Ukeri 3:1-51
3 Asaọkiephana enana yen irhiẹ* rẹ orua rẹ Erọn vẹ Mosis vwẹ ẹdẹ rẹ Jihova vwo nene Mosis ta ota vwẹ Ugbenu ri Sainai.
2 Enana yen edẹ rẹ emọ rẹ Erọn: ọmọkpako na Nedab, kugbe Abaihu, Ẹlieza, kugbe Itama.
3 Enana yen edẹ rẹ emọ rẹ Erọn, irherẹn ra jẹreyọ re vwo mu* nẹ e ga kerẹ irherẹn.
4 Ẹkẹvuọvo Nedab vẹ Abaihu ghwuru vwẹ obaro ri Jihova ọke rẹ ayen vwọ torhẹ erhanre rẹ urhi rhọnvwephiyọọ vwẹ obaro ri Jihova vwẹ aton ri Sainai, ayen vwiẹ emọọ. Ẹkẹvuọvo Ẹlieza vẹ Itama de ji nene ọsẹ rayen Erọn ga kerẹ irherẹn.
5 Jihova da ta kẹ Mosis:
6 “Reyọ uvwiẹ ri Livae na rhe, wọ vwẹ ayen vwo mudia obaro rẹ Erọn orherẹn na, rere ayen gbodibo kẹ.
7 Ayen mi ruiruo ro te ayen vwọ kẹ kugbe ọghwẹgbe na ejobi vwẹ obaro rẹ utughẹ ra da vwoma na, womarẹ ayen vwo ruiruo rẹ ẹga rayen ro churobọ si itabanako na.
8 Ayen me vwẹrote ekuakua eje rehẹ utughẹ ra da vwoma na ji ruiruo rayen vwọ kẹ ihwo rẹ Izrẹl, womarẹ ayen vwọ vwẹrote iruo rẹ ẹga ri churobọ si itabanako na.
9 Wọ me vwẹ ihwo ri Livae na vwọ kẹ Erọn vẹ emọ rọyen. Ayen ihwo ra vwọ kẹ, a vwẹ ayen kẹ vwo nẹ usun rẹ ihwo rẹ Izrẹl.
10 Wọ me vwẹ Erọn vẹ emọ rọyen vwo mu, ayen mi ruiruo rẹ orherẹn rayen, kohwo kohwo ra rhọnvwe kẹẹ* ro sikẹrẹ, e jẹ a teyọn hwe.”
11 Jihova da je ta kẹ Mosis:
12 “Vwọ kẹ vwẹ, nighere! Me reyọ ihwo ri Livae na vwo nẹ ohri rẹ ihwo rẹ Izrẹl vwẹ ẹdia rẹ emekpako na eje* rẹ ihwo rẹ Izrẹl, ihwo ri Livae na me dia emẹ.
13 Kidie emekpako na eje emẹ. Vwẹ ẹdẹ ri mi vwo hwe emekpako na eje rehẹ otọ rẹ Ijipt, mi de ru emekpako na eje rẹ Izrẹl vwo nẹ ohworakpọ re te eranvwe fon kẹ oma mẹ. Ayen cha dia emẹ. Mẹvwẹ Jihova.”
14 Jihova da rhoma ta ota kẹ Mosis vwẹ aton ri Sainai:
15 “Si edẹ rẹ emọ ri Livae phiyotọ vwo nene iwevwin rẹ esẹ rayen kugbe vwo nene erua rayen. Wo mi si edẹ rẹ eshare eje rehẹ emeranvwe ọvo kpenu phiyotọ.”
16 Ọtiọyena Mosis de si edẹ rayen phiyotọ kirobo rẹ Jihova ji iji rọyen kẹ.
17 Enana yen edẹ rẹ emọ ri Livae: Gẹshọn, Kohat, kugbe Mẹrerai.
18 Asaọkiephana enana yen edẹ rẹ emọ ri Gẹshọn vwo nene erua rayen: Libnai kugbe Shimiai.
19 Emọ ri Kohat vwo nene erua rayen yen Amram, Izha, Hẹbrọn, kugbe Ọziẹl.
20 Emọ ri Mẹrerai vwo nene erua rayen yen Malai kugbe Mushai.
Enana yen erua rẹ ihwo ri Livae na vwo nene iwevwin rẹ esẹ rayen.
21 Gẹshọn yen orua rẹ ihwo ri Libnai kugbe orua rẹ ihwo ri Shimiai nurhe. Enana yen erua rẹ ihwo ri Gẹshọn.
22 Ukeri rẹ eshare eje rehẹ emeranvwe ọvo kpenu re si edẹ rayen phiyotọ da dia 7,500.
23 Erua rẹ ihwo ri Gẹshọn de wonphiyọ* obuko rẹ itabanako na vwẹ ẹbẹre ọnre shera.
24 Osun rẹ uwevwin rẹ ọsẹ rẹ ihwo ri Gẹshọn yen Elayasaf ọmọ ri Leẹl.
25 Iruo rẹ emọ ri Gẹshọn vwẹ utughẹ ra da vwoma na ọyen ayen vwọ vwẹrote itabanako na kugbe utughẹ na, urhurho rọyen, obo re vwo gbere asan ra wan rua utughẹ ra da vwoma na,
26 ikọtini ra vwọ ya vwẹ otegodo na, obo re vwo gbere asan ra wan rua otegodo rọ riariẹ itabanako na vẹ agbada na phiyọ, ifi rẹ utughẹ na, kugbe iruo rẹ ẹga na eje ri churobọ si enana.
27 Kohat yen orua rẹ ihwo rẹ Amram, orua rẹ ihwo rẹ Izha, orua rẹ ihwo ri Hẹbrọn, kugbe orua rẹ ihwo rẹ Ọziẹl nurhe. Enana yen erua rẹ ihwo ri Kohat.
28 Ukeri rẹ eshare eje rehẹ emeranvwe ọvo kpenu da dia 8,600; ayen yen vwẹrote asan ọfuanfon na.
29 Erua rẹ emọ ri Kohat wonphiyọ ẹbẹre rẹ obọrhen ọnre rẹ itabanako na.
30 Osun rẹ uwevwin rẹ ọsẹ rẹ erua rẹ ihwo ri Kohat yen Ẹlizefan ọmọ rẹ Ọziẹl.
31 Iruo rayen ọyen ayen vwọ vwẹrote Ekpeti na, imẹjẹ na, ogburhukpẹ na, egbada na, ekuakua re vwo gbodibo vwẹ asan ọfuanfon na, ohẹriẹ na, kugbe iruo rẹ ẹga na eje ri churobọ si enana.
32 Ọgbuyovwin rẹ isun rẹ ihwo ri Livae yen Ẹlieza ọmọ rẹ Erọn orherẹn na, ọyen oniruo rọ vwẹrote ihwo re vwẹrote asan ọfuanfon na.
33 Mẹrerai yen orua rẹ ihwo ri Malai kugbe orua rẹ ihwo ri Mushai nurhe. Enana yen erua ri Mẹrerai.
34 Ukeri rẹ eshare eje rehẹ emeranvwe ọvo kpenu re si edẹ rayen phiyotọ da dia 6,200.
35 Osun rẹ uwevwin rẹ ọsẹ rẹ erua ri Mẹrerai yen Zuriẹl ọmọ rẹ Abihel. Ayen wonphiyọ ẹbẹre rẹ obohwẹre ọnre rẹ itabanako na.
36 Emọ ri Mẹrerai yen vwẹrote ifremu rẹ itabanako na, ekpọ rọyen, ichivwo rọyen, inu rọyen, ekuakua rọyen eje, kugbe iruo rẹ ẹga na eje ri churobọ si enana,
37 ọtiọyen ji te ichivwo re riariẹ otegodo na phiyọ vẹ inu rayen, ipẹrẹn rẹ utughẹ rayen, kugbe ifi rẹ utughẹ rayen.
38 Ihwo ri wonphiyọ obaro rẹ itabanako na vwẹ ẹbẹre ọnre va nẹcha na, kọyen obaro rẹ utughẹ ra da vwoma na, yen Mosis vẹ Erọn kugbe emọ rọyen. Ayen yen vwo iruo ra vwọ vwẹrote asan ọfuanfon na rọ dia iruo rẹ ayen vwẹ ukẹcha kẹ ihwo rẹ Izrẹl vwo ruẹ. Kohwo kohwo ra rhọnvwe kẹẹ* ro sikẹrẹ, ka teyọn hwe.
39 Eshare rẹ ihwo ri Livae eje rehẹ emeranvwe ọvo kpenu rẹ Mosis vẹ Erọn si edẹ rayen phiyotọ vwo nene erua rayen kirobo rẹ Jihova ji iji rọyen na da dia 22,000.
40 Ọtiọyena Jihova da ta kẹ Mosis: “Si edẹ rẹ emekpako rẹ ihwo rẹ Izrẹl eje re dia eshare rehẹ emeranvwe ọvo kpenu phiyotọ, rere wo kere ayen.
41 Wọ me sane ihwo ri Livae na phiyọ ọkọkọ kẹ vwẹ, mẹvwẹ Jihova, vwẹ ẹdia rẹ emekpako rẹ ihwo rẹ Izrẹl, wọ me je sane eranvwe rẹ ihwo ri Livae re dia orere phiyọ ọkọkọ, vwẹ ẹdia rẹ emekpako rẹ eranvwe rẹ ihwo rẹ Izrẹl re dia orere.”
42 Mosis de si edẹ rẹ emekpako na eje rẹ ihwo rẹ Izrẹl phiyotọ kirobo rẹ Jihova ji iji rọyen kẹ.
43 Ukeri rẹ emekpako na eje re dia eshare rehẹ emeranvwe ọvo kpenu re si edẹ rayen phiyotọ da dia 22,273.
44 Jihova da rhoma ta kẹ Mosis:
45 “Reyọ ihwo ri Livae na vwẹ ẹdia rẹ emekpako na eje rẹ ihwo rẹ Izrẹl, wọ me je reyọ eranvwe rẹ ihwo ri Livae re dia orere vwẹ ẹdia rẹ eranvwe rayen re dia orere, ihwo ri Livae na me dia emẹ. Mẹvwẹ Jihova.
46 Vwọ kpahen osa rẹ ọtanhirhe ra cha hwa phiyọ enu rẹ ihwo rẹ Izrẹl re vwẹ 273 vwo bun vrẹ ihwo ri Livae na,
47 wọ me hwa shẹkẹl* iyorin phiyọ enu rẹ ohwo ọvuọvo, vwo nene uwan ri shẹkẹl rẹ asan ọfuanfon na,* shẹkẹl ọvo igira* 20.
48 Wọ me vwẹ igho na vwọ kẹ Erọn vẹ emọ rọyen kerẹ osa rẹ ọtanhirhe vwọ kẹ ihwo re kpahenrọ na.”
49 Ọtiọyena Mosis da reyọ igho rẹ osa rẹ ọtanhirhe na mie ihwo re kpahen uchunu rẹ ọtanhirhe rẹ ihwo ri Livae na.
50 Ọ da reyọ igho na mie emekpako rẹ ihwo rẹ Izrẹl, shẹkẹl 1,365 vwo nene uwan ri shẹkẹl rẹ asan ọfuanfon na.
51 Ọtiọyena Mosis da reyọ igho rẹ osa rẹ ọtanhirhe na vwọ kẹ Erọn vẹ emọ rọyen vwo nene eta* ri Jihova, kirobo rẹ Jihova ji iji rọyen kẹ Mosis.
Eta rehẹ obotọ na
^ Vwẹ Hibru, “uvwiẹ.”
^ Vwẹ Hibru, “ra ghwẹ abọ rayen vọn.”
^ Vwẹ Hibru, “kọrhorha kọrhorha,” kọyen, ọshare ro nẹ orua rẹ Erọn rhee.
^ Vwẹ Hibru, “emekpako na eje ri rhie uwevwiẹ.”
^ Yẹrẹ “de mu erhọn phiyọ.”
^ Vwẹ Hibru, “Kọrhorha kọrhorha,” kọyen, ohwo rọ dia ohwo ri Livaee.
^ Shẹkẹl ọvo vẹ igramu 11.4 abavo. Ni Apẹndis B14.
^ Yẹrẹ “vwo nene shẹkẹl ọfuanfon na.”
^ Igira ọvo vẹ igramu 0.57 abavo. Ni Apẹndis B14.
^ Vwẹ Hibru, “unu.”
