Muvhigo Wa Vhahuweleli Vha Muvhuso

‘Wela u Ḓe u ri Farise’

NGA JULY 2000, ho itiwa khuwelelo ngei Austria, Dzheremane, na Switzerland ya uri Ṱhanzi dzine dza kona u amba Ludzheremane dzi pfulutshele ngei Bolivia. Ndi ngani? Ngauri vhathu vhane vha amba Ludzheremane vha vhaporotesintante vhe vha vha vha tshi dzula tsini na tsini vhukule ha khilomithara dza 300 u bva Santa Cruz na Bolivia, vha re na matshilele a fanaho vho vha vha tshi khou sumbedza dzangalelo kha Bivhili.

Ṱhanzi dzi ṱoḓaho u vha 140 dzo ṱanganedza honoho u rambiwa. Vhaṅwe vho ya henefho fhethu vhege dzi si gathi nahone vhaṅwe vha ya ṅwaha muthihi kana u fhira. Nga u ita nga u ralo, vho sumbedza muya u fanaho na wa vharumiwa vha ḓana ḽa u thoma ḽa miṅwaha vhe vha thetshelesa maipfi ane a ri: “Wela U ḓe Makedonia U ri farise!”—Mishumo 16:9, 10.

U shuma kha yeneyo tsimu zwi hani? Muṅwe muhulwane wa tshiṅwe tsha zwivhidzo zwa henefho u a ṱalutshedza: “U ya mivhunduni ya 43 hune ha dzula Vhaporotesitante zwi nga dzhia awara dza malo nḓilani i re na matombo u tshi khou tshimbila nga goloi khulwane ine ya kona u tshimbila matomboni. U dalela fhethu hune ha vha kule vhukuma zwi nga dzhia maḓuvha maṋa nahone vhusiku hu tshi eḓeliwa kha madennde. Fhedzi wonoyu ndi mushumo wa ndeme vhukuma, ngauri vhenevha vhathu a vha athu u pfa nga ha mafhungo maḓifha na luthihi.”

U thomani, vhunzhi ha Vhaporotesitante vho vha vha sa takaleli honoho u dalelwa. Fhedzi u dalelwa lunzhi-lunzhi zwo ita uri vha ṱhogomele zwe Ṱhanzi dza vha dzo vha farela zwone. Sa tsumbo, muṅwe rabulasi o amba uri o no fhedza ṅwaha a tshi khou vhala magazini wa Awake!. Nga zwenezwo a engedza nga u ri: “Ndi a zwi ḓivha uri vhathu vhanzhi vha fhano a vha tendelani na vhoiwe, fhedzi ndi a tenda zwa uri ndi mafhungo-ngoho.” Kha ḽiṅwe shango, muṅwe munna o ri: “Vhaṅwe vha vhahura vhanga vha ri ni vhaporofita vha u zwifha, vhaṅwe vha ri ni amba mafhungo-ngoho. Ndi ṱoḓou ḓivha nga nṋe muṋe.”

Zwa zwino ngei Bolivia hu na tshivhidzo tshine khatsho ha ambiwa Ludzheremane, tshi re na vhahuweleli vha 35, u katela na vhaevangeli vha tshifhinga tshoṱhe vha 14. U swika zwino hu na vhahuweleli vha Muvhuso vhe vha vha vhe Vhaporotesitante vha 14, na vha ṱahe vhane vha ya miṱanganoni misi yoṱhe. Muṅwe munna wa mualuwa a kha ḓi bvaho u lovhedzwa o ri: “Ri a kona u vhona vhulivhisi ha Yehova nga hu leluwaho. O rumela vhahashu vha tshinnani na vha tshisadzini vhane vha amba Ludzheremane uri vha ḓe vha ri thuse. Ri a livhuha vhukuma.” Ṅwananyana wa onoyo munna a re na miṅwaha ya 17 ane na ene o no lovhedzwa o engedza a ri: “U fhisea ha vhahashu vhaswa vha tshinnani na vha tshisadzini vhe vha ḓa fhano hu a ri kwama. Vhunzhi havho ndi vhavulanḓila, nahone vha fhedza tshifhinga tshavho na tshelede yavho u itela u thusa vhaṅwe. Zwi ita uri ndi ṱoḓe u ita zwi fanaho.”

Vhukuma, vhe vha kona u “wela” u itela u thusa vha wana dakalo na u fushea zwihulwane.