Bugu Ya Vhuvhili Ya Samuele 12:1-31
12 Yehova a ruma Nathani+ kha Davida. A ya khae+ a ri: “Ho vha hu na vhanna vhavhili muḓini muthihi, muṅwe o vha e mupfumi, muṅwe e mushai.
2 Mupfumi o vha e na sambi ḽihulu ḽa nngu na ḽa kholomo;+
3 fhedzi mushai o vha a tshi tou vha na ngwana ya tsadzi fhedzi, ye a tou i renga.+ A i fuwa, a i alusa na vhana vhawe. Yo vha i tshi ḽa zwiḽiwa zwiṱuku-ṱuku zwe a vha e nazwo, i tshi nwa nga tshinwelo tshawe, i tshi eḓela o i kuvhatedza. Yo vha i tshi tou nga ṅwana wawe wa musidzana.
4 Nga murahu, munna wa mupfumi a dalelwa nga mueni, fhedzi a si dzhie iṅwe ya nngu dzawe kana kholomo u itela u ṱhavhela mueni wawe we a mu dalela. Nṱhani hazwo, a dzhia ngwana ya munna wa mushai a i ṱhavhela munna we a mu dalela.”+
5 Davida a sinyutshela onoyo munna nga maanḓa, a amba na Nathani a ri: “Ndi ana nga Yehova a tshilaho,+ munna we a ita zwenezwo u tea u fa!
6 Ngwana yeneyo u fanela u i lifha nga ngwana nṋa,+ nge a ita zwenezwo a sa pfeli vhuṱungu.”
7 Ngauralo, Nathani a amba na Davida a ri: “Onoyo munna ndi iwe! Yehova Mudzimu wa Isiraele u ri: ‘Ndo u ḓodza uri u vhe khosi ya Isiraele,+ nda u tshidza zwanḓani zwa Saulo.+
8 Ndo u ṋea nnḓu ya muṋe wau+ na vhafumakadzi vhawe,+ nda u ṋea na nnḓu ya Isiraele na ya Yuda.+ Arali zwenezwo zwo vha zwi songo eḓana, ndo vha ndi tshi ḓo vha ndo u engedza nga zwiṅwe.+
9 Ndi ngani wo nyadza zwe Yehova a amba nga u ita zwi sa mu takadzi? Wo vhulayisa Uria wa Muhethe nga banga!+ Wo dzhia mufumakadzi wawe wa mu ita wau+ musi wo no vhulayisa Uria nga banga ḽa Vhaamoni.+
10 Zwino banga a ḽi tsha ḓo ṱuwa nḓuni yau+ ngauri wo nnyadza, wo dzhia mufumakadzi wa Uria wa Muhethe wa mu ita wau.’
11 Yehova u ri: ‘Ndi ḓo ita uri muṅwe wa nḓuni yau a u ḓisele maṱungu;+ ndi ḓo dzhia vhafumakadzi vhau u tshi zwi vhona nda vha ṋea muṅwe munna,*+ onoyo munna u ḓo lala navho hu masiari tshivhangalala.+
12 Naho wo ita zwithu tshiphirini,+ nṋe ndi ḓo zwi ita hu masiari tshivhangalala Vhaisiraele vhoṱhe vha tshi zwi vhona.’”
13 Davida a amba na Nathani a ri: “Ndo khakhela Yehova.”+ Nathani a amba na Davida a ri: “Yehova o u hangwela tshivhi tshau.+ A u nga ḓo fa.+
14 Naho zwo ralo, nga nṱhani ha uri wo nyadza Yehova nga zwe wa ita, ṅwana ane wa kha ḓi bva u bebelwa ene u ḓo fa.”
15 Nathani a ṱuwa a ya nḓuni yawe.
Yehova a ita uri ṅwana we mufumakadzi wa Uria a bebela Davida a lwale.
16 Davida a humbela kha Mudzimu wa ngoho uri onoyo mutukana a fhole. Davida a ḓidzima zwiḽiwa, a dzhena nḓuni a fhedza vhusiku o eḓela fhasi.+
17 Vhahulwane vha nḓuni yawe vha ima tsini nae, vha lingedza u mu vusa henefho fhasi, fhedzi a hana a si ḽe navho.
18 Nga ḓuvha ḽa vhusumbe ṅwana a fa, fhedzi vhashumeli vha Davida vha ofha u mu vhudza uri ṅwana o fa. Vha ri: “Ro amba nae musi ṅwana a tshi kha ḓi tshila, fhedzi ho ngo ri thetshelesa. Ri nga mu vhudza hani uri: ‘Ṅwana o fa’? A nga ita zwiṅwe zwithu zwi ofhisaho.”
19 Musi Davida a tshi vhona vhashumeli vhawe vha tshi khou hevhedzana, a zwi ḓivha uri ṅwana o fa. Ngauralo, Davida a vhudzisa vhashumeli vhawe a ri: “Naa ṅwana o fa?” Vha fhindula vha ri: “O fa.”
20 Davida a vuwa henefho fhasi. A ṱamba a ḓola mapfura,+ a ambara zwiṅwe zwiambaro, a ya nḓuni+ ya Yehova a rabela. Nga murahu a ya nḓuni yawe a humbela uri a ḓiselwe zwiḽiwa, a ḽa.
21 Vhashumeli vhawe vha mu vhudzisa vha ri: “Ndi ngani u tshi ita nga u rali? Musi ṅwana a tshi kha ḓi tshila, wo ḓidzima zwiḽiwa, wa ṱwa u tshi khou lila; fhedzi wo vuwa wa ḽa zwiḽiwa musi ṅwana a tshi tou fa.”
22 Ene a ri: “Musi ṅwana a tshi kha ḓi tshila ndo ḓidzima zwiḽiwa+ na u lila, ngauri ndo humbula uri: ‘Khamusi Yehova u ḓo ntsumbedza vhuthu a litsha ṅwana a tshila?’+
23 Samusi zwino ṅwana o fa, ndi ngani ndi tshi fanela u ḓidzima zwiḽiwa? Naa ndi nga kona u mu vusa?+ Ndi ḓo ya hune a vha hone,+ fhedzi ene a nga si tsha vhuya.”+
24 Davida a khuthadza Batseba mufumakadzi wawe.+ A lala nae. Nga u ya ha tshifhinga a beba ṅwana wa mutukana, a mu ira dzina ḽa Salomo.*+ Yehova o vha a tshi mu funa,+
25 a rumela mulaedza a tshi shumisa muporofita Nathani+ uri a irwe dzina ḽa Yedidia,* a tshi itela Yehova.
26 Yoaba a bvela phanḓa a tshi lwa na muḓi wa Raba+ wa Vhaamoni,+ a thuba muḓi wa musanda.*+
27 Ngauralo, Yoaba a ruma vhaḓinḓa ha Davida vha ri: “Ndo lwa na muḓi wa Raba,+ ndo thuba muḓi u re na maḓi.
28 Zwino kuvhanganya mmbi yoṱhe u tange wonoyo muḓi u u thube. Wa sa ita nga u ralo, ndi ḓo u thuba wa vha wanga.”*
29 Davida a kuvhanganya maswole awe oṱhe a ya Raba, a lwa nawo a u kunda.
30 A bvula khare ye ya vha i ṱhohoni ya Malikamu.* Tshileme tshayo tsho vha tshi tshi lingana na talente* ya musuku, khathihi na matombo a mutengo muhulu, ya vhewa kha ṱhoho ya Davida. A dovha a thuba na thundu nnzhi+ kha wonoyo muḓi.+
31 A bvisa vhathu vha re henefho muḓini a vha shumisa u vhaḓa matombo nga zwishumiswa zwa tsimbi zwa vhuhali na nga mbaḓo dza tsimbi na u foroma zwidina. Ndi zwe a ita miḓini yoṱhe ya Vhaamoni. Mafheleloni Davida na maswole awe oṱhe vha vhuyelela Yerusalema.
Ṱhaluso dzi re magumoni a siaṱari
^ Kana “muṅwe muthu.”
^ Ḽi bva kha ipfi ḽa Tshihevheru ḽine ḽa amba “Mulalo.”
^ Zwine zwa amba uri “Mufunwa Wa Yehova.”
^ Kana “muḓi wa muvhuso.”
^ Thevhedz., “wa vhidzwa nga dzina ḽanga.”
^ Khamusi ndi mudzimu wa tshifanyiso wa Vhaamoni, huṅwe u vhidzwa Molexo kana Milikomo.
^ Talente nthihi i lingana na khilogramu dza 34,2. Sedzani Ṱhume. B14.
