Vhurifhi Ha Vhuvhili Ha Petro 2:1-22
2 Samusi ho vha na vhaporofita vha u zwifha kha Vhaisiraele, na kha inwi hu ḓo vha na vhane vha funza mazwifhi.+ Vhenevho vha ḓo thoma zwigwada, zwine zwa ḓo tshinyadza lutendo lwaṋu ni sa zwi ṱhogomeli, vha landula muṋe wavho we a vha rengulula,+ zwenezwi zwi ḓo ita uri vha fheliswe nga u ṱavhanya.
2 Zwiṅwe hafhu, vhanzhi vha ḓo vha tevhela, vha ita tshivhi vha sa shoni,*+ zwenezwo zwa ita uri vhathu vha sasaladze pfunzo ya ngoho.+
3 Vha ḓo ita na u ni fhura nga mazwifhi ngauri vha na tseḓa. Fhedzi khaṱhulo ye ya vhewa u bva kale,+ a i nga lengi u ḓa, vha ḓo fheliswa zwa vhukuma.+
4 Mudzimu ho ngo litsha u pfisa vhuṱungu vharuṅwa vhe vha tshinya,+ fhedzi o vha posela Thatharasi,*+ a vha vhea mugodini wa swiswi ḽihulu uri vha lindele u haṱulwa.+
5 Na shango ḽa kale ho ngo litsha u ḽi pfisa vhuṱungu,+ fhedzi o tsireledza Noaxe we a huwelela nga ha u luga+ na vhaṅwe vha sumbe,+ musi a tshi ḓisa maḓi mahulu kha shango ḽo ḓalaho vhathu vha sa ofhi Mudzimu.+
6 O pfisa vhuṱungu na muḓi wa Sodoma na wa Gomora nga u i fhisa ya vha miḽora,+ zwenezwi zwi sumbedza zwine zwa ḓo itea kha vha sa ofhi Mudzimu.+
7 O tshidza Loto+ o lugaho, we a tsikeledzwa zwihulu nga vhathu vha si na mulayo, vha itaho tshivhi vha sa shoni*—
8 ngauri onoyo munna o lugaho o vha a tshi dzula o ṱungufhala nga nṱhani ha zwe a vha a tshi zwi vhona na u zwi pfa musi e vhukati ha vhenevho vhathu vhavhi.
9 Yehova* u a kona u ponyokisa mulingoni vhane vha fhulufhedzea khae,+ fhedzi u vhetshela thungo vha songo lugaho uri vha fheliswe nga ḓuvha ḽa khaṱhulo,+
10 zwihuluhulu vhane vha ṱoḓa u tshikafhadza vhaṅwe+ na vhane vha nyadza vhavhusi.+
Vha na tshikhuna, vha ita zwine vha funa, a vha ofhi u sasaladza vha huliswaho nga Mudzimu,
11 ngeno vharuṅwa vha sa vha pomoki nga u vha sasaladza naho vhe na nungo na maanḓa mahulu, ngauri vha ṱhonifha Yehova.*+
12 Fhedzi vhenevha vhathu vha nga zwipuka zwo bebelwaho u fashwa na u vhulawa, vha sasaladza zwine vha si zwi ḓivhe.+ Vha ḓo fheliswa nga nṱhani ha vhuvhi vhune vha vhu ita,
13 vha ḓo pfiswa vhuṱungu nga nṱhani ha mishumo mivhi ine vha i ita.
Vha takadzwa nga u ḽa, u nwa na u vha na zwimima zwi sa langei+ naho hu nga masiari. Vha nga madondo ane a tshikafhadza tshivhidzo, vha takalela pfunzo dzavho dza vhufhura ngeno vha tshi khou ḽa na inwi.+
14 Vha takalela u ita vhupombwe,*+ a vha koni u sa ita zwivhi, vha kunga vha si na lutendo lwo khwaṱhaho.* Mbilu dzavho dzo ḓala tseḓa.* Ndi vhana vho semiwaho.
15 Vho litsha nḓila yo lugaho, vha xedzwa. Vho tevhela nḓila ya Bileamu+ murwa wa Beoro, we a ita vhuvhi uri a lambedzwe,+
16 fhedzi a kaidzelwa vhutshinyi hawe.+ Donngi yo amba u nga muthu, ya lingedza u thivhela onoyo muporofita uri a si ite zwa vhutsilu.+
17 Vhenevho vha nga zwisima zwo xaho, vha nga khuli i vhudzulwaho nga ḓumbu, vho lindelwa nga swiswi ḽihulu.+
18 Vha amba zwithu zwine zwa pfala u nga ndi zwa ndeme, fhedzi zwi si na mushumo. Vha ita tshivhi vha sa shoni* na u ita uri vhathu vha dovhe vha vhe na nyemulo mmbi,+ vha vha kunga uri vha ite zwithu zwivhi zwe vha zwi litsha.+
19 Vha vha fhulufhedzisa mbofholowo, ngeno vhone vhaṋe vhe phuli dza tshivhi.+ Ngauri arali muthu a kundiwa nga muṅwe, u vha phuli ya o mu kundaho.*+
20 Arali vho ponyoka u tshikafhadzwa nga shango+ nga u vha na nḓivho yo teaho nga ha Murena na Mutshidzi Yesu Kristo, vha dovha vha ita zwenezwo zwithu zwivhi, zwa vha kunda, vhuimo havho vhu ḓo vhifha ha fhira ha u thoma.+
21 Zwo vha zwi tshi ḓo vha khwine arali vha songo vhuya vha ḓivha nḓila yo lugaho nṱhani ha uri vha ṱutshele mulayo wa Mudzimu vha tshi u ḓivha.+
22 Vha sumbedza uri murero u amba ngoho, u tshi ri: “Mmbwa yo ḽa maṱanza ayo, nguluvhe yo humela thopheni naho yo ṱanzwiwa.”+
Ṱhaluso dzi re magumoni a siaṱari
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
^ Kana “Maṱo avho o ḓala vhupombwe.”
^ Kana “vha si na vhuimo.”
^ Kana “dzo gudiswa u vha na tseḓa.”
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
^ Kana “arali na kundwa nga tshithu, ni phuli yatsho.”
