Ukeri 6:1-27
6 Jihova da rhoma ta ota kẹ Mosis, ọ da ta:
2 “Ta ota kẹ ihwo rẹ Izrẹl rere wọ vuẹ ayen nẹ, ‘Ọ da dianẹ ọshare yẹrẹ aye ve ive rẹ oghẹresan rọ vwọ dia Nazarait* kẹ Jihova,
3 e jẹ ọ kẹnoma kẹ iwaini kugbe oka rẹ idi efa ri muẹ ohwo. E jẹ ọ da viniga rẹ iwaini yẹrẹ viniga ri koka koka rẹ udi ro muẹ ohwoo. E jẹ ọ da koka koka rẹ udi ra vwẹ igrepu ru yẹrẹ ria igrepuu, owenẹ ọ dia ọkpokpọ yẹrẹ ọyaya.
4 Vwẹ ẹdẹ ri Nazarait rọyen eje, e jẹ ọ ria orọnvwọn vuọvo ra vwẹ ivaini vwo ruu, vwo nẹ igrepu re je rhe vwaree re te ohọrọ rayen.
5 “‘E jẹ anre* vuọvo wan uyovwin rọyen vrẹ vwẹ ẹdẹ rẹ ive ri Nazarait rọyen ejee. Ọ me dia fuanfon womarẹ ọ vwọ yanjẹ ẹton rẹ uyovwin rọyen vwo nẹ o din, re te ọke rẹ ẹdẹ ra vwọ sanọ phiyọ ọkọkọ vwọ kẹ Jihova na vwọ gba.
6 E jẹ o siẹkẹrẹ ohwo ro ghwuru vwẹ uvwre rẹ ẹdẹ na eje rọ je vwọ hẹ ẹdia rẹ ohwo* ra hẹriẹre vwọ kẹ Jihova naa.
7 Ọ da tobọ dianẹ ọsẹ rọyen yẹrẹ oni rọyen yẹrẹ oniọvo rọyen ọshare yẹrẹ oniọvo rọyen aye ghwuru, o che se gbe oma rọyen ẹguaa, kidie oka ri Nazarait rọyen vwọ kẹ Ọghẹnẹ rọyen na hẹ uyovwin rọyen.
8 “‘Ọyen ohwo rọ fonro vwọ kẹ Jihova vwẹ ẹdẹ ri Nazarait rọyen eje.
9 Ẹkẹvuọvo ohwo de ghwu kẹrẹ kpregede rọ da nẹrhẹ o gbe ẹton rọyen ẹgua ro mudiaphiyọ ohẹriẹ ra hẹrierẹ vwọ kẹ Ọghẹnẹ na, ọ me wanre ẹton rẹ uyovwin rọyen vwẹ ẹdẹ rẹ orufon rọyen na. Ọ me wanrọ vwẹ ẹdẹ righwrẹn na.
10 Vwẹ ẹdẹ rẹrenren na, ọ me reyọ erurẹ itete ivẹ yẹrẹ ilekuku itete ivẹ vwo rhe orherẹn na vwẹ asan ra wan rua utughẹ ra da vwoma na.
11 Orherẹn na me vwẹ ọvo vwọ kpahotọ kerẹ izobo rẹ umwemwu, ọ ro chekọ na kerẹ izobo rẹ ẹtorhẹ, o mi ru arhuẹrẹ vwọ kẹ kidie ọ riabe rẹ umwemwu fikirẹ ohwo ro ghwuru na.* Ọtiọyena o mi ru uyovwin rọyen fon vwẹ ẹdẹ yena.
12 Ọ me rhoma hẹrioma rọyen vwọ kẹ Jihova vwẹ ẹdẹ ri Nazarait rọyen, ọ me reyọ egbon otete rọhẹ ukpe rẹsosuọ rọyen vwọ rhe kerẹ izobo rẹ abe. Ẹkẹvuọvo e rhe che kere ẹdẹ rọ ka vwọ ga jovwo naa, kidie o gbe Nazarait rọyen ẹgua.
13 “‘Asaọkiephana ọnana yen urhi ro shekpahen Nazarait: Ọke rẹ ẹdẹ rọ vwọ ga kerẹ Nazarait na da gba re, ka cha reyọ rhe asan ra wan rua utughẹ ra da vwoma na.
14 Ọ me vwẹ izobo rọyen vwọ kpahotọ kẹ Jihova vwẹ etiyin: egbon otete ọvo rẹ oma rọyen gbare rọhẹ ukpe rẹsosuọ rọyen kerẹ izobo rẹ ẹtorhẹ, omogodẹ aye ọvo rẹ oma rọyen gbare rọhẹ ukpe rẹsosuọ rọyen kerẹ izobo rẹ umwemwu, egbon ọvo rẹ oma rọyen gbare kerẹ izobo rẹ ọrekugbe,
15 obere rẹ ibrẹdi ro jephuo* re ru họhọ ubiosa ra vwẹ iflawa oyoyovwin ra vwẹ evwri vwọ gua vwo ru, ibrẹdi ro jephuo rọ pha pẹpẹghẹ ra vwẹ evwri ghworo, kugbe izobo rẹ eka rayen vẹ izobo rẹ udi rayen.
16 Orherẹn na cha vwẹ ayen vwọ kpahotọ vwẹ obaro ri Jihova, ko che ze izobo rẹ umwemwu rọyen kugbe izobo rẹ ẹtorhẹ rọyen.
17 Kọ cha vwẹ egbon na vwo ze izobo rẹ ọrekugbe kẹ Jihova, ọ vẹ obere rẹ ibrẹdi ro jephuo na, orherẹn na me vwẹ izobo rẹ eka kugbe izobo rẹ udi rọyen vwọ kpahotọ.
18 “‘Nazarait na me wanre ẹton rẹ uyovwin rọyen ro je bro na* vwẹ asan ra wan rua utughẹ ra da vwoma na, ọ me reyọ ẹton rẹ uyovwin rọyen ro dinri vwẹ ọke rọ vwọ ga kerẹ Nazarait na, ọ me ghwẹ ayen phiyọ erhanre rọhẹ obotọ rẹ izobo rẹ ọrekugbe na.
19 Orherẹn na me reyọ ọvo vwẹ usun rẹ igabọ rẹ egbon re chereri na, ibrẹdi ro jephuo ọvo re ru họhọ ubiosa kugbe ibrẹdi ro jephuọ ọvo rọ pha pẹpẹghẹ vwo nẹ obere na rhe, o mi phi ayen phiyọ ẹhẹrhabọ ri Nazarait na ọke ra da wanre oka ri Nazarait rọyen no nu.
20 Orherẹn na mi dju ayen kpuko kparo kerẹ izobo rẹ edjuo vwẹ obaro ri Jihova. Ọyen emu rọ fonro vwọ kẹ orherẹn na, ọtiọyen ji te evie rẹ izobo rẹ edjuo na kugbe owọ na ra vwọ kpahotọ kerẹ utoro na. O de ru ọyena nu, Nazarait na kọ sa da iwaini.
21 “‘Ọnana yen urhi ro shekpahen Nazarait ro ve ive: O de ve ive, o de ji vwo obo ro se vwo ze izobo kẹ Jihova rọ vrẹ obo ra guọnọ mie kerẹ Nazarait, o mi ru obo ro veri na fikirẹ urhi ri Nazarait rọyen na.’”
22 Ọyena vwọ wan nu, Jihova da ta kẹ Mosis:
23 “Vuẹ Erọn vẹ emọ rọyen nẹ, ‘Ọnana yen oborẹ wo che bruba kẹ ihwo rẹ Izrẹl wan. Ta kẹ ayen:
24 “E jẹ Jihova bruba kẹ ovwan je sẹro rẹ ovwan.
25 E jẹ Jihova nẹrhẹ opharo rọyen lo mu ovwan ji dje ẹroesiri kẹ ovwan.
26 E jẹ Jihova kpare opharo rọyen vwo ni ovwan je kẹ ovwan ufuoma.”’
27 Ayen mi phi odẹ mẹ phiyọ enu rẹ ihwo rẹ Izrẹl, rere mi se vwo bruba kẹ ayen.”
Eta rehẹ obotọ na
^ Vwẹ Hibru, na·zir′, o mudiaphiyọ “Ọ ra Sane Phia; Ọ ra Vwọ Kpahotọ; Ọ ra Hẹriẹre.”
^ Yẹrẹ “irezọ.” Ọnana orọnvwọn ra vwọ wanra ẹton vwẹ ọke awanre.
^ Yẹrẹ “erhi.” Ni Eta re Vwomaphia.
^ Yẹrẹ “fikirẹ erhi.” Ni Eta re Vwomaphia.
^ Yẹrẹ “ibrẹdi ro vwo iyistii.”
^ Yẹrẹ “uyovwin ri Nazarait rọyen.”
