Vhurifhi Ha Vhuvhili Vhu Yaho Kha Vhakorinta 12:1-21

  • Mabono a Paulo (1-7a)

  • “Mupfa ṋamani” ya Paulo (7b-10)

  • Ha muṱuku kha vha⁠apostola vhane vha ḓiita vhavhuḓi (11-13)

  • Paulo u vhilaela nga Vhakorinta (14-21)

12  Naho zwi sa vhuyedzi ndi ḓo zuwa. Ndi ḓo amba nga ha mabono+ e Murena a ntsumbedza na zwe a mmbudza.+ 2  Ndi ḓivha muthu a re na vhuthihi na Kristo we a iswa kha ḽiṱaḓulu ḽa vhuraru, miṅwahani ya 14 yo fhiraho. A thi ḓivhi arali o ya nga muvhili wawe kana a songo ya ngawo. 3  Ndi a ḓivha onoyo muthu, fhedzi a thi ḓivhi arali o ya nga muvhili wawe kana a songo ya ngawo, zwi ḓivhiwa nga Mudzimu. 4  Musi e pharadisoni o pfa maipfi ane muthu a nga si kone u a amba na a songo tendelwaho u ambiwa. 5  Ndi ḓo zuwa nga ha onoyo muthu, nda zuwa na nga zwithu zwine zwa sumbedza uri a thi na nungo, fhedzi a thi nga ḓikhoḓi. 6  Naho ndi tshi ṱoḓa u zuwa, a thi nga ḓo vha tsilu, ngauri ndi ḓo vha ndi tshi khou amba ngoho. Fhedzi a thi nga zuwi, uri hu si vhe na ane a nkhoḓa u fhira zwine a zwi vhona kana u zwi pfa nga nṋe, 7  ngauri ndo dzumbululelwa nga yeneyo nḓila i mangadzaho. Nga zwenezwo, uri ndi si ḓikukumuse, ndi na mupfa ṋamani,+ une wa nga muruṅwa wa Saṱhane, u dzula u tshi mpfisa vhuṱungu, uri ndi si ḓikukumuse. 8  Ndo humbela Murena luraru uri u bviswe. 9  Fhedzi ene a ri: “Vhuthu hanga vhuhulu ho u eḓana, ngauri ndi sumbedza maanḓa anga kha a shayaho nungo.”+ Ndi ngazwo ndi tshi zuwa nga u sa vha na nungo, uri maanḓa a Kristo a ntsireledze u fana na dennde. 10  Ndi ngazwo ndi tshi takala musi ndi si na nungo, ndi tshi semiwa, ndi tshi shaya, ndi tshi tovholwa na u ṱangana na zwi konḓaho ndi tshi itela Kristo. Ngauri ndi vha na maanḓa musi ndi si na nungo.+ 11  Ndi vho amba sa tsilu nga nṱhani haṋu. Ndo vha ndi sa ḓo amba nga u rali arali ni vhe no nnyambelela. Naho ndi si tshithu,+ a thi muṱuku kha vhaapostola vhaṋu vhane vha ḓiita vhavhuḓi. 12  Ndo ni sumbedza uri ndi muapostola nga u ni itela vhuṱolo, zwithu zwi mangadzaho na mishumo ya maanḓa,+ ndi tshi konḓelela zwihulu.+ 13  Inwi a ni fani na zwiṅwe zwivhidzo ngauri a tho ngo vha muhwalo kha inwi.+ Arali ndo ni khakhela nga zwenezwi ni mpfarele. 14  Ndi lwa vhuraru ndo lugela u ḓa kha inwi, na zwino a thi nga vhi muhwalo. Ngauri a thi khou ṱoḓa thundu dzaṋu,+ ndi khou ṱoḓa u ni vhona; ngauri vhana+ a vha lavhelelwi uri vha vhulungele vhabebi vhavho, fhedzi vhabebi vha tea u vhulungela vhana vhavho. 15  A vha nṋe ndi ḓo shumisa zwoṱhe zwine nda vha nazwo ndi tshi itela inwi.+ Arali ndi tshi ni funa nga maanḓa, naa a no ngo tea u mpfuna nga nḓila ine nda ni funa ngayo? 16  Naho ndi songo vha muhwalo kha inwi,+ ni ri ndo ni “fhura,” ndo ni fasha “nga vhukwila.” 17  Naa ndo ni fhura nga vhe nda vha ruma kha inwi? 18  Ndo ṱuṱuwedza Tito uri a ḓe kha inwi, nda mu ruma na wahashu. Kani Tito o ni fhura?+ Naa a ro ngo sumbedza uri ri na vhuthihi? Naa a ro ngo ita zwithu nga nḓila i fanaho? 19  Ni nga vha ni tshi humbula uri ri khou ḓiimelela, fhedzi a si zwone. Ri khou amba ngoho phanḓa ha Mudzimu samusi ri tshi tevhela Kristo. Vhahashu vhane ra vha funa, zwoṱhe zwine ra ita, ri itela u ni fhaṱa. 20  Ngauri ndi ofha uri musi ndi tshi swika, ndi ḓo wana ni tshi khou tshila nga nḓila ine nda sa i takalele, hu na nndwa, vivho, u sinyuwa, dziphambano, zwitshele, u solana, vhaṅwe vha tshi ḓikukumusa na u vusa dzikhakhathi, na nṋe nda ita zwithu nga nḓila ine ni si i takalele. 21  Khamusi ndi tshi ḓa kha inwi, Mudzimu wanga u ḓo ntshonisa phanḓa haṋu, nda vho ṱungufhala ngauri vhanzhi a vha athu u rembuluwa kha zwivhi zwavho. A vha athu u rembuluwa kha vhuyaḓa havho, u ḓifara luvhi nga zwa vhudzekani,* na u ita tshivhi vha sa shoni.*

Ṱhaluso dzi re magumoni a siaṱari

^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.