Ukeri 4:1-49
4 Jihova da ta kẹ Mosis vẹ Erọn:
2 “Ovwan kere emọ ri Kohat vwo nẹ ohri rẹ emọ ri Livae, vwo nene erua rayen kugbe vwo nene iwevwin rẹ esẹ rayen,
3 ayen eje rehẹ ẹgbukpe 30 fiẹ 50 rehẹ ẹko ra vwẹ iruo kẹ vwẹ utughẹ ra da vwoma na.
4 “Ọnana yen iruo rẹ ẹga rẹ emọ ri Kohat vwẹ utughẹ ra da vwoma na. Ọyen orọnvwọn rọ ma fon:
5 Erọn vẹ emọ rọyen me rhe ọke rẹ ihwo rẹ Izrẹl da guọnọ vrẹn nẹ asan rẹ ayen wonphiyọ* na, ayen mi si ikọtini re vwo ru ohẹriẹ na no, ayen me reyọ vwo rhurhu ekpeti rẹ Oseri na.
6 Ayen me vwẹ ophiẹn rẹ eranvwe* vwo rhurho je vwẹ amwa rẹ iblu ro muru mamọ vwo rhurhu ọyena, ayen me chọrọ ekpọ re vwo muo na phiyọ asan rayen.
7 “Ayen me je vwẹ amwa rẹ iblu vwọ hwa enu rẹ imẹjẹ rẹ ibrẹdi re vwo dje na, ayen mi mu imize na, iko na, imize ikokodo na, kugbe ijọgu re vwo ze izobo rẹ udi na phiyọ enu rọyen; ibrẹdi re vwo ze izobo kọke kọke na me daji enu rọyen.
8 Ayen me vwẹ amwa ọvwavware vwo rhurhu ayen je vwẹ ophiẹn rẹ eranvwe vwo rhurhu amwa na, ayen me chọrọ ekpọ re che vwo muo phiyọ asan rayen.
9 Ayen ke cha reyọ amwa rẹ iblu vwo rhurhu ogburhukpẹ na ọtiọyen ji te irhukpẹ rọyen, orọnvwọn rọyen ra vwọ yọnrọn iwiki, orọnvwọn rọyen ra wan erhanre phiyọ, kugbe ukoko rọyen eje re kuẹ evwri phiyọ.
10 Ayen me vwẹ ophiẹn rẹ eranvwe vwọ pharọ vẹ ekuakua rọyen eje, ayen mi muo phiyọ urhe ogrongron re vwo muẹ orọnvwọn.
11 Ayen me je vwẹ amwa rẹ iblu vwo rhurhu agbada rẹ oro na, ayen me vwẹ ophiẹn rẹ eranvwe vwo rhurho ji phi ekpọ re vwo muo phiyọ asan rayen.
12 Ayen me reyọ ekuakua re vwo gbodibo eje rẹ ayen vwo gbodibo ọkieje vwẹ asan ọfuanfon na, ayen mi mu ayen phiyọ amwa rẹ iblu ọvo je vwẹ ophiẹn rẹ eranvwe vwo rhurhu ayen, ayen mi mu ayen phiyọ urhe ogrongron re vwo muẹ orọnvwọn.
13 “Ayen me ghwẹ iwurhie na vwo nẹ agbada na, ayen me vwẹ amwa rẹ ipọpo vwo rhurho.
14 Ayen mi mu ekuakua eje re vwo gbodibo vwẹ agbada na phiyọ: orọnvwọn ra vwọ wan erhanre na, ifọku* na, isaboro na, imize ikokodo na, kugbe ekuakua rẹ agbada na eje; ayen me vwẹ ophiẹn rẹ eranvwe vwo rhurho, ayen mi ji phi ekpọ re vwo muo na phiyọ asan rayen.
15 “Erọn vẹ emọ rọyen ki rhurhu asan ọfuanfon na vẹ ekuakua rẹ asan ọfuanfon na eje tavwen ayen ke ton oyan phiyọ, emọ ri Kohat mi rhe rhi mu ayen, ẹkẹvuọvo ayen djobọte asan ọfuanfon naa, ayen de ru ọtiọyen ayen che ghwu. Ọnana yen iruo* rẹ emọ ri Kohat vwẹ utughẹ ra da vwoma na.
16 “Ẹlieza ọmọ rẹ Erọn orherẹn na yen vwo iruo rọ vwọ vwẹrote evwri rẹ urhukpẹ na, insẹnsi ro gbon omamọ ọnrhe na, izobo rẹ eka ri kọke kọke na, kugbe evwri rẹ ẹjẹreyọ na. Ọyen vwẹrote itabanako na eje kugbe erọnvwọn eje rehẹ evun rọyen, ọtiọyen ji te asan ọfuanfon na kugbe ekuakua rọyen.”
17 Jihova da rhoma ta kẹ Mosis vẹ Erọn:
18 “Wo jẹ a ghwọrọ uvwiẹ rẹ orua rẹ ihwo ri Kohat na nẹ ohri rẹ ihwo ri Livae naa.
19 Ẹkẹvuọvo ru ọnana kẹ ayen rere ayen sa vwọ rhọ rẹ ayen vwo jeghwo kidie nẹ ayen sikẹrẹ erọnvwọn re ma fon na. Erọn vẹ emọ rọyen me ro evun rọyen, ayen me vuẹ ọvuọvo rayen iruo rayen kugbe oborẹ ayen che mu.
20 E jẹ ayen ro evun rọyen rhe mrẹ erọnvwọn efuanfon na tobọ vwẹ ọmọke dedee, ayen de ru ọtiọyen ayen che ghwu.”
21 Ọyena vwọ wan nu, Jihova da ta kẹ Mosis:
22 “E jẹ e kere emọ ri Gẹshọn vwo nene iwevwin rẹ esẹ rayen kugbe erua rayen.
23 Wo mi si edẹ rẹ ihwo eje rehẹ ẹgbukpe 30 fiẹ 50 rehẹ ẹko ra vwẹ iruo kẹ nẹ e ga vwẹ utughẹ ra da vwoma na phiyotọ.
24 Enana yen erọnvwọn ra vwọ kẹ erua ri Gẹshọn nẹ ayen vwẹrote ji mu:
25 Ayen che mu emwa rẹ utughẹ rẹ itabanako na, utughẹ ra da vwoma na, urhurho rọyen kugbe ophiẹn rẹ eranvwe re vwo rhurhu obenu rọyen, ohẹriẹ rẹ asan ra wan rua utughẹ ra da vwoma na,
26 ikọtini ra vwọ ya vwẹ otegodo na, ohẹriẹ rẹ asan ra wan rua otegodo na rọ riariẹ itabanako na kugbe agbada na phiyọ, ifi rẹ utughẹ na vẹ ekuakua rọyen eje kugbe erọnvwọn eje re vwo ruiruo rẹ ẹga vwọ. Ọnana yen iruo rayen.
27 Erọn vẹ emọ rọyen yen cha vwẹrote iruo kugbe eghwa rẹ ihwo ri Gẹshọn; wọ cha vwẹ eghwa nana eje kẹ ayen kerẹ iruo rayen.
28 Ọnana yen iruo rẹ erua rẹ ihwo ri Gẹshọn na che ru vwẹ utughẹ ra da vwoma na, ayen che ruiruo rayen vwo nene odjekẹ rẹ Itama ọmọ rẹ Erọn orherẹn na.
29 “Vwọ kẹ emọ ri Mẹrerai, wo che si edẹ rayen phiyotọ vwo nene orua kugbe vwo nene uwevwin rẹ ọsẹ rayen.
30 Wo che si edẹ rẹ ihwo rehẹ ẹgbukpe 30 fiẹ 50, ayen eje rehẹ ẹko ra vwẹ iruo kẹ nẹ e ga vwẹ utughẹ ra da vwoma na.
31 Ọnana yen oborẹ ayen che mu ro churobọ si ẹga rayen vwẹ utughẹ ra da vwoma na: ifremu rẹ itabanako na, ekpọ rọyen, ichivwo rọyen, inu rọyen;
32 ichivwo re riariẹ otegodo na phiyọ, inu rayen, ipẹrẹn rẹ utughẹ na kugbe ifi rayen, ọtiọyen ji te ekuakua rayen eje kugbe iruo rẹ ẹga na eje ri churobọ si enana. Ovwan me ghare oborẹ ohwo ọvuọvo che mu vwọ kẹ ayen.
33 Ọnana yen oborẹ erua rẹ emọ ri Mẹrerai che ruiruo rayen wan vwẹ utughẹ ra da vwoma na, vwo nene odjekẹ rẹ Itama ọmọ rẹ Erọn orherẹn na.”
34 Mosis vẹ Erọn kugbe isun rẹ ọghwẹgbe na de si edẹ rẹ emọ ri Kohat phiyotọ vwo nene erua rayen kugbe vwo nene uwevwin rẹ ọsẹ rayen,
35 ayen eje rehẹ ẹgbukpe 30 fiẹ 50 rehẹ ẹko ra vwẹ iruo kẹ nẹ e ga vwẹ utughẹ ra da vwoma na.
36 Ukeri rẹ ayen eje re si edẹ rayen phiyotọ vwo nene erua rayen da dia 2,750.
37 E si edẹ rẹ enana phiyotọ vwo nẹ erua rẹ ihwo ri Kohat, ayen eje re ga vwẹ utughẹ ra da vwoma na. Mosis vẹ Erọn si edẹ rayen phiyotọ vwo nene iji ri Jihova womarẹ Mosis.
38 E si edẹ rẹ emọ ri Gẹshọn phiyotọ vwo nene erua rayen kugbe vwo nene uwevwin rẹ ọsẹ rayen,
39 ayen eje rehẹ ẹgbukpe 30 fiẹ 50 rehẹ ẹko ra vwẹ iruo kẹ nẹ e ga vwẹ utughẹ ra da vwoma na.
40 Ukeri rẹ ayen eje re si edẹ rayen phiyotọ vwo nene erua rayen kugbe vwo nene uwevwin rẹ ọsẹ rayen da dia 2,630.
41 Enana yen edẹ rẹ erua rẹ emọ ri Gẹshọn re si phiyotọ, ayen eje re ga vwẹ utughẹ ra da vwoma na. Mosis vẹ Erọn si edẹ rayen phiyotọ vwo nene iji ri Jihova.
42 E si edẹ rẹ emọ ri Mẹrerai phiyotọ vwo nene erua rayen kugbe vwo nene uwevwin rẹ ọsẹ rayen,
43 ayen eje rehẹ ẹgbukpe 30 fiẹ 50 rehẹ ẹko ra vwẹ iruo kẹ nẹ e ga vwẹ utughẹ ra da vwoma na.
44 Ukeri rẹ ayen eje re si edẹ rayen phiyotọ vwo nene erua rayen da dia 3,200.
45 Enana yen edẹ rẹ erua rẹ emọ ri Mẹrerai re si phiyotọ, rẹ Mosis vẹ Erọn siri vwo nene iji ri Jihova womarẹ Mosis.
46 Mosis vẹ Erọn kugbe isun rẹ Izrẹl si edẹ rẹ ihwo ri Livae nana eje phiyotọ vwo nene erua rayen kugbe vwo nene iwevwin rẹ esẹ rayen;
47 ayen hẹ ẹgbukpe 30 fiẹ 50, a ghare iruo kẹ ayen eje rẹ ayen vwọ ga ji mu eghwa ri churobọ si utughẹ ra da vwoma na.
48 Ukeri rẹ ayen eje re si edẹ rayen phiyotọ da dia 8,580.
49 E si edẹ rayen phiyotọ vwo nene iji ri Jihova womarẹ Mosis, ọvuọvo rayen vwo nene iruo ra vwọ kẹ vẹ oghwa rọyen; e si edẹ rayen phiyotọ kirobo rẹ Jihova ji iji rọyen kẹ Mosis.
