Ukeri 13:1-33
13 Asaọkiephana Jihova da rhoma ta ota kẹ Mosis, ọ da ta:
2 “Ji eshare yanran ra bẹbẹ ni otọ ri Kenan re me cha vwọ kẹ ihwo rẹ Izrẹl na. Wo mi ji ọshare ọvuọvo vwo nẹ uvwiẹ rẹ esẹ rayen ride yanran, ọvuọvo me dia osun vwẹ ohri rayen.”
3 Ọtiọyena Mosis de ji ayen yanran vwo nẹ aton ri Peran vwo nene iji ri Jihova. Eshare na eje igbuyovwin rẹ ihwo rẹ Izrẹl.
4 Enana yen edẹ rayen: vwo nẹ uvwiẹ ri Rubẹn, Shamua ọmọ ri Zakọ;
5 vwo nẹ uvwiẹ ri Simiọn, Shefat ọmọ ri Horai;
6 vwo nẹ uvwiẹ ri Juda, Kelẹb ọmọ ri Jẹfunẹ;
7 vwo nẹ uvwiẹ rẹ Isaka, Aigal ọmọ ri Josẹf;
8 vwo nẹ uvwiẹ rẹ Ifrem, Hoshia ọmọ ri Nọn;
9 vwo nẹ uvwiẹ ri Bẹnjamin, Paltai ọmọ ri Refu;
10 vwo nẹ uvwiẹ ri Zẹbulọn, Gadiẹl ọmọ ri Sodai;
11 vwo nẹ uvwiẹ ri Josẹf, vwọ kẹ uvwiẹ ri Manasẹ, Gadai ọmọ ri Susai;
12 vwo nẹ uvwiẹ ri Dan, Amiẹl ọmọ ri Gamalai;
13 vwo nẹ uvwiẹ rẹ Asha, Sitọ ọmọ ri Maikẹl;
14 vwo nẹ uvwiẹ ri Naftalai, Nabai ọmọ ri Vọfsai;
15 vwo nẹ uvwiẹ ri Gad, Guiẹl ọmọ ri Mekai;
16 Enana yen edẹ rẹ eshare rẹ Mosis jiri ra bẹbẹ ni otọ na. Mosis de mu odẹ na Joshua* vwọ kẹ Hoshia ọmọ ri Nọn.
17 Ọke rẹ Mosis vwo jẹ ayen yanran nẹ ayen ra bẹbẹ ni otọ ri Kenan, ọ da ta kẹ ayen: “Ovwan yanran kpo obo Nẹgẹb na, ovwan kpo obo ekogho rẹ igbenu na.
18 Ovwan ra mrẹ oborẹ otọ na hepha, sẹ ihwo re dia otọ na egba yẹrẹ evwiẹrẹ, sẹ ayen hanvwere yẹrẹ ayen bunru,
19 sẹ otọ na yovwirin yẹrẹ ọ brare, sẹ irere rẹ ayen dia na imitughẹ yẹrẹ a gbogba riariẹ ayen phiyọ.
20 Ovwan mi no sẹ otọ na yovwon emu* yẹrẹ o yovwon emuu,* sẹ irhe herọ yẹrẹ e herọọ. Ovwan mi fiudugberi rere ovwan reyọ evo vwẹ usun rẹ emamọ rẹ otọ na rhe.” Asaọkiephana ọnana ọke rẹ igrepu rẹsosuọ vwọ vwara.
21 Ayen de yerin kpenu, ayen da ra bẹbẹ ni otọ na vwo nẹ aton ri Zin vwo kpo Rihọb re te Libo-hemat.*
22 Ọke rẹ ayen vwọ ro Nẹgẹb, ayen de te Hẹbrọn, asan rẹ Ahaiman, Shishai, kugbe Talmai, ihwo rẹ Enak na dia. Obo rọ hepha, a bọn Hẹbrọn ẹgbukpe ighwrẹn tavwen a ke bọn Zoan rẹ Ijipt.
23 Ayen vwo te Iyara* rẹ Ẹshkọl, ayen da nyavwe oghọn ọvo rẹ ekrun rẹ igrepu vwẹ etiyin rẹ eshare ivẹ che mu phiyọ ọkpọ re vwo muẹ oghwa, ọtiọyen ji te ipọmigranẹti kugbe ifigi evo.
24 E se etiyin na Iyara* rẹ Ẹshkọl* fikirẹ ekrun rẹ igrepu rẹ ihwo rẹ Izrẹl nyavwere vwẹ etiyin.
25 Vwẹ oba rẹ ẹdẹ 40, ayen de rhivwin nẹ otọ rẹ ayen ra bẹbẹ ni na rhe.
26 Ayen de rhivwin bru Mosis vẹ Erọn kugbe ọghwẹgbe rẹ ihwo rẹ Izrẹl eje rhe vwẹ aton ri Peran vwẹ Kedẹsh. Ayen da hwarhiẹ iyẹnrẹn rhe ọghwẹgbe na eje ji dje emamọ rẹ otọ na kẹ ayen.
27 Ọnana yen oborẹ ayen niyẹnrẹn rọyen vwọ kẹ Mosis: “Avwanre ro otọ ru wo ji avwanre ra na, vwọrẹ uyota, ọ ghene djẹ ọkẹre rẹ ameivie vẹ ame ọnyọn, emamọ rọyen na.
28 Ẹkẹvuọvo ihwo re dia otọ na goma, irere rayen ra gbogba riariẹ phiyọ na vwo igbẹhẹ egangan ri ji kpenu. Avwanre je mrẹ ihwo rẹ Enak vwẹ etiyin.
29 Ihwo rẹ Amalẹk dia otọ ri Nẹgẹb, ihwo ri Hẹt, ihwo ri Jẹbus, kugbe ihwo rẹ Amọ dia ekogho rẹ igbenu na, ihwo ri Kenan dia kẹrẹ abadi na kugbe orhoma ri Jọdan.”
30 Ọtiọyena Kelẹb kọ davwẹngba rọ vwọ nẹrhẹ ẹwẹn rẹ ihwo ri mudia obaro ri Mosis na kpotọ, rọ vwọ ta: “E jẹ avwanre yanran kpakpata, avwanre vwo imuẹro nẹ avwanre cha reyọ otọ na, kidie aphro herọọ avwanre se phio kparobọ.”
31 Ẹkẹvuọvo eshare re vẹ ọyen gba yanran na da ta: “Avwanre cha sa họnre ihwo naa, kidie ayen gan vrẹ avwanre.”
32 Kẹ ayen nẹ orharhe iyẹnrẹn kẹ ihwo rẹ Izrẹl na vwọ kpahen otọ rẹ ayen ra bẹbẹ ni na rẹ ayen vwọ ta: “Otọ rẹ avwanre re ni na ọyen otọ ro muẹ ihwo rẹ dia evun rọyen rọ, ihwo na eje rẹ avwanre mrẹ vwọ eyen eshare re pha rhuarho gogorogo.
33 Etiyin yen avwanre da mrẹ ihwo ri Nẹfilim, emọ rẹ Enak ri nẹ Nẹfilim rhe, a da reyọ avwanre vwọ vwanvwe ayen, vwẹ ẹro rẹ avwanre kugbe ẹro rayen, avwanre họhọ ebaka.”
