Ukeri 5:1-31
5 Jihova da rhoma ta kẹ Mosis:
2 “Ta kẹ ihwo rẹ Izrẹl nẹ ayen si kohwo kohwo rọ muọga rẹ oti kugbe kohwo kohwo rẹ orọnvwọn hwẹ nẹ oma rọyen cha* kugbe kohwo kohwo rọhẹ ẹdia ri jẹfuọn fikirẹ ohwo* ro ghwuru vwo nẹ asan rẹ ayen wonphiyọ* na.
3 Owenẹ ọ dia ọshare yẹrẹ aye, ovwan si ayen no. Ovwan reyọ ayen kpo otafe rẹ asan rẹ ovwan wonphiyọ na, rere ayen vwo jẹ asan rẹ ihwo re me dia ohri rayen wonphiyọ na egbe ẹgua.”
4 Ọtiọyena ihwo rẹ Izrẹl de ru ọtiọyen, ayen da reyọ ayen kpo otafe rẹ asan rẹ ayen wonphiyọ na. Kirobo rẹ Jihova vuẹ Mosis, ọtiọyen ihwo rẹ Izrẹl ruru.
5 Jihova da rhoma ta kẹ Mosis:
6 “Vuẹ ihwo rẹ Izrẹl nẹ, ‘Ọ da dianẹ ọshare yẹrẹ aye ru umwemwu rẹ ihwo ruẹ, o de vwobọ vwẹ uruemu ri jẹfuọn vwọso Jihova, ohwo* yena riabe.
7 Ọ* me fan umwemwu ro* ruru na, ọ me hwosa rọ vẹ abe rọyen na gbe dia abavo rhivwin vọnvọn, ọ me je vwẹ ẹkẹn ọvo rẹ ẹkẹn iyorin rọyen vwọ ba; ọ me vwọ kẹ ohwo ro gbeku na.
8 Ẹkẹvuọvo ọ da dianẹ ohwo re ru chọ na rhe vwo oniọvo rọ kẹrerẹ rọ cha reyọ obo ra hwa rhivwin naa, o mi vwo rhivwin bru Jihova, ọ me dia ọ rẹ orherẹn na, jokparẹ egbon rẹ arhuẹrẹ na ro che vwo ru arhuẹrẹ vwọ kẹ.
9 “‘Kutoro kutoro ọfuanfon ejobi rẹ ihwo rẹ Izrẹl vwọ kpahotọ kẹ orherẹn na me dia ọrọyen.
10 Erọnvwọn efuanfon rẹ ohwo ọvuọvo vwori me dia ọrọyen. Kemu kemu rẹ ohwo ọvuọvo vwọ kẹ orherẹn na me dia ọ rẹ ọrherẹn na.’”
11 Jihova da ta kẹ Mosis:
12 “Ta ota kẹ ihwo rẹ Izrẹl rere wọ vuẹ ayen nẹ, ‘Ọnana yen oborẹ ovwan che ru ọ da dianẹ aye ru umwemwu, o de jẹ evun ẹfuọn kẹ ọshare rọyen
13 ọshare ọfa de nene vwerhẹn jẹ ọshare rọyen riẹnree, a je rhe riẹn kpahọọn, o gbe oma rọyen ẹgua, ẹkẹvuọvo oseri vuọvo herọ vwọsuọọ, e ji rhi muoo:
14 Owene ọ dianẹ ọshare na rioma, o ji vwo ẹwẹn ivivẹ kpahen evun-ẹfuọn rẹ aye rọyen jẹ aye na gbe oma rọyen ẹgua, yẹrẹ ọ rioma o ji vwo ẹwẹn ivivẹ kpahen evun-ẹfuọn rẹ aye rọyen jẹ aye na gbe oma rọyen ẹguaa,
15 ọshare na me reyọ aye rọyen vwo rhe orherẹn na, ọ vẹ izobo re che ze fiki rọyen, ẹkẹn ọvo rẹ ẹkẹn ihwe rẹ ifah* rẹ iflawa rẹ ibali. O ku evwri yẹrẹ ifrankisẹnsi phiyọọ, kidie ọyen izobo rẹ eka rẹ omaẹriọ, izobo rẹ eka rọ nẹrhẹ a karophiyọ abe.
16 “‘Orherẹn na me reyọ aye na rhe, ọ me nẹrhẹ o mudia obaro ri Jihova.
17 Orherẹn na mi ku ame ọfuanfon phiyọ ochẹ, orherẹn na me ghwẹ ekpẹn evo vwo nẹ otọ rẹ utuwevwin rẹ itabanako na, o mi tue phiyọ ame na.
18 Orherẹn na me nẹrhẹ aye na mudia obaro ri Jihova, o mi rhie ẹton rẹ aye na phiyọ, o mi phi izobo rẹ eka rẹ ẹkarophiyọ na phiyọ ẹhẹrhabọ rẹ aye na, kọyen izobo rẹ eka rẹ omaẹriọ na, orherẹn na mi mu ame rọ yara rọ ghwa ekan cha na.
19 “‘Orherẹn na me nẹrhẹ aye na duvwun iyorin, ọ me vuẹ: “Ọ da dianẹ ọshare ọfa nene uwe vwerhẹẹn ru wọ vwọ hẹ otọ rẹ usuon rẹ ọshare wẹn na, wo ji ru umwemwu ji gbe oma wẹn ẹguaa, ku wọ sa vrabọ rẹ oborẹ ame nana rọ yara rọ sua ekan na sa so.
20 Ẹkẹvuọvo ọ da dianẹ wo ru umwemwu ru wọ vwọ hẹ otọ rẹ usuon rẹ ọshare wẹn na, wo de gbe oma wẹn ẹgua, wo de ji nene ọshare ọfa vwerhẹn vwọ vrẹ ọshare wẹn na—”
21 Orherẹn na me nẹrhẹ aye na duvwun iyorin ro churobọ si ekan, orherẹn na me ta kẹ aye na: “E jẹ Jihova nẹrhẹ wọ dia udje rẹ ekan kugbe iyorin eduvwon vwẹ ohri rẹ ihwo wẹn, rẹ Jihova cha vwọ nẹrhẹ ekpoghowọ* wẹn she* je nẹrhẹ evun wẹn vwọ.
22 Ame nana rọ sua ekan na cha ro ivun wẹn ọ me nẹrhẹ evun wẹn vwọ je nẹrhẹ ekpoghowọ* wẹn she.”* Aye na me ta: “Isẹ! Isẹ!”*
23 “‘Ọtiọyena orherẹn na mi si ekan nana phiyọ ọbe, ọ me hworhẹ ayen phiyọ ame rọ yara na.
24 Ọ me nẹrhẹ aye na da ame rọ yara rọ sua ekan na, ame rọ sua ekan na me ro oma rọyen, ọ me so ọmiaovwẹ kẹ.
25 Orherẹn na me reyọ izobo rẹ eka rẹ omaẹriọ na vwo nẹ obọ rẹ aye na, o mi djuo kpuko kparo vwẹ obaro ri Jihova, o mi muo kẹrẹ agbada na.
26 Orherẹn na me ghwẹ abọ rọyen vọn vẹ izobo rẹ eka na kerẹ ẹkẹn rẹ ẹkarophiyọ, ọ me nẹrhẹ o bru ivwirhi vwẹ agbada na, o de ru ọyena nu, ọ me nẹrhẹ aye na da ame na.
27 Ọke rọ da nẹrhẹ ọ da ame na nu, ọ da dianẹ o gbe oma rọyen ẹgua ji jẹ evun ẹfuọn kẹ ọshare rọyen, ame rọ sua ekan na me ro oma rọyen, ọ me so ọmiaovwẹ vwọ kẹ, evun rọyen kọ cha vwọ, ekpoghowọ* rọyen ko che she,* aye na me rhe dia udje rẹ ekan vwẹ ohri rẹ ihwo rọyen.
28 Ẹkẹvuọvo ọ da dianẹ aye na gbe oma rọyen ẹguaa, ọ je fon, kọ cha vrabọ rẹ oja ọtiọyena, kọ sa mrevun ji vwiẹ emọ.
29 “‘Ọnana yen urhi ro shekpahen omaẹriọ ọke rẹ aye de ru umwemwu ji gbe oma rọyen ẹgua rọ vwọ hẹ otọ rẹ usuon rẹ ọshare rọyen,
30 yẹrẹ vwẹ ẹdia rẹ ọshare da rioma ji vwo ẹwẹn ivivẹ sẹ aye rọyen fuevun; ọ me nẹrhẹ aye rọyen mudia obaro ri Jihova, orherẹn na mi ru erọnvwọn nana eje rẹ urhi na tare na.
31 Ọshare na kọ cha vrabọ rẹ abe, ẹkẹvuọvo aye rọyen cha rioja fikirẹ abe rọyen.’”
Eta rehẹ obotọ na
^ Ota nana shekpahen ọshare rẹ ame oma rọyen hwẹ fikirẹ ọga yẹrẹ aye rẹ ọbara rọyen hwẹ jẹ ọ dia ọ mrẹ ọke rọyeen.
^ Vwẹ Hibru, “fikirẹ erhi.” Ni Eta re Vwomaphia.
^ Yẹrẹ “ayen mu erhọn phiyọ.”
^ Yẹrẹ “erhi.”
^ Yẹrẹ “Ayen.”
^ Yẹrẹ “rẹ ayen.”
^ Ẹkẹn ọvo rẹ ẹkẹn ihwe rẹ ifah vẹ Ilita 2.2 abavo. Ni Apẹndis B14.
^ O muẹro nẹ ọ ta ota kpahan oma rẹ aye vẹ uwevwiẹ rọyen.
^ Yẹrẹ “ghwọrọ kufia.” Ọnana se mudiaphiyọ e vwo jẹ e se vwiẹ.
^ O muẹro nẹ ọ ta ota kpahan oma rẹ aye vẹ uwevwiẹ rọyen.
^ Yẹrẹ “ghwọrọ kufia.” Ọnana se mudiaphiyọ e vwo jẹ e se vwiẹ.
^ Yẹrẹ “E jẹ ọ dia ọtiọyen! E jẹ ọ dia ọtiọyen!”
^ O muẹro nẹ ọ ta ota kpahan oma rẹ aye vẹ uwevwiẹ rọyen.
^ Yẹrẹ “ghwọrọ kufia.” Ọnana se mudiaphiyọ e vwo jẹ e se vwiẹ.
