Ukeri 35:1-34
35 Jihova da rhoma ta ota kẹ Mosis vwẹ aton ri Moab rọ kẹrẹ Jọdan na vwẹ Jẹriko, ọ da ta:
2 “Vuẹ ihwo rẹ Izrẹl nẹ ayen reyọ irere vwo nẹ otọ rẹ ayen cha riuku rọyen na vwọ kẹ ihwo ri Livae na rere ayen dia, ayen me vwẹ odin re riariẹ irere na phiyọ vwọ kẹ ihwo ri Livae na.
3 Ayen cha dia irere na, odin na cha dia e rẹ ichuru rayen, ekuakua rayen, kugbe eranvwe rayen ri chekọ eje.
4 Etọ rẹ eranvwe da ria odin vwẹ irere rẹ ovwan cha vwọ kẹ ihwo ri Livae na cha hẹre te kubit* 1,000 vwo nẹ igbẹhẹ rọ riariẹ orere na phiyọ rhe.
5 Ovwan me vwanvwe otafe rẹ orere na kubit 2,000 vwẹ ẹbẹre ọnre va nẹcha, kubit 2,000 vwẹ ẹbẹre rẹ obọrhen ọnre na, kubit 2,000 vwẹ ẹbẹre ọnre shera, kugbe kubit 2,000 vwẹ ẹbẹre rẹ obohwẹre ọnre na, jẹ orere na hẹ uherevie. Enana me dia etọ rẹ eranvwe da ria odin vwẹ irere rayen.
6 “Irere rẹ ovwan cha vwọ kẹ ihwo ri Livae na cha dia irere rẹ adjarhọ 6, ovwan cha vwẹ ayen kpahotọ rere ohwo ro hwe ohwo sa vwọ djẹ kpo etiyin, ọtiọyen ji te irere 42 efa.
7 Irere na eje rẹ ovwan cha vwọ kẹ ihwo ri Livae na cha dia 48, ọtiọyen ji te etọ rayen rẹ eranvwe da ria odin.
8 Irere rẹ ovwan cha vwọ kẹ ayen na che nẹ otọ rẹ ihwo rẹ Izrẹl riuku rọyen rhe. Ovwan me reyọ bun vwo nẹ ẹko rọ rhoro, ovwan me reyọ hanvwe vwo nẹ ẹko rọ hanvwere. Ẹko ọvuọvo me reyọ evo vwẹ usun rẹ irere rayen vwọ kẹ ihwo ri Livae na, vwo nene oborẹ uku ra ghare kẹ ayen na hepha.”
9 Jihova da rhoma ta ota kẹ Mosis, ọ da ta:
10 “Ta ota kẹ ihwo rẹ Izrẹl rere wọ vuẹ ayen nẹ, ‘Ovwan cha shariẹ Jọdan na vrẹ vwo kpo otọ ri Kenan.
11 Ovwan me sane irere ri shephiyọ vwọ kẹ oma rẹ ovwan rere e dia irere rẹ adjarhọ, asan rẹ ohwo rẹ obọ chọre vwo hwe ohwo* sa djẹ ra.
12 Irere nana cha dia adjarhọ kẹ ovwan vwọ vrabọ rẹ ọreihri rẹ ọbara na, rere ohwo ro hwe ohwo na vwo jeghwo tavwen a ke reyọ vwo guẹdjọ vwẹ obaro rẹ ọghwẹgbe na.
13 Ọnana yen obo ra cha vwẹ irere rẹ adjarhọ esan rẹ ovwan vwọ kpahotọ na vwo ru.
14 Ovwan cha vwẹ irere erha vwọ kpahotọ vwẹ ẹbẹre obonẹ ri Jọdan na kugbe irere erha vwẹ otọ ri Kenan, rere e dia irere rẹ adjarhọ.
15 Irere esan nana cha dia adjarhọ vwọ kẹ ihwo rẹ Izrẹl, ọrhorha, kugbe ohwo rọ rhe dia ohri rayen, rere kohwo kohwo rẹ obọ chọre vwo hwe ohwo* sa vwọ djẹ kpo etiyin.
16 “‘Ẹkẹvuọvo ọ da dia orọnvwọn ra vwẹ utehru vwo ru yen ọ vwọ ghwiẹ o de ghwu, jẹ ọ dẹ ozighẹ. O vwo obo rọ wanree, e jẹ a teyen ozighẹ na hwe.
17 Ọ da dia ukuta rọ sa so ughwu yen ọ vwọ ghwiẹ o de ghwu, jẹ ọ dẹ ozighẹ. O vwo obo rọ wanree, e jẹ a teyen ozighẹ na hwe.
18 Ọ da dia orọnvwọn ra vwẹ urhe vwo ru rọ sa so ughwu yen ọ vwọ ghwiẹ o de ghwu, jẹ ọ dẹ ozighẹ. O vwo obo rọ wanree, e jẹ a teyen ozighẹ na hwe.
19 “‘Ọreihri rẹ ọbara na yen ohwo rọ cha teyen ozighẹ na hwe. Ọke rọ da vwa, ọyen komobọ kọ teyọn hwe.
20 Ohwo na de ghwu kidie nẹ o genrire fikirẹ utuoma yẹrẹ ọ vwẹ orọnvwọn vwo phio vẹ ivun umwemwu,*
21 yẹrẹ kọ vwẹ obọ vwọ ghwiẹ fikirẹ utuoma, o de ghwu, o vwo obo rọ wanree, ka teyen ohwo rọ ghwiẹrẹ na hwe. Ọyen ozighẹ. Ọreihri rẹ ọbara na cha teyen ozighẹ na hwe ọke rọ da vwa.
22 “‘Ẹkẹvuọvo ọ da dianẹ o rhẹro rọyeen jẹ ọ dia ẹwẹn rẹ utuoma yen o vwo gereen yẹrẹ ọ dia ivun umwemwu yen ọ* vwọ vwẹ orọnvwọn vwo phioo,
23 yẹrẹ ọ mrẹrẹẹ, ọ da nẹrhẹ oragha she teyọn, jẹ ọ dia ọvweghwrẹn rọyen yẹrẹ kọ guọnọ wan omaa, ohwo na de ghwu,
24 ọghwẹgbe na mi brorhiẹn vwẹ uvwre rẹ ohwo rọ ghwiẹrẹ na vẹ ọreihri rẹ ọbara na vwo nene ẹdjọeguo nana.
25 Ọghwẹgbe na mi sivwin ohwo ro hwe ohwo na vwo nẹ obọ rẹ ọreihri rẹ ọbara na, ayen mi vwo rhivwin kpo orere rẹ adjarhọ rọyen rọ djẹ ra jovwo na, ọ me dia etiyin bẹsiẹ orherẹn rode ra vwẹ evwri ọfuanfon vwọ jẹreyọ na vwo ghwu.
26 “‘Ẹkẹvuọvo ohwo ro hwe ohwo na da shariẹ ughwru rẹ orere rẹ adjarhọ rọyen rọ djẹ ra na
27 ọreihri rẹ ọbara na da mrẹ vwẹ otafe rẹ ughwru rẹ orere rẹ adjarhọ rọyen na, o de hwe ohwo ro hwe ohwo na, ọ riabe rẹ ọbara vuọvoo.
28 Kidie ọ cha dia evunrẹ orere adjarhọ rọyen na bẹsiẹ orherẹn rode na vwo ghwu. Ẹkẹvuọvo orherẹn rode na de ghwu nu, ohwo ro hwe ohwo na ko se rhivwin kpo otọ robọ rọyen.
29 Erọnvwọn nana cha dia urhi rẹ ẹdjọeguo vwọ kẹ ovwan vwẹ uvwiẹ rẹ ovwan eje vwẹ kasan kasan rẹ ovwan diare.
30 “‘Kohwo kohwo ro hwe ohwo,* e jẹ a teyọn hwe kerẹ ozighẹ siẹrẹ iseri da herọ; ẹkẹvuọvo e jẹ a teyen ohwo* vuọvo hwe fikirẹ oseri rẹ ohwo ọvoo.
31 Ovwan reyọ ọtanhirhe vuọvo fikirẹ arhọ* rẹ ozighẹ ro fo ughwuu, kidie o vwo obo rọ wanree, ofori nẹ a teyọn hwe.
32 Ovwan je reyọ ọtanhirhe fikirẹ ohwo rọ djẹ kpo orere rẹ adjarhọ rọyen rere o se vwo rhivwin rhe dia otọ rọyen tavwen orherẹn na ki ghwuu.
33 “‘Ovwan gbe otọ rẹ ovwan dia na ẹguaa, kidie ọbara gbe otọ na ẹgua, o vwo orọnvwọn vuọvo re se vwo phoro ọbara re ku kuotọ na noo, jokparẹ ọbara rẹ ohwo ro ku ọbara kuotọ na.
34 Ovwan gbe otọ rẹ ovwan dia na ẹguaa, otọ re me dia na; kidie mẹvwẹ ri Jihova, me dia ohri rẹ ihwo rẹ Izrẹl.’”
