Dzulani No Kuna Nga U Tsireledza Mbilu Yaṋu
Dzulani No Kuna Nga U Tsireledza Mbilu Yaṋu
“Kha zwoṱhe zwine zwa pfi zwi lindwe U tsireledze mbilu yau; ngauri ndi yone ine vhutshilo ha bva khayo’.”—MIRERO 4:23.
1-3. (a) Vhathu vha anzela u sumbedza hani uri a vha dzhieli nṱha u kuna havho? Fanyisani. (b) Ndi ngani zwi zwa ndeme u ṱolisisa ndeme ya u kuna?
TSHIFANYISO tshi nga vhonala tshi tsha kale. Khamusi tshi sa fanelei u khavhisa nnḓu. Hu sa londwi zwenezwo, muṋe watsho a nga pfa a sa tshi ṱoḓi. Tshenetsho tshifanyiso mafheleloni tshi nga iswa hune ha rengiswa thundu dzo no shumiswaho, nahone tsha rengiswa nga dolara (U.S.) dza 29. Naho zwo ralo, nga murahu ha miṅwaha, muṅwe muthu a zwi tumbula uri tshi vhidza mutengo u ṱoḓaho u vha dolara dza milioni! Ee, tsho vha tsho itwa nga vhutsila vhuhulwane vhukuma. Edzani u humbula nḓila ye muṋe watsho, we a vha a dzhiela fhasi lwonolu lupfumo, a ḓipfa ngayo!
2 Hu dzulela u itea zwithu zwi fanaho nga ha u kuna, zwine zwa vha u kuna ha vhuḓifari ha muthu. Vhathu vhanzhi ṋamusi vha dzhiela fhasi u kuna havho. Vhaṅwe vha zwi dzhia u muhumbulo wa kale, une u sa tee matshilele a musalauno. Nga zwenezwo, vha dzhiela fhasi u kuna havho u itela u wana zwithu zwi si zwa ndeme. Vhaṅwe vha dzhiela fhasi u kuna havho u itela u ḓifusha nga zwa u ṱangana nga dzimbeu lwa tshifhinganyana. Vhaṅwe vha a hu litshelela vha tshi fulufhela u wana vhuimo vhuhulwane maṱoni a thangana dzavho dza murole kana muraḓo wa mbeu yo fhambanaho na yavho.—Mirero 13:20.
3 Vhanzhi vha ṱhogomela ho no vha kale nḓila ine u kuna havho ha vha ha ndeme ngayo. Mvelelo i anzela u vha makhaulambilu. Samusi Bivhili i tshi zwi amba, mvelelo dza u ḓifara luvhi dzi nga fana na mulimo, “u vhavha vhunga luáre.” (Mirero 5:3, 4) Malugana na vhuḓifari ho tshinyalaho ṋamusi, ni nga dzhiela hani nṱha na u dzula no kuna? Ri ḓo haseledza nga vhukando vhuraru vhune ha tshimbidzana vhune ra nga vhu dzhia.
Tsireledzani Mbilu Yaṋu
4. Mbilu ya pfanyisedzo ndi mini, nahone ndi ngani ri tshi fanela u i tsireledza?
4 Tshithu tsha ndeme kha u dzula wo kuna ndi u tsireledza mbilu. Bivhili i ri: “Kha zwoṱhe zwine zwa pfi zwi lindwe U [tsireledze, NW] mbilu yau; ngauri ndi yone ine vhutshilo ha bva khayo’.” (Mirero 4:23) Hu khou ambiwa nga ‘mbilu yaṋu’ ifhio afha? A si mbilu ya vhukuma. Yeneyi mbilu ndi ya pfanyisedzo. I ambela kha muthu ane na vha ene nga ngomu, u katela na mihumbulo yaṋu, maḓipfele, na zwiṱuṱuwedzi. Bivhili i ri: “Yehova Mudzimu wau U mu fune nga mbilu yau yoṱhe, na nga muya wau woṱhe; na nga maanḓa au oṱhe.” (Doiteronomio 6:5, maḽeḓeretsendama ndi ashu) Yesu o amba uri yeneyi ndaela ndi khulwanesa kha dzoṱhe. (Marko 12:29, 30) Zwi khagala uri yeneyi mbilu yashu ndi ya ndeme vhukuma. Ndi zwa ndeme u i tsireledza.
5. Mbilu i nga vha hani ya ndeme nahone ya dovha ya vha na khombo?
5 Naho zwo ralo, Bivhili i dovha ya amba uri “mbilu ndi yone mudzia-tshimbevha vhukuma, ndi mmbi.” (Yeremia 17:9) Mbilu i nga vha hani mudzia-tshimbevha—khombo kha riṋe? Sa tsumbo, goloi ndi tshi shumiswa tsha ndeme, nahone i nga dovha ya tshidza na vhutshilo ha muṅwe tshifhingani tsha shishi. Fhedzi arali mureili a sa livhisi tshiḓiraivelo tsha yeneyo goloi tshifhinga tshoṱhe, yeneyo goloi i nga vhulaha mureili kana vhaṅwe nga hu leluwaho. Nga hu fanaho, arali na sa tsireledza mbilu yaṋu, ni ḓo langwa nga nyemulo yaṋu ya nga ngomu, nahone na welwa nga khombo dzi tshinyadzaho. Ipfi ḽa Mudzimu ḽi ri: “Mu-pika-mbilu-yawe u ḓo tsilufhala; hu ḓo hanya we a fara ya vhuṱali.” (Mirero 28:26) Vhukuma, ni nga tshimbila nga vhuṱali nahone na ponyoka khombo arali na shumisa Ipfi ḽa Mudzimu u itela uri ḽi ni livhise, u fana na musi ni tshi ḓo sedza mapa wa nḓila musi ni sa athu thoma lwendo.—Psalme ya 119:105.
6, 7. (a) Vhukhethwa ndi mini, nahone ndi ngani hu ha ndeme kha vhashumeli vha Yehova? (b) Ri zwi ḓivha hani uri vhathu vha songo fhelelaho vha nga sumbedza vhukhethwa ha Yehova?
6 Mbilu yashu i nga si sokou takalela u kuna. Ri fanela u i livhisa nga yeneyo nḓila. Iṅwe nḓila ya u ita nga u ralo ndi u elekanya nga ha ndeme ya vhukuma ya u kuna. Yeneyi pfaneleo i tshimbidzana na vhukhethwa, zwine zwa amba u kuna, u vha kule na zwivhi. Vhukhethwa ndi pfaneleo ya ndeme ya Yehova Mudzimu. Ndimana dza maḓana dza Bivhilini dzi ṱumanya yeneyo pfaneleo na Yehova. Zwi re zwone ndi uri Bivhili i ri “Vhukhethwa ndi ha Yehova.” (Ekisodo 28:36, vhambedzani NW.) Naho zwo ralo, yeneyo pfaneleo khulwane i kwama hani riṋe vhathu vha songo fhelelaho?
7 Kha Ipfi ḽawe, Yehova u ri vhudza uri: “Ivhani vhakhethwa, ngauri nṋe ndi mukhethwa!” (1 Petro 1:16) Ee, ri nga edzisa vhukhethwa ha Yehova; ri nga kuna phanḓa hawe, nahone ri nga dzula ro kuna. Ngauralo, musi ri tshi iledza mishumo i songo kunaho, ri vha ri tshi khou swikelela ndugelo khulwane na ine ya vha yavhuḓi vhukuma—ya u sumbedza pfaneleo yavhuḓi ya Mudzimu wa Ṱaḓulu-ṱaḓulu! (Vha-Efesa 5:1) A ro ngo fanela u humbula uri a zwi konadzei u ita nga u ralo, ngauri Yehova ndi Muṋe o ṱalifhaho na a humbulelaho ane a sa vhuye a ṱoḓa zwi fhiraho zwine ra nga zwi kona. (Psalme ya 103:13, 14; Yakobo 3:17) I ngoho, u dzula wo kuna muyani na kha vhuḓifari zwi ṱoḓa vhuḓidini. Naho zwo ralo, muapostola Paulo o ṱhogomela uri “u fulufhedzea na . . . u kuna . . . zwo tea Kristo.” (2 Vha-Korinta 11:3, NW) Naa a ri kolodi Kristo na Khotsi awe u itela u ita vhuḓidini ha u dzula ro kuna kha vhuḓifari? Zwi re zwone ndi uri vho ri sumbedza lufuno luhulwane lune ri nga si vhuye ra lu badela. (Yohane 3:16; 15:13) Ndi ndugelo kha riṋe u sumbedza u livhuha hashu nga u tshila vhutshilo ho kunaho. U humbula nga u kuna hashu nga yeneyo nḓila, zwi ḓo ita uri ri hu dzhiele nṱha, nahone ri ḓo tsireledza mbilu yashu.
8. (a) Ri nga kanzwa hani mbilu ya pfanyisedzo? (b) Nyambedzano yashu i nga dzumbulula mini nga ha riṋe?
8 Ri dovha ra tsireledza mbilu yashu nga nḓila ine ra ḓifusha ngayo riṋe vhaṋe. Ri fanela u fusha mihumbulo na mbilu dzashu tshifhinga tshoṱhe nga zwiḽiwa zwa muya, na u dzula ro livhisa ṱhogomelo kha mafhungo maḓifha a Muvhuso wa Mudzimu. (Vha-Kolosa 3:2) Na nyambedzano dzashu dzi fanela u sumbedza zwenezwo. Arali ri tshi ḓivhelwa u amba nga ha mafhungo a u fusha muvhili na a songo kunaho, ri vha ri tshi khou dzumbulula zwiṅwe zwithu nga ha vhuimo ha mbilu yashu. (Luka 6:45) Nṱhani hazwo, kha ri ḓivhelwe u amba nga ha mafhungo a muya na a fhaṱaho. (Vha-Efesa 5:3) U itela u tsireledza mbilu yashu, hu na khombo khulwane dzine ra fanela u dzi iledza. Kha ri haseledze vhuvhili hadzo.
Shavhani Vhupombwe
9-11. (a) Ndi ngani vhane vha nyadza nyeletshedzo i re kha 1 Vha-Korinta 6:18 vha tshi ḓidzhenisa kha zwa u ḓifara luvhi ho kalulaho? Fanyisani. (b) Arali ri tshi khou shavha vhupombwe, ndi mini zwine ra fanela u zwi iledza? (c) Yobo munna a fulufhedzeaho o ri vhetshela tsumbo ifhio yavhuḓi?
9 Yehova o hevhedza muapostola Paulo u ṅwala iṅwe nyeletshedzo ye ya thusa vhanzhi u tsireledza mbilu dzavho na u dzula vho kuna. Paulo o ri: “Shavhani vhupombwe!” (1 Vha-Korinta 6:18) Ṱhogomelani uri ha ngo sokou amba uri, “Iledzani vhupombwe.” Vhakriste vha fanela u ita zwo engedzeaho. Vha fanela u shavhela kule na yeneyo mishumo i songo kunaho, u fana na musi vha tshi shavha zwithu zwi vheaho vhutshilo havho khomboni. Arali ra dzhiela fhasi yeneyo nyeletshedzo, ri vha ri tshi khou ḓivhea vhuimoni vhune ra nga ḓidzhenisa kha vhuyaḓa ho kalulaho nahone ri si tsha takalelwa nga Mudzimu.
10 Ri tshi tou fanyisa: Mme u ṱanzwa na u ambadza mutukana wawe u itela u mu lugisela tshiitea tsha ndeme. Onoyo mutukana u humbela mme awe arali a tshi nga ya a tambela nnḓa musi muṱa u sa athu ṱuwa, nahone vha tenda arali a tshi ḓo ita zwine vha ḓo mu vhudza zwone. Vha ri: “Ni songo ya nnḓa tsini na tivha. Arali na ḓi ḓodza matope, ni ḓo nnḓivha zwavhuḓi.” Naho zwo ralo, hu sa athu fhela tshifhinga tshilapfu, vha vhona mutukana a tshi khou pepelekela lumemeni lwa ḽeneḽo tivha. Fhedzi ha athu u ḓi ḓodza matope. Naho zwo ralo, u khou nyadza ndaela ya mme awe ya u sa ya tsini na ḽeneḽo tivha, nahone zwi tou vha khagala uri zwi ḓo bveledza khombo. (Mirero 22:15) Vhaaluwa vhane vha fanela u ṱhogomela vhukuma na vhone vha ita vhukhakhi vhu fanaho. Nga nḓila-ḓe?
11 Kha tshino tshifhinga tshine vhanzhi vho ḓidzhenisa kha “nyemulo dzi shonisaho dza u ṱangana nga dzimbeu,” ho thoma mabindu ane a khou ṱuṱuwedza zwa u ṱangana nga dzimbeu hu siho mulayoni. (Vha-Roma 1:26, 27) Zwifanyiso zwa u ṱangana nga dzimbeu zwo ḓala kha magazini, dzibugu, dzividio, na kha Internet. Vhane vha khetha u dzhenisa zwenezwo zwifanyiso mihumbuloni yavho a vha khou shavha vhupombwe. Vha khou vhu takalela, vha vhuimoni vhu re na khombo, nahone vha khou nyadza tsevho ya Bivhili. Nṱhani ha u tsireledza mbilu, vha khou i tshinya nga zwifanyiso zwine zwa nga vha dzhiela tshifhinga tshilapfu u zwi bvisa mihumbuloni yavho. (Mirero 6:27) Kha ri gude kha tsumbo ya Yobo a fulufhedzeaho, we a ita mulanga—thendelano—na maṱo awe, u itela uri a sa sedze zwine zwa ḓo mu linga uri a ite zwo khakheaho. (Yobo 31:1) Vhukuma, yeneyo ndi tsumbo ine ra fanela u i edzisa!
12. Vhakriste vha nga ‘shavha vhupombwe’ tshifhingani tsha u seisana nga nḓila-ḓe?
12 Ndi zwa ndeme vhukuma u ‘shavha vhupombwe’ tshifhingani tsha u seisana. Tshenetsho tshifhinga tshi fanela u vha tshi takadzaho na tshi re na tshilavhelelwa, fhedzi vhaṅwe vhaswa vha tshi tshinya nga u ḓifara luvhi. Nga u ya ha tshifhinga, vha ita uri hu sa vhe na mutheo wavhuḓi wa mbingano yavhuḓi—vhushaka ho thewaho kha lufuno lu si na tseḓa, u ḓilanga, na u thetshelesa Yehova Mudzimu. Vhaṅwe vhavhingani vha Vhakriste vho ḓidzhenisa kha vhuḓifari vhu songo kunaho tshifhingani tshavho tsha u seisana. Nga murahu ha musi vho no vhingana, wa musadzi o tenda uri luvalo lwawe lwo vha lu tshi mu rwa, nahone zwa ita uri a sa ḓiphine na nga ḓuvha ḽawe ḽa mbingano. O ri: “Ndo humbela tshifhinga tshinzhi u hangwelwa nga Yehova, fhedzi naho ho no fhela miṅwaha ya sumbe u bva zwenezwo, luvalo lwanga lu kha ḓi bvela phanḓa lu tshi nthwa.” Ndi zwa ndeme uri vhane vha ita zwenezwo zwivhi vha ṱoḓe thuso kha vhahulwane vha Vhakriste. (Yakobo 5:14, 15) Naho zwo ralo, Vhavhingani vhanzhi vha Vhakriste vha ita zwithu nga vhuṱali nahone vha iledza dzenedzo khombo tshifhingani tsha u seisana. (Mirero 22:3) Vha a vhea mikano musi zwi tshi ḓa kha u sumbedzana maḓipfele a lufuno. Vha a fhelekedzwa nga muṅwe muthu nahone vha iledza nga vhuronwane u vha vhe vhoṱhe fhethu hu re thungo.
13. Ndi ngani Mukriste a songo fanela u seisana na muthu ane a sa shumele Yehova?
13 Vhakriste vhane vha seisana na vhane vha sa shumele Yehova vha anzela u ṱangana na vhuleme vhuhulwane. Sa tsumbo, ni nga ḓiṱanganya hani na muthu ane a sa fune Yehova Mudzimu? Ndi zwa ndeme uri Vhakriste vha vhingane fhedzi na vhathu vhane vha funa Yehova na u ṱhonifha maitele awe a u kuna. Ipfi ḽa Mudzimu ḽi ri vhudza u ri: “Ni so ngo vha vho ḓi-kungelaho kha dzhogo i sili ya vha sa tendiho. U luga hu na vhuhura-ḓe na vhutshinyi? Kani tshedza na swiswi zwi a pfana?”—2 Vha-Korinta 6:14.
14, 15. (a) Ndi mavhonele afhio o khakheaho ane vhaṅwe vha vha nao malugana na zwine “vhupombwe” ha amba zwone? (b) “Vhupombwe” zwi katela mishumo ya mufuda-ḓe, nahone Vhakriste vha nga ‘shavha vhupombwe’ nga nḓila-ḓe?
14 Nḓivho na yone ndi ya ndeme. Ri nga si shavhe vhupombwe zwavhuḓi arali ri sa ḓivhi uri ndi mini zwa vhukuma. Kha shango ḽa ṋamusi, vhaṅwe vha na mihumbulo yo khakheaho nga ha zwine “vhupombwe” ha amba zwone. Vha humbula uri vha nga fusha nyemulo dzavho dza u ṱangana nga dzimbeu nga nnḓa ha mbingano arali vha iledza u ṱangana nga dzimbeu ha vhukuma. Na huṅwe fhethu hu ṱhonifheaho ha zwa ngalafho hune ha ṱoḓa u fhungudza tshivhalo tsha u vhifha muvhilini hune hu sa ṱoḓee kha vhaswa vha re miṅwahani ya vhufumi, ho ṱuṱuwedza vhaswa uri vha litshe maitele ane a ṱanganedzwa a zwa u ṱangana nga dzimbeu ane a si bveledze u vhifha muvhilini. Zwi ṱungufhadzaho ndi uri yeneyo nyeletshedzo i dzhiiwa yo khakhea. U iledza u vhifha muvhilini u songo vhingwa a zwi fani na u dzula wo kuna, nahone “vhupombwe” vhu ṱaluswa nga nḓila nnzhi.
15 Ipfi ḽa Lugerika ḽine ḽa ri por·neiʹa, ḽo ṱalutshedzelwaho nga uri “vhupombwe,” ḽi amba zwithu zwinzhi. Ḽi ambela kha vhushaka ha u ṱangana nga dzimbeu hune ha katela vhathu vha songo vhinganaho nahone ḽa dovha ḽa ambela kha u shumiswa luvhi ha zwiraḓo zwa u ṱangana nga dzimbeu. Por·neiʹa zwi katela mishumo i fanaho na u dzhenisa tshiraḓo tsha u ṱangana nga dzimbeu mulomoni, na nga murahu, na u swoṱa zwiraḓo zwa mbeu zwa muṅwe—vhuḓifari vhune kanzhi ha itwa nga vhane vha rengisa mivhili. Vhathu vhane vha humbula uri yeneyi mishumo a si “vhupombwe” vha khou ḓifhura nahone vha a wela zwikwekweni zwa Sathane. (2 Timotheo 2:26) Zwiṅwe hafhu, u dzula wo kuna zwi amba zwi fhiraho u sokou iledza nyito naho ifhio ya u ita uri hu vhe na vhupombwe. U itela u ‘shavha vhupombwe,’ ri fanela u iledza mifuda yoṱhe i songo kunaho ya u ṱangana nga dzimbeu na vhuyaḓa ha vhuḓifari zwine zwa nga livhisa kha tshivhi tshihulwane tsha por·neiʹa. (Vha-Efesa 4:19) Nga u ita nga yeneyo nḓila ri dzula ro kuna.
Iledzani Khombo Dza U Tamba Nga Lufuno
16. Misumbedzo ya lufuno yo tea kha tshiimo tshifhio, nahone zwo sumbedzwa nga tsumbo ifhio ya Maṅwalo?
16 Arali ri tshi ṱoḓa u dzula ro kuna, iṅwe khombo ine ra fanela u i ṱhogomela ndi ya u tamba nga lufuno. Vhaṅwe vha nga amba uri u tamba nga lufuno a zwo ngo khakhea, ndi u ḓimvumvusa hune hu sa vhaise vhukati ha vhathu vha mbeu dzo fhambanaho. Vhukuma, hu na tshifhinga na fhethu zwa u sumbedzana maḓipfele a lufuno. Isaka na Rebeka vho vhoniwa vha tshi “khou vhanḓana,” zwi tshi tou vha khagala kha vhathu vho lavhelesaho uri vho vha vhe si khaladzi na khaladzi. (Genesi 26:7-9, vhambedzani NW.) Naho zwo ralo, vho vha vhe munna na musadzi. Misumbedzo ya lufuno yo vha yo tea khavho. U tamba nga lufuno zwo fhambana na zwenezwo.
17. U tamba nga lufuno ndi mini, nahone honoho vhuleme vhu nga iledzwa hani?
17 U tamba nga lufuno zwi nga ṱaluswa nga heyi nḓila: ndi u tamba nga maḓipfele a muṅwe muthu ni si na muhumbulo wa u vhinga. Vhathu ndi zwivhumbiwa zwo serekanaho, ngauralo a zwi timatimisi uri hu na nḓila nnzhi dza u tamba nga lufuno, dziṅwe dzadzo a dzi vhonali. (Mirero 30:18, 19) Naho zwo ralo, milayo i konḓaho i nga si piringulule zwenezwo. Tshiṅwe tshithu tshi fhiraho milayo tshi a ṱoḓea—u ḓiṱolisisa nga u fulufhedzea na u shumisa maitele a Bivhili nga vhuronwane.
18. Ndi mini zwine zwa ṱuṱuwedza vhaṅwe uri vha tambe nga lufuno, nahone ndi ngani u tamba nga lufuno zwi tshi huvhadza?
18 Arali ri tshi fulufhedzea, zwi vhonala i ngoho kha vhunzhi hashu uri musi ri tshi ṱhogomela uri muṅwe muthu wa mbeu yo fhambanaho na yashu u a ri funa, ri pfa ri songo farea zwavhuḓi. Zwenezwo zwo ḓowelea. Fhedzi naa ri a tamba nga lufuno u itela u vusa ḽeneḽo dzangalelo—u sokou engedza u ḓifulufhela kana u vusa eneo maḓipfele kha muṅwe? Arali zwo ralo, naa ro no vhuya ra ṱhogomela vhuṱungu vhune ra nga vhu bveledza? Sa tsumbo, Mirero 13:12 i ri: “Tshililelwa-tshilindedzi ndi malwadza-mbilu; tshiṱuvhiwa tshó swika, ndi muri wa vhutshilo.” Arali ra tamba nga khole nga lufuno na muṅwe muthu, ri vha ri sa ḓivhi nḓila ine onoyo muthu a kwamea ngayo. Wa tshinnani kana wa tshisadzini a nga vha na zwilavhelelwa nga ha u seisana nahone mafheleloni a vha na zwa mbingano. U sa ḓadzea ha zwenezwo zwithu zwi nga tsikeledza vhukuma. (Mirero 18:14) U tamba nga maḓipfele a muṅwe muthu nga khole ndi tshiṱuhu.
19. U tamba nga lufuno zwi nga vhea hani mbingano dza Vhakriste khomboni?
19 Ndi zwa ndeme uri vhavhingani vha ṱhogomele uri vha si tambe nga lufuno. U sumbedza dzangalelo ḽa lufuno kha muthu o vhingwaho—kana uri muthu o vhingwaho a sumbedze ḽeneḽo dzangalelo kha muṅwe muthu a siho mbinganoni zwo khakhea. Zwi ṱungufhadzaho ndi uri vhaṅwe Vhakriste vha na mavhonele o khakheaho a uri zwo tea u ṱahulela dzangalelo ḽa lufuno kha vhaṅwe vhathu vha mbeu yo fhambanaho na yavho nṱhani ha vhafarisi vhavho. Vhaṅwe vha sumbedza eneo maḓipfele kha vhathu vhane vha vha dzhia vhe “khonani” dzavho, na u vha vhudza mafhungo a tshiphiri ane vha si a ambe na vhafarisi vhavho. Nga ṅwambo wa zwenezwo, zwa bveledza maḓipfele a lufuno ane a nga tshinya mbingano. Ndi zwavhuḓi uri vhavhingani vha Vhakriste vha humbule tsevho ya Yesu ya vhuṱali nga ha vhupombwe—vhune ha thoma mbiluni. (Mateo 5:28) Nga zwenezwo, kha ri tsireledze mbilu nahone ri iledze zwiimo zwine zwi nga ita uri hu vhe na dzenedzo mvelelo dzi huvhadzaho.
20. Ri fanela u ḓiimisela u dzhia hani u kuna hashu?
20 Vhukuma, a zwi leluwi u dzula wo kuna kha ḽino shango ḽa ṋamusi ḽi songo kunaho. Naho zwo ralo, humbulani uri zwi a leluwa vhukuma uri ni dzule no kuna u fhirisa u dovha u ita uri ni kune. Vhukuma, ‘u hangwela ha Yehova ndi huhulu’ nahone u a kona u kunakisa vhane vha rembuluwa zwa vhukuma kha zwivhi zwavho. (Yesaya 55:7) Naho zwo ralo, Yehova ha tsireledzi vhane vha ḓifara luvhi kha mvelelo dza nyito dzavho. Dzenedzo mvelelo dzi nga fhedza miṅwaha minzhi, kana vhutshilo hoṱhe. (2 Samuele 12:9-12) Itani uri ni dzule no kuna nga nḓila dzoṱhe nga u linda mbilu yaṋu. Dzhiani u kuna haṋu phanḓa ha Yehova Mudzimu sa lupfumo lwa ndeme—nahone ni songo vhuya na zwi litsha!
Ni Ḓo Fhindula Hani?
• U kuna ndi mini, nahone ndi ngani hu ha ndeme?
• Ri nga tsireledza hani mbilu yashu?
• Ndi mini zwine zwa katelwa kha u shavha vhupombwe?
• Ndi ngani ri tshi fanela u iledza u tamba nga lufuno?
[Mbudziso Dza Pfunzo]
[Tshifanyiso kha siaṱari 11]
Goloi i nga vha na khombo arali ya sa reilwa zwavhuḓi
[Zwifanyiso kha siaṱari 12]
Hu nga bvelela mini arali ra nyadza tsevho?
[Tshifanyiso kha siaṱari 13]
U seisana ho kunaho ndi havhuḓi nahone hu hulisa Mudzimu