Ukeri 18:1-32
18 Jihova da ta kẹ Erọn: “Wẹ vẹ emọ wẹn kugbe uwevwin rẹ ọsẹ wẹn cha rioja ri koka koka rẹ oruchọ rẹ ovwan ru vwọso asan ọfuanfon na, wẹ vẹ emọ wẹn je cha rioja ri koka koka rẹ oruchọ rẹ ovwan ru vwọso ẹdia wẹn kerẹ orherẹn na.
2 Wọ me je reyọ iniọvo wẹn rẹ emeshare rẹ uvwiẹ ri Livae rhe, uvwiẹ rẹ esẹ wẹn ride, rere ayen vwomaba wẹ ji gbodibo kẹ wẹ vẹ emọ wẹn vwẹ obaro rẹ utughẹ rẹ Oseri na.
3 Ayen mi ruiruo ro te ayen gba vwọ kẹ wẹ vẹ utughẹ na eje. Ẹkẹvuọvo, ayen siẹkẹrẹ ekuakua rẹ asan ọfuanfon na kugbe e rẹ agbada naa, rere ayen yẹrẹ owẹ vwo jeghwo.
4 Ayen me vwomaba wẹ ji ruiruo ro te ayen ri churobọ si utughẹ ra da vwoma na kugbe ẹga rẹ utughẹ na eje, e jẹ ohwo vuọvo ra rhọnvwe kẹẹ* siẹkẹrẹ owẹẹ.
5 Ovwan mi ruiruo ra vwọ kẹ ovwan ro churobọ si asan ọfuanfon na kugbe agbada na rere mi vwo jẹ ophu ọgangan emuo kpahen ihwo rẹ Izrẹl obọfa.
6 Mẹvwẹ komobọ reyọ iniọvo wẹn, ihwo ri Livae na, vwo nẹ ohri rẹ ihwo rẹ Izrẹl na kerẹ okẹ vwọ kẹ wẹ. A vwẹ ayen kẹ Jihova rere ayen ga vwẹ utughẹ ra da vwoma na.
7 Te owẹ te emọ wẹn yen vwo oghwa rẹ iruo rẹ orherẹn wẹn na ro churobọ si agbada na kugbe obo rehẹ ikọtini na, wo mi ruiruo nana. Me vwẹ iruo rẹ orherẹn na vwọ kẹ wẹ kerẹ okẹ, kohwo kohwo ra rhọnvwe kẹẹ* ro sikẹrẹ, ka teyọn hwe.”
8 Vwo kpobarophiyọ, Jihova da ta kẹ Erọn: “Mẹvwẹ komobọ vwẹ owẹ vwo mu wọ vwọ vwẹrote utoro re toro kẹ vwẹ. Me vwẹ ẹkẹn vwọ kẹ wẹ vẹ emọ wẹn vwo nẹ erọnvwọn efuanfon na eje rẹ ihwo rẹ Izrẹl torori kerẹ ẹkẹn ri bẹdẹ.
9 Ọnana cha dia ọwẹn vwo nẹ izobo rọ ma fon ra vwẹ erhanre torhẹ: kizobo kizobo rẹ ayen zeri, izobo rẹ eka rayen, izobo rẹ umwemwu rayen kugbe izobo rẹ abe rayen rẹ ayen vwo rhe vwe. Ọyen orọnvwọn rọ ma fon vwọ kẹ wẹ vẹ emọ wẹn.
10 Asan rọ ma fon yen wọ da riọ. Kọshare kọshare sa riọ. Ọ cha dia emu ọfuanfon vwọ kẹ ovwan.
11 Ọnana jẹ ọwẹn: okẹ rẹ ayen toro koko vẹ izobo rẹ edjuo eje rẹ ihwo rẹ Izrẹl. Me vwẹ ayen kẹ wẹ vẹ emeshare wẹn kugbe emetẹ wẹn kerẹ ẹkẹn ri bẹdẹ. Kohwo kohwo rọ fonro vwẹ uwevwin wẹn sa riọ.
12 “Evwri ri me yovwin eje vẹ iwaini kpokpọ ri me yovwin eje kugbe eka na, emamọ rẹsosuọ rayen rẹ ayen vwọ kẹ Jihova, me vwẹ ayen kẹ wẹ.
13 Emamọ rẹsosuọ ri kemu kemu ro nẹ otọ rayen rhe rẹ ayen cha vwọ kẹ Jihova cha dia ọwẹn. Kohwo kohwo rọ fonro vwẹ uwevwin wẹn sa riọ.
14 “Kemu kemu ra vwọ kpahotọ* vwẹ Izrẹl cha dia ọwẹn.
15 “Kọmọkpako Kọmọkpako rẹ erọnvwọn eje* ri vwo arhọ rẹ ayen cha vwọ kpahotọ kẹ Jihova, owenẹ ọ dia ohworakpọ yẹrẹ eranvwe, me dia ọwẹn. Ẹkẹvuọvo o vwo obo rọ wanree, wọ me tan ọmọkpako rẹ ohworakpọ, wọ me je tan ọmọkpako rẹ eranvwe ri jẹfuọn rhivwin.
16 Wọ me vwẹ osa rẹ ọtanhirhe na vwọ tan ọke rọ dahẹ emeranvwe ọvo kpenu, vwo nene obo re rorori nẹ shẹkẹl* rẹ idọnọ ọfuanfon iyorin muru, vwo nene uwan ri shẹkẹl rẹ asan ọfuanfon na.* Igira* 20.
17 Ọmọkpako rẹ erhuẹn yẹrẹ omogodẹ ọshare rọ dia ọmọkpako yẹrẹ ọmọkpako rẹ ẹvwe ọvo yen wo che jẹ ẹtan. Ayen erọnvwọn efuanfon. Wọ me fẹrẹn ọbara rayen ku agbada na, wọ me je nẹrhẹ ivwri rayen bru ivwirhi kerẹ izobo ra vwẹ erhanre torhẹ ro gbon ọnrhe ọvwevwerhen kẹ Jihova.
18 Uvwo rayen me dia ọ rẹ ovwan. E me dia e rẹ ovwan kirobo rẹ evie rẹ izobo rẹ edjuo na kugbe owọrhen na hepha.
19 Utoro efuanfon na eje rẹ ihwo rẹ Izrẹl che toro kẹ Jihova, me vwẹ ayen kẹ wẹ vẹ emeshare wẹn kugbe emetẹ wẹn kerẹ ẹkẹn ri bẹdẹ. Ọyen ọphọ ri rhirin rẹ ughwanka* vwẹ obaro ri Jihova vwọ kẹ wẹ vẹ emọ wẹn ru wẹ vẹ ayen gba herọ.”
20 Jihova da ta kẹ Erọn: “Wo che vwo ughwẹ vwẹ otọ rayeen, o vwo ẹkẹn rẹ otọ vuọvo vwẹ ohri rayen rọ cha dia ọwẹẹn. Mẹvwẹ yen ẹkẹn kugbe ughwẹ wẹn vwẹ ohri rẹ ihwo rẹ Izrẹl.
21 “Asaọkiephana nighere, me vwẹ ẹkẹn ọvo rẹ ẹkẹn ihwe na eje vwẹ Izrẹl vwọ kẹ emọ ri Livae kerẹ ughwẹ fikirẹ iruo rẹ ayen ruẹ rọ dia ẹga rẹ utughẹ ra da vwoma na.
22 E jẹ ihwo rẹ Izrẹl rhe siẹkẹrẹ utughẹ ra da vwoma na ọfaa, ayen de ru ọtiọyen ayen cha riabe rẹ umwemwu ji ghwu.
23 Ihwo ri Livae na yen che ruiruo rẹ utughẹ ra da vwoma na, ayen yen cha rioja fikirẹ oruchọ rayen. Ọyen urhi ri bẹdẹ vwẹ uvwiẹ rẹ ovwan eje nẹ ayen vwo ughwẹ vuọvo vwẹ ohri rẹ ihwo rẹ Izrẹẹl.
24 Kidie me vwẹ ẹkẹn ọvo rẹ ẹkẹn ihwe rẹ utoro rẹ ihwo rẹ Izrẹl che toro kẹ Jihova vwọ kẹ ihwo ri Livae kerẹ ughwẹ. Kọyensorọ me vwọ vuẹ ayen nẹ, ‘Ayen vwo ughwẹ vuọvo vwẹ ohri rẹ ihwo rẹ Izrẹẹl.’”
25 Ọtiọyena Jihova da ta kẹ Mosis:
26 “Wọ me vuẹ ihwo ri Livae na nẹ, ‘Ovwan cha reyọ ẹkẹn ọvo rẹ ẹkẹn ihwe re me vwọ kẹ ovwan na vwo mie ihwo rẹ Izrẹl kerẹ ughwẹ rẹ ovwan, ovwan mi toro ẹkẹn ọvo rẹ ẹkẹn ihwe rẹ ẹkẹn ọvo rẹ ẹkẹn ihwe na kẹ Jihova.
27 Kọ cha dia utoro rẹ ovwan kerẹsiẹ ra da mrẹ eka rehẹ asan re de wonro ibi ekankọn yẹrẹ kemu kemu ro nẹ asan re de mie iwaini yẹrẹ evwri cha.
28 Idjerhe nana yen ovwan cha vwọ vwẹ utoro vwọ kẹ Jihova vwo nẹ ẹkẹn ọvo rẹ ẹkẹn ihwe eje rẹ ovwan reyọ mie ihwo rẹ Izrẹl, vwo nẹ evun rọyen rhe yen ovwan cha vwọ vwẹ oborẹ ovwan che toro kẹ Jihova vwọ kẹ Erọn rọ dia orherẹn na.
29 Koka koka rẹ utoro rẹ ovwan cha vwọ kẹ Jihova mi nẹ usun rẹ okẹ ri me yovwin ra vwọ kẹ ovwan kerẹ orọnvwọn rọ fonro rhe.’
30 “Wọ me ta kẹ ayen nẹ, ‘Ovwan de toro obo ri me yovwin vwẹ usun rayen, ke che no kerẹ obo ri nẹ asan re de wonro ibi ekankọn rhe kugbe obo ri nẹ asan re de mie iwaini yẹrẹ evwri rhe vwọ kẹ ihwo ri Livae na.
31 Ovwan vẹ evwruwevwin rẹ ovwan sa riọ vwẹ kasan kasan kidie ọyen osa rẹ ovwan fikirẹ iruo rẹ ẹga rẹ ovwan vwẹ utughẹ ra da vwoma na.
32 Ovwan cha riabe rẹ umwemwu vwẹ ọnanaa, takpe nẹ ovwan toro i ri me yovwin vwẹ usun rayen, ovwan gbe erọnvwọn efuanfon rẹ ihwo rẹ Izrẹl na ẹguaa, ovwan de ru ọtiọyen, ovwan che ghwu.’”
Eta rehẹ obotọ na
^ Vwẹ Hibru, “ọrhorha,” kọyen, ọshare ro nẹ orua rẹ Erọn rhee.
^ Vwẹ Hibru, “ọrhorha,” kọyen, ọshare ro nẹ orua ri Livae rhee.
^ Kọyen, kemu kemu re ru fon vwọ kẹ Ọghẹnẹ ra cha sa reyọ rhivwiin kugbe obo ra vwọ kpahotọ kẹ Ọghẹnẹ ra cha sa tan hirhee.
^ Vwẹ Hibru, “rẹ uvwo eje.”
^ Shẹkẹl ọvo vẹ igramu 11.4 abavo. Ni Apẹndis B14.
^ Yẹrẹ “shẹkẹl ọfuanfon na.”
^ Igira ọvo vẹ igramu 0.57 abavo. Ni Apẹndis B14.
^ Kọyen, ọphọ ri bẹdẹ ro wenee.
