Ukeri 17:1-13
-
Ọkpọ rẹ Erọn ro kpipho na ọyen oka (1-13)
17 Asaọkiephana Jihova da ta kẹ Mosis:
2 “Vuẹ ihwo rẹ Izrẹl nẹ ayen reyọ ọkpọ ọvo vwọ kẹ wẹ vwo nẹ uwevwin rẹ ọsẹ rayen ọvuọvo rhe, reyọ ekpọ na mie isun rẹ uwevwin rẹ ọsẹ rayen ọvuọvo, ekpọ na eje me dia 12. Wo mi si odẹ rẹ ohwo ọvuọvo phiyọ ọkpọ rọyen.
3 Wo mi si odẹ rẹ Erọn phiyọ ọkpọ ri Livae kidie ọkpọ ọvo yen herọ vwọ kẹ ọgbuyovwin rẹ uwevwin rẹ ọsẹ ọvuọvo.
4 Ghwẹ ekpọ na phiyọ utughẹ ra da vwoma na, vwẹ obaro rẹ Oseri na, asan re me da vwomaphia kẹ wẹ kọke kọke na.
5 Ọkpọ rẹ ohwo re me jẹre cha kpipho, ki mi che phioba phiyọ iguegun rẹ ihwo rẹ Izrẹl guẹn kpahan ovwẹ na, kirobo rẹ ayen ji gun uwe na.”
6 Ọtiọyena Mosis da ta ota kẹ ihwo rẹ Izrẹl na, isun rayen eje da vwẹ ekpọ vwọ kẹ—ọkpọ ọvo vwọ kẹ osun rẹ uwevwin rẹ ọsẹ rọyen, ekpọ 12—ọkpọ rẹ Erọn jehẹ usun rẹ ekpọ rayen na.
7 Mosis da ghwẹ ekpọ na phiyọ obaro ri Jihova vwẹ utughẹ rẹ Oseri na.
8 Vwẹ ẹdẹ rọ vwọ kpahọn, ọke rẹ Mosis vwọ ro utughẹ rẹ Oseri na, nighere! ọkpọ rẹ Erọn rẹ uwevwin ri Livae kpipho re, ọ ghwẹ ipho phiyọ, ọ ghwẹ idodo phiyọ, ọ je mọ emamọ rẹ almọnd re vware.
9 Mosis da reyọ ekpọ na eje phia nẹ obaro ri Jihova vwo rhe ihwo rẹ Izrẹl eje. Ayen de ni ayen, ayen ohwo ọvuọvo da reyọ ọkpọ rọyen.
10 Jihova da ta kẹ Mosis: “Reyọ ọkpọ rẹ Erọn rhivwin kpo obaro rẹ Oseri na kerẹ orọnvwọn rọ cha dia oka vwọ kẹ emọ ri gbe vwọsua na, rere iguegun rẹ ayen guẹn kpahan ovwẹ na vwọ dobọji, ayen vwo jeghwo.”
11 Ugege yena Mosis de ru kirobo rẹ Jihova ji iji rọyen kẹ. Ọtiọyen o ghini ruo.
12 Ọtiọyena ihwo rẹ Izrẹl da ta kẹ Mosis: “Asaọkiephana avwanre che ghwu, aphro herọọ, avwanre cha ghwọrọ, avwanre eje cha ghwọrọ!
13 Kohwo kohwo rọ tobọ sikẹrẹ itabanako ri Jihova na che ghwu! Kẹ ọtiọyen avwanre che rhe ghwẹ?”
