Ukeri 31:1-54
31 Jihova da ta kẹ Mosis:
2 “Gboja kẹ ihwo ri Midian fikirẹ oborẹ ayen ru ihwo rẹ Izrẹl. Wo de ru ọyena nu, ke che koko uwe bru ihwo wẹn ra.”*
3 Ọtiọyena Mosis da ta ota kẹ ihwo na, ọ da ta: “Ovwan muegbe rẹ eshare vwo nẹ ohri rẹ ovwan vwọ kẹ ofovwin* vwọso Midian rere ovwan gboja kẹ Midian vwọ kẹ Jihova.
4 Ovwan reyọ ihwo 1,000 nẹ ọvuọvo rẹ uvwiẹ rẹ Izrẹl eje rhe rere ovwan phi ayen phiyọ otuofovwin na.”
5 Ọtiọyena, vwo nẹ uriorin buebun rẹ Izrẹl, a da vwẹ 1,000 vwo mu vwo nẹ uvwiẹ ọvuọvo rhe, ihwo 12,000 re muegbe rayen vwọ kẹ ofovwin.*
6 Ọtiọyena Mosis de ji ayen yanran, ihwo 1,000 vwo nẹ uvwiẹ ọvuọvo vwo kpo otuofovwin na, vẹ Finihas ọmọ rẹ Ẹlieza orherẹn na vwo kpo otuofovwin na, ohwo rẹ ekuakua efuanfon na vẹ ewanre rẹ oka* na hẹ obọ rọyen.
7 Ayen da họnre vwọso Midian kirobo rẹ Jihova ji iji rọyen kẹ Mosis, ayen de hwe eshare na eje.
8 Vwọ ba ihwo efa rẹ ayen hweri, ayen hwe ivie ri Midian rẹ edẹ rayen dia Ivai, Rikẹm, Zọ, Họr, kugbe Riba, ivie iyorin ri Midian. Ayen je vwẹ ọlọkọ vwo hwe Belam ọmọ ri Biọ.
9 Ẹkẹvuọvo ihwo rẹ Izrẹl mu eya vẹ emọ ri Midian kpo eviẹn. Ayen ji gborho eranvwe rayen eje re dia orere, ichuru rayen eje kugbe ekuakua rayen eje.
10 Ayen da vwẹ erhanre vwọ torhẹ irere rayen eje rẹ ayen dia kugbe asan rẹ ayen wonphiyọ* eje.
11 Ayen de mu erọnvwọn eje rẹ ayen gborhori na, te ihworakpọ te eranvwe.
12 Ayen de mu eviẹn na vẹ erọnvwọn rẹ ayen gborhori bru Mosis vẹ Ẹlieza orherẹn na kugbe ọghwẹgbe rẹ ihwo rẹ Izrẹl ra, vwo kpo asan rẹ ayen wonphiyọ vwẹ aton ri Moab rọ kẹrẹ Jọdan na vwẹ Jẹriko.
13 Ọtiọyena Mosis vẹ Ẹlieza orherẹn na kugbe isun rẹ ọghwẹgbe na eje da yanran ra vwa ayen vwẹ otafe rẹ asan rẹ ayen wonphiyọ na.
14 Ẹkẹvuọvo ophu de mu Mosis gangan kpahen eshare re vwo mu vwẹ otuofovwin na, inotu rẹ uriorin na kugbe inotu rẹ ujorin na ri nẹ ofovwin na cha.
15 Mosis da ta kẹ ayen: “Diesorọ ovwan vwo jẹ eya na ejobi ehwe?
16 Nighere! Ayen yen ihwo re womarẹ ota ri Belam vwọ riẹriẹ ihwo rẹ Izrẹl vwo ru uruemu ri jẹ evun ẹfuọn vwọ kpahen Jihova vwo nene irueru ri Piọ, rọ nẹrhẹ ọtiekọ rhe enu rẹ ọghwẹgbe ri Jihova.
17 Asaọkiephana ovwan hwe kọmọshare kọmọshare vwẹ usun rẹ emọ na, ovwan mi ji hwe kaye kaye ro nene ọshare vwerhẹn re.
18 Ẹkẹvuọvo ovwan sa yanjẹ emetẹ na eje ri ji rhi nene ọshare vwerhẹẹn vwo.
19 Ovwan mi wonphiyọ otafe rẹ asan rẹ ovwan wonphiyọ na vwẹ ẹdẹ ighwrẹn. Kohwo kohwo vwẹ usun rẹ ovwan ro hwe ohwo* kugbe kohwo kohwo vwẹ usun rẹ ovwan ro djobọte ohwo re hweri mi ru oma rọyen fon vwẹ ẹdẹ rerha kugbe ẹdẹ righwrẹn na, te ovwan te eviẹn rẹ ovwan.
20 Ovwan mi ru kewun kewun, korọnvwọn korọnvwọn ra vwẹ ophiẹn vwo ru, korọnvwọn korọnvwọn ra vwẹ ẹton rẹ ẹvwe vwo ru, kugbe korọnvwọn korọnvwọn ra vwẹ urhe vwo ru fon vwo nẹ umwemwu.”
21 Ẹlieza orherẹn na da ta kẹ eshare rẹ otuofovwin na ri kpo ofovwin na: “Ọnana yen urhi rẹ Jihova ji kẹ Mosis,
22 ‘Oro, idọnọ efuanfon, ẹrovwo, utehru, itini, kugbe ilẹdi na ọvo,
23 kemu kemu ra sa vwẹ erhanre vwo ru fon, ovwan me vwọ wan erhanre, ọ me fon. Ẹkẹvuọvo ovwan me je vwẹ ame rẹ orufon na vwo ruo fon. Kemu kemu ra cha sa vwẹ erhanre vwo ru foon, ovwan me vwẹ ame vwọ hworhẹ.
24 Ovwan me fọnrhọn iwun rẹ ovwan vwẹ ẹdẹ righwrẹn na, ovwan me fon, ovwan de ru ọyena nu, kẹ ovwan sa rhe evunrẹ asan rẹ ovwan wonphiyọ na.’”
25 Ọyena vwọ wan nu, Jihova da ta eta nana kẹ Mosis:
26 “Kere ekuakua re gborhori na, kere ihworakpọ vẹ eranvwe re muru; wẹ vẹ Ẹlieza orherẹn na kugbe igbuyovwin rẹ iwevwin rẹ esẹ rẹ ọghwẹgbe na ru ọnana.
27 Ghare ekuakua re gborhori na ẹkẹn ivẹ rere a ghare ayen vwẹ uvwre rẹ ihwo rehẹ otuofovwin na ri vwobọ vwẹ ofovwin na kugbe ihwo ri chekọ eje vwẹ ọghwẹgbe na.
28 Wọ me reyọ erhi* ọvo vwo nẹ ẹkuẹko 500 rẹ isodje ri kpo ofovwin na, ihwo na, erhuẹn na, ekẹkẹtẹ na, kugbe ẹvwe vẹ igodẹ na, kerẹ osa uyovwin vwọ kẹ Jihova.
29 Wọ me reyọ vwo nẹ ubro* rayen rhe, rere wọ reyọ vwọ kẹ Ẹlieza orherẹn na kerẹ utoro ri Jihova.
30 Vwo nẹ ubro ra vwọ kẹ ihwo rẹ Izrẹl, wọ me reyọ ọvo vwo nẹ 50 rẹ ihwo na, erhuẹn na, ekẹkẹtẹ na, ẹvwe vẹ igodẹ na, kugbe koka koka rẹ eranvwe re dia orere, rere wọ vwẹ ayen kẹ ihwo ri Livae re vwẹrote iruo ri churobọ si itabanako ri Jihova na.”
31 Ọtiọyena Mosis vẹ Ẹlieza orherẹn na de ru kirobo rẹ Jihova ji iji rọyen kẹ Mosis.
32 Ekuakua ri chekọ re gborhori rẹ isodje na reyọre da dia ẹvwe vẹ igodẹ 675,000,
33 erhuẹn 72,000,
34 ekẹkẹtẹ 61,000.
35 Eya ri ji rhi nene ọshare vwerhẹẹn da dia eya* 32,000.
36 Ubro na rọ dia ẹkẹn rẹ ihwo ri kpo ofovwin na da dia ẹvwe vẹ igodẹ 337,500.
37 Osa uyovwin ra vwọ kẹ Jihova vwo nẹ ẹvwe vẹ igodẹ na rhe da dia 675.
38 Erhuẹn 36,000 yen herọ, osa uyovwin ra reyọ vwo nẹ ayen vwọ kẹ Jihova da dia 72.
39 Ekẹkẹtẹ 30,500 yen herọ, osa uyovwin ra reyọ vwo nẹ ayen vwọ kẹ Jihova da dia 61.
40 Ihwo* 16,000 yen herọ, osa uyovwin ra reyọ vwo nẹ ayen vwọ kẹ Jihova da dia ihwo* 32.
41 Mosis da vwẹ osa uyovwin na vwọ kẹ Ẹlieza orherẹn na kerẹ utoro ri Jihova, kirobo rẹ Jihova ji iji rọyen kẹ Mosis.
42 Vwo nẹ ubro na rọ dia ọ rẹ ihwo rẹ Izrẹl rẹ Mosis hẹriẹ nẹ ẹkẹn rẹ ihwo ri kpo ofovwin na,
43 ubro rẹ ẹvwe vẹ igodẹ na da dia 337,500,
44 ọ rẹ erhuẹn na 36,000,
45 ọ rẹ ekẹkẹtẹ na 30,500,
46 ọ rẹ ihwo* na ke rha 16,000.
47 Vwo nẹ ubro rọ dia ọ rẹ ihwo rẹ Izrẹl na, Mosis da reyọ ọvo vwo nẹ 50 rẹ ihwo na vẹ eranvwe na, ọ da vwẹ ayen kẹ ihwo ri Livae re vwẹrote iruo rẹ itabanako ri Jihova na, kirobo rẹ Jihova ji iji rọyen kẹ Mosis.
48 Eshare re vwo mu vwẹ uriorin buebun rẹ otuofovwin na, inotu rẹ uriorin na kugbe inotu rẹ ujorin na de bru Mosis rhe,
49 ayen da ta kẹ Mosis: “Idibo wẹn kere eshare ri kpo ofovwin rehẹ otọ rẹ usuon rẹ avwanre, o vwo ọvuọvo ra niyẹnrẹn rọyen nẹ o ghwruru nẹ ohri rẹ avwanree.
50 Ọtiọyena e jẹ ohwo ọvuọvo vwẹ usun rẹ avwanre na vwẹ obo rọ reyọre vwọ kpahotọ kerẹ okẹ ri Jihova, ekuakua rẹ oro, isheni re kuẹphiyọ awọ, i re kuẹphiyọ abọ, ibiosa rẹ oka, erọnvwọn erhọ, kugbe ekuakua efa tiọyena, rere a reyọ ayen vwo ru arhuẹrẹ kẹ oma rẹ avwanre* vwẹ obaro ri Jihova.”
51 Ọtiọyena Mosis vẹ Ẹlieza orherẹn na da reyọ iro na mie ayen, erọnvwọn eje re duvwunru na.
52 Iro na eje ra reyọ mie inotu rẹ uriorin na kugbe inotu rẹ ujorin na rẹ ayen vwo ru utoro kẹ Jihova da dia shẹkẹl* 16,750.
53 Ọvuọvo rẹ eshare rehẹ otuofovwin na gborho ekuakua kẹ oma rọyen.
54 Mosis vẹ Ẹlieza orherẹn na reyọ iro na mie inotu rẹ uriorin na kugbe e rẹ ujorin na, ayen da reyọ ayen ro evunrẹ utughẹ ra da vwoma na kerẹ ẹkarophiyọ vwọ kẹ ihwo rẹ Izrẹl vwẹ obaro ri Jihova.
Eta rehẹ obotọ na
^ Ọnana ota rẹ une aghwanre ro shekpahen ughwu.
^ Yẹrẹ “vwọ kẹ otuofovwin na.”
^ Yẹrẹ “vwọ kẹ otuofovwin na.”
^ Yẹrẹ “owanre rẹ ofovwin.”
^ Yẹrẹ “asan rẹ ayen mu erhọn phiyọ ra gbogba riariẹ phiyọ.”
^ Yẹrẹ “erhi.”
^ Ni Eta re Vwomaphia.
^ Yẹrẹ “ẹkẹn.”
^ Yẹrẹ “erhi.”
^ Yẹrẹ “Erhi rẹ ihworakpọ.”
^ Yẹrẹ “erhi.”
^ Yẹrẹ “erhi rẹ ihworakpọ na.”
^ Yẹrẹ “kẹ erhi rẹ avwanre.”
^ Shẹkẹl ọvo vẹ igramu 11.4 abavo. Ni Apẹndis B14.
