisi ndi phaṱhutshedzo ya vhukuma. Musi ni tshi vula nḓila, ni shumisa nga maanḓa Bivhili. Musi ndi tshi ya nnḓu nga nnḓu zwino, ndi humbula maṅwalo o teaho ṋemuḓi muṅwe na muṅwe.” (2 Timotheo 2:15) Muvulanḓila ane a pfi Mica u ri: “U vhona nḓila ine mafhungo-ngoho a kwama ngayo vhutshilo ha vhathu ndi iṅwe phaṱhutshedzo i mangadzaho.” Muswa ane a pfi Matthew na ene o amba zwi fanaho nga ha dakalo “ḽa u vhona muṅwe muthu a tshi ḓa ngohoni. A huna muṅwe mufuda wa dakalo une wa nga fhira wonoyu.”
17. Muṅwe Mukriste o kunda hani maḓipfele a si avhuḓi nga ha vhuvulanḓila?
17 Naa ni nga humbula nga ha u dzhenela vhuvulanḓila? Khamusi ni a ṱoḓa u ita nga u ralo, fhedzi ni pfa ni sa fanelei. Muṅwe wahashu muswa wa tshisadzini ane a pfi Kenyatte o ri: “Ndi na mavhonele a si avhuḓi nga vhuvulanḓila. Ndi ḓipfa ndi si na vhukoni. Ndo vha ndi sa ḓivhi nḓila ya u lugiselela marangaphanḓa kana u haseledza nga Maṅwalo.” Naho zwo ralo, vhahulwane vha ita uri muṅwe muvulanḓila wa tshisadzini o vhibvaho a shume nae. Kenyatte u ri: “Zwo vha zwi tshi takadza u shuma nae. Zwenezwo zwo ita uri ndi ṱoḓe u vula nḓila.” Nga u ṱuṱuwedzwa na u gudiswa, khamusi na inwi ni nga ṱoḓa u vula nḓila.
18. Ndi phaṱhutshedzo dzifhio dzine vhane vha dzhenela tshumelo ya vhurumiwa vha nga vha nadzo?
18 Vhuvulanḓila vhu nga ita uri ni shumele kha dziṅwe ndugelo dza tshumelo. Sa tsumbo, vhaṅwe vhavhingani vha nga fanelea u gudiswa u vha vharumiwa u itela uri vha rumelwe u huwelela mashangoni a nnḓa. Vharumiwa vha fanela u ḓowela u vha kha ḽiṅwe shango, khamusi luambo luswa, mvelele, na zwiḽiwa. Fhedzi phaṱhutshedzo dzi ita uri zwenezwo zwithu zwi si zwavhuḓi zwi sa vhe zwa ndeme. Mildred ane a vha murumiwa a re na tshenzhelo ngei Mexico, o ri: “A thi athu vhuya nda ḓi sola nga phetho yanga ya u vha murumiwa. Ndi tshithu tshe nda vha ndi tshi tshi tama u bva ndi kha ḓi vha musidzana.” O ḓiphina nga phaṱhutshedzo dzifhio? “Musi ndi shangoni ḽa hashu, u wana pfunzo ya Bivhili zwo vha zwi tshi konḓa. Fhedzi ngeno Mexico ndo wana vhagudiswa vhaṋa musi ndi tshi thoma tshumelo ya tsimu!”
19, 20. Vhathu vhanzhi vho wana hani phaṱhutshedzo tshumeloni ya Bethele, kha maṅwe mashango, na Tshikoloni tsha U Gudisela Vhuḓinḓa?
19 Hu do vha ha vha na phaṱhutshedzo nnzhi kha vhane vha vha tshumeloni ya Bethele ofisini dza davhi dza Ṱhanzi dza Yehova. Sven, muswa wa tshinnani ane a shuma ngei Dzheremane, u amba nga ha mushumo wawe wa Bethele: “Ndi pfa uri ndi khou ita tshiṅwe tshithu tshine tsha vha na ndeme vhukuma. Ndo vha ndi tshi nga vha ndo shumisa vhutsila hanga shangoni. Fhedzi zwo vha zwi tshi ḓo fana na u vhea tshelede banngani ine ya vha tsini na u wa.” I ngoho, u vha mushumi wa u ḓifunela a sa holi zwi katela u ḓikumedza. Fhedzi Sven u ri: “Musi ni tshi ya hayani, ni a zwi ḓivha uri zwoṱhe zwe na zwi ita ḽeneḽo ḓuvha ndi zwa Yehova. Nahone zwenezwo zwi ni ṋea maḓipfele avhuḓi.”
20 Vhaṅwe vhahashu vha a ḓiphina nga phaṱhutshedzo ya tshumelo ya kha maṅwe mashango, vha tshi shuma kha u fhaṱwa ha madavhi mashangoni a nnḓa. Vhaṅwe vhavhingani vhe vha shuma kha mashango a nnḓa a malo vho ri: “Vhahashu vha re fhano ndi vhavhuḓi. Zwi ḓo pfisa vhuṱungu u ṱuwa—ndi lwa vhumalo musi mbilu dzashu dzi tshi ‘vhaisala.’ Zwe ra ṱangana nazwo zwi a takadza vhukuma!” Hu do vha ha vha na Tshikolo tsha U Gudisela Vhuḓinḓa. Tshi ṋea vhugudisi ha zwithu zwa muya kha vha tshinnani vha faneleaho vha siho mbinganoni. Muṅwe we a ṱhaphudza o ri: “Ndi pfa ndi si na maipfi a u ni livhuha malugana na tshenetsho tshikolo tshavhuḓi. Ndi ifhio iṅwe ndangulo ine ya nga ita honoho vhuḓidini ho engedzeaho u itela u ṋea vhugudisi?”
21. Ndi khaedu ifhio ine Vhakriste vhoṱhe vha sedzana nayo musi vha tshi khou shumela Mudzimu?
21 Ee, ho vulea miṋango minzhi ya tshumelo. Vhukuma, vhunzhi hashu a ri koni u shuma Bethele kana kha mashango a nnḓa. Yesu o zwi ṱhogomela uri Vhakriste vha ḓo aṋwa “mitshelo” i sa eḓani nga ṅwambo wa zwiimo zwo fhambanaho. (Mateo 13:23) Nga zwenezwo, khaedu ine ra vha nayo samusi ri Vhakriste, ndi ya u ita zwine ra nga kona zwiimoni zwashu—u ṱanganela nga vhuḓalo tshumeloni ya Yehova u ya nga hune zwiimo zwa ri tendela ngaho. Musi ri tshi ita nga u ralo, ri khou ṋea Yehova vhugala, nahone ri nga vha na vhungoho ha uri u a takala vhukuma. Ṱhogomelani Ethel, mulala wa tshisadzini a re fhethu ha u ṱhogomela vhalala. U ṱanziela tshifhinga tshoṱhe kha vhathu vhane a dzula navho hayani hawe na u ṱanziela nga luṱingo. Hu sa londwi vhushayanungo hawe, u ita tshumelo yawe nga mbilu yoṱhe.—Mateo 22:37.
22. (a) Ndi nḓila dzifhio dzo engedzeaho dzine ngadzo ra nga ḓisela Mudzimu vhugala? (b) Ndi tshifhinga tshifhio tshavhuḓi tsho ri lindelaho?
22 Nga zwenezwo, humbulani uri u huwelela i sokou tou vha iṅwe nḓila ine ra rendisa ngayo Yehova. Nga u vha tsumbo kha vhuḓifari na kha mbonalo zwashu musi ri mushumoni washu wa u ḓitshidza, tshikoloni, na hayani, ri ita uri mbilu ya Yehova i takale. (Mirero 27:11) Mirero 28:20 i a fulufhedzisa: “Munna-mufulufhedzei u ḓo pfuma phaṱhutshedzo.” Nga zwenezwo ri fanela u “zwala lwa u tonda” tshumeloni yashu kha Mudzimu, ri tshi zwi ḓivha uri ri ḓo kaṋa phaṱhutshedzo nnzhi. (2 Vha-Korinta 9:6) U ita nga u ralo, i ḓo vha ndugelo yashu ya u tshila tshifhingani tshavhuḓi musi “zwoṱhe zwi femaho” zwi tshi ḓo ṋea Yehova vhugala vhune ha mu fanela vhukuma!—Psalme ya 150:6.
[Ṱhaluso dzi re magumoni a siaṱari]
^ phar. 14 Bugu ine ya pfi Questions Young People Ask—Answers That Work yo gandiswa nga Ṱhanzi dza Yehova.
Ni A Zwi Elelwa?
• Vhathu vha Mudzimu vha shumela hani Yehova “vhusiku na masiari”?
• Ndi vhuleme vhufhio he lushaka lwa Gada lwa ṱangana naho, nahone zwenezwo zwi funza mini Vhakriste ṋamusi?
• Vhuḓinḓa ha tsimu vhu shuma hani sa tsireledzo kha u vutshelwa nga Sathane?
• Ndi ufhio ‘muṋango wo vuleaho’ we vhaṅwe vha dzhena khawo, nahone ndi phaṱhutshedzo dzifhio dze vha ḓiphina ngadzo?
[Mbudziso Dza Pfunzo]
[Tshifanyiso kha siaṱari 15]
Samusi Vhagada vho lwa na zwigwada zwi vutshelaho, Vhakriste vha fanela u lwa na u vutshela ha Sathane
[Tshifanyiso kha siaṱari 17]
Ri ḓiphina nga vhukonani vhu fhaṱaho vhuḓinḓani ha tsimu
[Tshifanyiso kha siaṱari 18]
Vhuvulanḓila vhu nga vula muṋango wa dziṅwe ndugelo dza tshumelo, u katela:
1. Tshumelo kha maṅwe mashango
2. Tshumelo ya Bethele
3. Tshumelo ya vhurumiwa