Ukeri 22:1-41
22 Ọtiọyena ihwo rẹ Izrẹl de vrẹn, ayen de wonphiyọ* aton ri Moab, vwẹ obaro ri Jọdan ro hirharoku Jẹriko.
2 Asaọkiephana Belak ọmọ ri Zipọ mrẹ erọnvwọn eje rẹ ihwo rẹ Izrẹl ru ihwo rẹ Amọ.
3 Oshọ rẹ ihwo na de mu Moab gangan kidie ayen bunru mamọ; vwọrẹ uyota, uguegue da ro Moab oma fikirẹ ihwo rẹ Izrẹl.
4 Ọtiọyena Moab da ta kẹ ekpako ri Midian: “Asaọkiephana ọghwẹgbe nana cha re ekogho rẹ avwanre na eje fiotọ, kirobo rẹ erhuẹn ria odin rẹ aghwa fiotọ.”
Belak ọmọ ri Zipọ yen ovie ri Moab vwẹ ọke yena.
5 O de ji ikọn bru Belam ọmọ ri Biọ ra vwẹ Pitọ rọhẹ orhoma rẹ Urhie na* vwẹ orere re de vwiẹ. Ọ da vuẹ nẹ ọ yanrhe, rọ vwọ ta: “Nighere! Ihwo evo nẹ otọ rẹ Ijipt rhe. Nighere! Ayen rhurhu* otọrakpọ* na re, ayen dia obaro mẹ.
6 Asaọkiephana biko yanrhe rhi duvwun iyorin kẹ ihwo nana kẹ vwẹ, kidie ayen vwo ẹgba nọ vwẹ. Ọkiọvo mi se phi ayen kparobọ je djẹ ayen nẹ otọ na, kidie me riẹnre dẹn nẹ ohwo ru wo bruba kẹ, jẹ e bruba kẹ, ọ ru wo duvwun iyorin kẹ, jẹ e duvwinro iyorin.”
7 Ọtiọyena ekpako ri Moab vẹ ekpako ri Midian da yanran vẹ osa rẹ ephaẹbọ vwẹ obọ rayen, ayen de bru Belam ra je hwarhiẹ ovuẹ ri Belak vwo rhe.
8 Belam da ta kẹ ayen: “Ovwan vwerhẹn etinẹ ason na, me cha vuẹ ovwan kota kota rẹ Jihova ta kẹ vwẹ.” Ọtiọyena isun ri Moab na de nene Belam dia.
9 Ọghẹnẹ de bru Belam rhe, ọ da ta: “Enana eshare vọ yen e vẹ owẹ gba herọ na?”
10 Belam da ta kẹ Ọghẹnẹ rẹ uyota na: “Belak ọmọ ri Zipọ, ovie ri Moab vwẹ ovuẹ rhe vwe nẹ,
11 ‘Nighere! Ihwo ri nẹ otọ rẹ Ijipt cha na rhurhu* otọrakpọ* na. Asaọkiephana gba yanrhe rere wo duvwun iyorin kẹ ayen vwọ kẹ vwẹ. Ọkiọvo ke me sa họnre ayen je djẹ ayen yanran.’”
12 Ẹkẹvuọvo Ọghẹnẹ da ta kẹ Belam: “Wo nene ayen yanraan. Wo duvwun iyorin kẹ ihwo naa, kidie ayen ihwo re bruba kẹ.”
13 Belam de vrẹn vwẹ urhiọke, ọ da ta kẹ isun ri Belak: “Ovwan yanran kpo otọ rẹ ovwan, kidie Jihova rhọnvwere nẹ mi nene ovwan yanraan.”
14 Ọtiọyena isun ri Moab da kparoma, ayen de rhivwin bru Belak ra, ayen da ta kẹ: “Belam rhọnvwe nene avwanre rhee.”
15 Ẹkẹvuọvo Belak da rhoma ji isun yanran ri bunru ji titi vrẹ ẹko rẹsosuọ na.
16 Ayen de bru Belam rhe, ayen da ta kẹ: “Ọnana yen oborẹ Belak ọmọ ri Zipọ tare, ‘Biko, wo jẹ emu vuọvo da wẹ obọ jẹ wo vwo juvwe ebro chaa,
17 kidie mi che brọghọ phiyọ owẹ oma gbidiki, mi ji che ru kemu kemu ru wọ vuẹ vwẹ nẹ mi ru. Ọtiọyena, biko yanrhe rere wo duvwun iyorin kẹ ihwo nana kẹ vwẹ.’”
18 Ẹkẹvuọvo Belam da kpahen kẹ idibo ri Belak: “Ọ da tobọ dianẹ Belak cha kẹ vwẹ uwevwin rọyen rọ ghwẹ vọn vẹ idọnọ efuanfon kugbe iro, mi che se ru emu vuọvo vwọ vrẹ oborẹ Jihova Ọghẹnẹ mẹ ji iji rọyen kẹ vwẹẹ, owenẹ ọ hanvwere yẹrẹ ọ rhoro.
19 Ẹkẹvuọvo ovwan je vwerhẹn etinẹ vwẹ ason nana rere me riẹn oborẹ Jihova cha vuẹ vwẹ.”
20 Ọtiọyena Ọghẹnẹ de bru Belam rhe vwẹ ason, ọ da ta kẹ: “Ọ da dianẹ eshare nana rhi se we, nene ayen yanran. Ẹkẹvuọvo oborẹ me vuẹ wẹ nẹ wọ ta ọvo yen wọ cha ta.”
21 Belam de vrẹn vwẹ urhiọke, o de muegbe rẹ ekẹkẹtẹ* rọyen, o de nene isun ri Moab yanran.
22 Ẹkẹvuọvo ophu de mu Ọghẹnẹ mamọ kidie nẹ ọ yanran, amakashe ri Jihova de mudia idjerhe rọ vwọ da obọ ji. Asaọkiephana Belam gua vwẹ enu rẹ ekẹkẹtẹ rọyen, jẹ idibo rọyen ivẹ vẹ ọyen herọ.
23 Ọke rẹ ekẹkẹtẹ na vwọ mrẹ amakashe ri Jihova ro mudia idjerhe na vẹ ọlọkọ vwẹ obọ rọyen, ọ da davwẹngba ro vwo kuomarhẹriẹ ro evunrẹ aghwa, ẹkẹvuọvo Belam ko hwe ekẹkẹtẹ na rere o rhivwin ro idjerhe na.
24 Amakashe ri Jihova de mudia idjerhe ọhwahwa ọvo vwẹ uvwre rẹ ogba rẹ ivaini ivẹ rẹ igbẹhẹ rẹ ukuta hẹ te obonẹ te obonẹ rọyen.
25 Ọke rẹ ekẹkẹtẹ na vwọ mrẹ amakashe ri Jihova, kọ vwẹ oma vwọ vwra igbẹhẹ na, ọ da vwẹ owọ ri Belam vwọ nyẹ igbẹhẹ na, Belam kọ rhoma hwe.
26 Asaọkiephana amakashe ri Jihova da wanvrẹ kpo obaro, o de mudia asan ọhwahwa ọvo ro vwo asan ra da sa rhẹrioma kpo obọrhen yẹrẹ obohwẹree.
27 Ọke rẹ ekẹkẹtẹ na vwọ mrẹ amakashe ri Jihova, o de rhuẹn totọ, ọtiọyena ophu de mu Belam, kọ reyọ ọkpọ rọyen vwo hwe ekẹkẹtẹ na.
28 Ukuotọ rọyen, Jihova da nẹrhẹ ekẹkẹtẹ na ta ota,* ọ da ta kẹ Belam: “Die mi ru we ru wo vwo hwe vwe abọ erha nana?”
29 Belam da kpahen kẹ ekẹkẹtẹ na: “Kidie wọ vwẹ ovwẹ heha. Mane kẹ ọlọkọ rhe vwe obọ vwenẹ, je me teyen owẹ hwe!”
30 Ọtiọyena ekẹkẹtẹ na da ta kẹ Belam: “Mẹvwẹ dia ekẹkẹtẹ wẹn ru wọ gua vwẹ akpọ wẹn eje rhi duvwun nonẹna? Mi ji ru we ọtiọna jovwo re?” Ọ da kpahen: “Ẹjo!”
31 Ọtiọyena Jihova de rhiẹro ri Belam, ọ da mrẹ amakashe ri Jihova ro mudia idjerhe na vẹ ọlọkọ vwẹ obọ rọyen. Siẹvuọvo na, ọ da vwẹ uyovwin kpotọ, o de sherhẹn bọvwọn opharo rọyen rhuotọ.
32 Amakashe ri Jihova da ta kẹ: “Diesorọ wo vwo hwe ekẹkẹtẹ wẹn abọ erha nana? Nighere! Mẹvwẹ komobọ rhere rhe da wẹ obọ ji, kidie oyan wẹn na vwọso ọhọre mẹ.
33 Ekẹkẹtẹ na mrẹ vwẹ, ọ da davwẹngba vwo kuomarhẹriẹ nẹ obaro mẹ abọ erha nana. Mane kẹ o kuomarhẹriẹ nẹ obaro mẹ jovwoo! Jẹ asaọkiephana mane mi hwe we re, ekẹkẹtẹ na kọyen rha rhọ.”
34 Belam da ta kẹ amakashe ri Jihova: “Mi ru umwemwu, kidie me riẹnre nẹ wẹwẹ yen mudia idjerhe ro bru vwe cha jovwo naa. Jẹ asaọkiephana, ọ da dia obo re chọre vwẹ ẹro wẹn, mi che rhivwin.”
35 Ẹkẹvuọvo amakashe ri Jihova da ta kẹ Belam: “Wẹ vẹ eshare na yanran, ẹkẹvuọvo oborẹ me vuẹ wẹ ọvo yen wọ cha ta.” Ọtiọyena Belam vẹ isun ri Belak da yanran.
36 Ọke rẹ Belak vwo nyo nẹ Belam rhere, kpakpata, o de bro ra vwẹ orere ri Moab rọhẹ orhoma rẹ Anọn vwẹ ughwru rẹ ekogho na.
37 Belak da ta kẹ Belam: “Mi ji ihwo bru we rhe? Diesorọ wo rhe bru vwe rhee? Wo rorori nẹ mi che se brọghọ phiyọ owẹ oma gbidiki?”
38 Belam da kpahen kẹ Belak: “Obo rọ hepha, mi bru we rhire. Ẹkẹvuọvo a cha vwẹ uphẹn kẹ vwẹ nẹ me ta ota? Eta rẹ Ọghẹnẹ phi phiyọ unu mẹ ọvo yen me sa ta.”
39 Belam de nene Belak, ayen de te Kiriat-huzọt.
40 Belak da vwẹ erhuẹn vẹ igodẹ vwo ze izobo, ọ da vwẹ evo vwo rhe Belam vẹ isun re vẹ ọyen gba herọ.
41 Ọke vwo rhie, Belak da reyọ Belam, ọ da reyọ vwọ rhe Bemọt-bel; kọ sa kparo mrẹ ihwo na eje vwẹ etiyin.
