Ukeri 9:1-23
9 Jihova ta ota kẹ Mosis vwẹ aton ri Sainai vwẹ emeranvwe rẹsosuọ rẹ ukpe rivẹ rẹ ayen vwo vrẹn nẹ otọ rẹ Ijipt nu, ọ da ta:
2 “E jẹ ihwo rẹ Izrẹl muegbe rẹ izobo rẹ Ọwanvrẹ na vwẹ ọke re bruphiyọ kẹ.
3 Vwẹ ẹdẹ 14 rẹ emeranvwe nana, vwẹ ovwọnvwọn,* ovwan mi muegbe rọyen vwẹ ọke re bruphiyọ kẹ. Ovwan mi muegbe rọyen vwo nene iji rọyen eje kugbe obo re ruo wan eje.”
4 Ọtiọyena Mosis da vuẹ ihwo rẹ Izrẹl nẹ ayen muegbe rẹ izobo rẹ Ọwanvrẹ na.
5 Ayen de muegbe rẹ izobo rẹ Ọwanvrẹ na vwẹ emeranvwe rẹsosuọ na, vwẹ ẹdẹ 14 rẹ emeranvwe na, vwẹ ovwọnvwọn* vwẹ aton ri Sainai. Vwo nene iji na eje rẹ Jihova vwọ kẹ Mosis na, ọtiọyen ihwo rẹ Izrẹl ruru.
6 Asaọkiephana o vwo eshare evo re rhe dia ẹdia ri jẹfuọn fikirẹ orivwin* rẹ ayen djobọte, ọtiọyena ayen rhe se muegbe rẹ izobo rẹ Ọwanvrẹ na vwẹ ẹdẹ yenaa. Eshare yena da vwẹ oma rayen phia vwẹ obaro ri Mosis vẹ Erọn vwẹ ẹdẹ yena
7 ayen da ta kẹ: “Avwanre fonroo, fikirẹ orivwin* rẹ avwanre djobọte. Diesorọ avwanre vwo jẹ izobo na ẹvwọkpahotọ kẹ Jihova vwẹ ọke re bruphiyọ kẹ vwẹ ohri rẹ ihwo rẹ Izrẹl?”
8 Ọtiọyena Mosis da ta kẹ ayen: “Ovwan hẹrhẹ vwẹ etiyin rere mi nyo oborẹ Jihova che ji iji rọyen kpahen ovwan.”
9 Jihova da ta kẹ Mosis:
10 “Ta kẹ ihwo rẹ Izrẹl, ‘Ọ da tobọ dianẹ ohwo ọvo vwẹ usun rẹ ovwan yẹrẹ uvwiẹ rẹ ovwan re cha vwẹ obaro na rhe dia ẹdia ri jẹfuọn fikirẹ orivwin ro djobọte* yẹrẹ ko kpo asan oshesheri, o ji che muegbe rẹ izobo rẹ Ọwanvrẹ na kẹ Jihova.
11 Ayen mi muegbe rọyen vwẹ emeranvwe rivẹ, vwẹ ẹdẹ 14 vwẹ ovwọnvwọn.* Ayen me riọ vẹ ibrẹdi ro jephuo kugbe ẹbe re yara.
12 Ayen yanjẹ ẹbẹre vuọvo vwo re te urhiọkee, ayen ji vwirhin ubeku rọyen vuọvoo. Ayen mi muegbe rọyen vwo nene iji na eje ri shekpahen Ọwanvrẹ na.
13 Ẹkẹvuọvo ọ da dianẹ ohwo fonro, o ji kpo asaan, dedena o muegbe rẹ izobo rẹ Ọwanvrẹ naa, ke bru* ohwo* yena nẹ ohri rẹ ihwo rọyen, kidie ọ vwẹ izobo ri Jihova vwọ kpahotọ vwẹ ọke re bruphiyọ kẹẹ. Ohwo yena cha rioja fikirẹ umwemwu rọyen.
14 “‘Ọ da dianẹ ọrhorha nene ovwan dia, e jẹ o ji muegbe rẹ izobo rẹ Ọwanvrẹ na kẹ Jihova. E jẹ o ruo vwo nene iji rẹ Ọwanvrẹ na kugbe obo re ruo wan. Iji ọvuọvo yen cha dia vwọ kẹ ovwan, te ọrhorha te ọmotọ.’”
15 Asaọkiephana vwẹ ẹdẹ ra vwẹ itabanako na vwo vi na, evwru na de rhurhu itabanako na, utughẹ rẹ Oseri na, ẹkẹvuọvo vwẹ ovwọnvwọn, obo re họhọ erhanre da daji enu rẹ itabanako na re te urhiọke.
16 Ọtiọyen kọyen ọ dia kọke kọke: Evwru mi rhurho vwẹ aruphẹn, obo re họhọ erhanre vwẹ ason.
17 Kọke kọke rẹ evwru na da kparoma nẹ utughẹ na, ihwo rẹ Izrẹl mi mu oyan phiyọ nẹ etiyin kpakpata, asan rẹ evwru na daji, etiyin kọyen ihwo rẹ Izrẹl wonphiyọ.*
18 Vwo nene iji ri Jihova ihwo rẹ Izrẹl mi mu oyan phiyọ, vwo nene iji ri Jihova ayen mi won. Ayen me daji asan rẹ ayen wonphiyọ vwẹ uchọke rẹ evwru na daji enu rẹ itabanako na kri te.
19 Evwru na da daji enu rẹ itabanako na vwẹ ẹdẹ buebun, ihwo rẹ Izrẹl mi nyupho ri Jihova, ayen me daji asan rẹ ayen wonphiyọ na.
20 Ọke evo evwru na me daji enu rẹ itabanako na vwẹ ẹdẹ evo. Vwo nene iji ri Jihova, ayen me daji asan rẹ ayen wonphiyọ, vwo nene iji ri Jihova, ayen mi mu oyan phiyọ.
21 Ọke evo evwru na me dajẹ enu rọyen vwo nẹ ovwọnvwọn re te urhiọke ọvo, ọke rẹ evwru na da kparoma vwẹ urhiọke, ayen mi mu oyan phiyọ. Owenẹ ọ dia aruphẹn yẹrẹ ason yen evwru na vwọ kparoma, ayen mi mu oyan phiyọ.
22 Owenẹ ọ dia ẹdẹ ivẹ, emeranvwe ọvo, yẹrẹ ọke ro gron vrẹ ọtiọyen, uchọke rẹ evwru na daji enu rẹ itabanako na kri te, ihwo rẹ Izrẹl me daji asan rẹ ayen wonphiyọ na, ayen che vrẹẹn. Ẹkẹvuọvo ọke rọ da kparoma, ayen mi mu oyan phiyọ.
23 Vwo nene iji ri Jihova ayen mi won, vwo nene iji ri Jihova ayen mi mu oyan phiyọ. Ayen sẹro rẹ ive rẹ ayen ve kẹ Jihova vwo nene iji ri Jihova womarẹ Mosis.
Eta rehẹ obotọ na
^ Vwẹ Hibru, “vwẹ uvwre rẹ ovwọnvwọn ivẹ na.”
^ Vwẹ Hibru, “vwẹ uvwre rẹ ovwọnvwọn ivẹ na.”
^ Yẹrẹ “fikirẹ erhi rẹ ohworakpọ.”
^ Yẹrẹ “fikirẹ erhi rẹ ohworakpọ.”
^ Yẹrẹ “fikirẹ erhi.”
^ Vwẹ Hibru, “vwẹ uvwre rẹ ovwọnvwọn ivẹ na.”
^ Yẹrẹ “ke hwe.”
^ Yẹrẹ “erhi.”
^ Yẹrẹ “Izrẹl mu erhọn phiyọ.”
