Ukeri 19:1-22
-
Erhuẹn ọvwavware vẹ ame rẹ orufon na (1-22)
19 Jihova da rhoma ta ota kẹ Mosis vẹ Erọn, ọ da ta:
2 “Ọnana yen urhi rẹ Jihova jiri, ‘Vuẹ ihwo rẹ Izrẹl nẹ ayen reyọ inama ọvwavware rẹ oma rọyen gbare ro vwo oshechọ vuọvoo, ra je rhe gba urhekpe mu dẹvoo.
3 Ovwan me reyọ vwọ kẹ Ẹlieza orherẹn na, o mi suon kpo otafe rẹ asan rẹ ovwan wonphiyọ* na, ke che hwe vwẹ obaro rọyen.
4 Ọtiọyena Ẹlieza orherẹn na me reyọ evo vwẹ usun rẹ ọbara rọyen, ọ me vwẹ urhiobọ rọyen vwọ fẹrẹn ọbara na abọ ighwrẹn ku ẹbẹre rẹ obaro rẹ utughẹ ra da vwoma na.
5 A me torhẹ inama na vwẹ irharo rọyen. A me torhẹ ohọrọ rọyen, uvwo rọyen, ọbara rọyen kugbe isọn rọyen.
6 Orherẹn na me reyọ urhe rẹ isida, hisọp, kugbe amwa ọvwavware, o mi do ayen phiyọ erhanre ra vwọ torhẹ inama na.
7 Orherẹn na kọ cha fọnrhọn iwun rọyen je vwẹ ame vwọ họ oma rọyen,* ọyena da wan nu, kọ sa rhe asan rẹ ayen wonphiyọ na; ẹkẹvuọvo orherẹn na cha dia ẹdia ri jẹfuọn re te ovwọnvwọn.
8 “‘Ohwo rọ torhẹ inama na cha vwẹ ame vwọ fọnrhọn iwun rọyen je vwẹ ame vwọ họ oma rọyen,* kọ cha dia ẹdia ri jẹfuọn re te ovwọnvwọn.
9 “‘Ohwo rọ fonro mi koko iwurhie rẹ inama na, o mi ku ayen phiyọ asan rọ fonro vwẹ otafe rẹ asan rẹ ayen wonphiyọ na, ọghwẹgbe rẹ ihwo rẹ Izrẹl na me sẹro rayen rere ayen vwẹ ayen vwo muegbe rẹ ame rẹ orufon. Ọyen izobo rẹ umwemwu.
10 Ohwo ro koko iwurhie rẹ inama na cha fọnrhọn iwun rọyen je dia ẹdia ri jẹfuọn re te ovwọnvwọn.
“‘Ọnana cha dia urhi ri bẹdẹ vwọ kẹ ihwo rẹ Izrẹl vẹ ọrhorha rọ dia ohri rayen.
11 Kohwo kohwo ro djobọte ohwo ro ghwuru* cha dia ẹdia ri jẹfuọn vwẹ ẹdẹ ighwrẹn.
12 Ohwo tiọyena me vwẹ ame na vwo ru oma rọyen fon vwẹ ẹdẹ rerha na, vwẹ ẹdẹ righwrẹn na kọ cha fon. Ẹkẹvuọvo o rhe ru oma rọyen fon vwẹ ẹdẹ rerha naa, ọ cha fon vwẹ ẹdẹ righwrẹn naa.
13 Kohwo kohwo ro djobọte orivwin rẹ ohwo ro ghwuru* jẹ o ru oma rọyen foon gbe itabanako ri Jihova ẹgua, e che bru* ohwo* yena vwo nẹ Izrẹl. Ọ jehẹ ẹdia ri jẹfuọn kidie a je rhe fẹrẹn ame rẹ orufon na kuoo. Jẹfuọn rọyen na jehẹ oma rọyen.
14 “‘Ọnana yen urhi ro shekpahen ohwo ro ghwuru vwevunrẹ utughẹ: Kohwo kohwo rọ ro utughẹ na kugbe kohwo kohwo rọhẹ utughẹ na jovwo cha dia ẹdia ri jẹfuọn vwẹ ẹdẹ ighwrẹn.
15 Korọnvwọn korọnvwọn* ro rhiephiyọ ro vwo urhurhoo fonroo.
16 Kohwo kohwo rọhẹ udju ro rhiephiyọ ro djobọte ohwo ra vwẹ ọlọkọ hwe yẹrẹ orivwin yẹrẹ ubeku rẹ ohwo yẹrẹ asan ushi cha dia ẹdia ri jẹfuọn vwẹ ẹdẹ ighwrẹn.
17 Ayen me reyọ evo vwẹ usun rẹ iwurhie rẹ izobo rẹ umwemwu ra torhẹre na, ayen mi ku ame re vo nẹ urhie rhe phiyọ vwevunrẹ ukoko vwọ kẹ ohwo ro jẹfuọn na.
18 Ọtiọyena ohwo rọ fonro me reyọ hisọp, o mi duvwon phiyọ evunrẹ ame na, ọ me fẹrẹn ku utughẹ na vẹ erọnvwọn* eje kugbe ihwo* rehẹ etiyin vẹ ohwo ro djobọte ubeku na yẹrẹ ọ re hweri na yẹrẹ orivwin na yẹrẹ ushi na.
19 Ohwo rọ fonro na me fẹrẹn ku ọ ro jẹfuọn na vwẹ ẹdẹ rerha na kugbe ẹdẹ righwrẹn na, ko che ruo fon vwo nẹ umwemwu rọyen vwẹ ẹdẹ righwrẹn na; o de ru ọtiọyen nu, ọ me fọnrhọn iwun rọyen je vwẹ ame họ, kọ cha fon vwẹ ovwọnvwọn.
20 “‘Ẹkẹvuọvo ohwo ro jẹfuọn rọ rhọnvwe ru oma rọyen foon, ke bru* ohwo* yena nẹ ọghwẹgbe na, kidie o gbe asan ọfuanfon ri Jihova ẹgua. A fẹrẹn ame rẹ orufon na kuoo, ọtiọyena ọ fonroo.
21 “‘Ọnana cha dia urhi ri bẹdẹ vwọ kẹ ayen: Ohwo rọ fẹrẹn ame rẹ orufon na me fọnrhọn iwun rọyen, ọ ro djobọte ame na cha dia ẹdia ri jẹfuọn re te ovwọnvwọn.
22 Kemu kemu rẹ ohwo ro jẹfuọn na djobọte cha dia ẹdia ri jẹfuọn, ohwo* ro djobọte je cha dia ẹdia ri jẹfuọn re te ovwọnvwọn.’”
Eta rehẹ obotọ na
^ Yẹrẹ “ovwan mu erhọn phiyọ.”
^ Vwẹ Hibru, “uvwo rọyen.”
^ Vwẹ Hibru, “uvwo rọyen.”
^ Yẹrẹ “orivwin rẹ kerhi kerhi.” Ni Eta re Vwomaphia.
^ Yẹrẹ “orivwin, erhi ri kohwo kohwo ro ghwuru.” Ni Eta re Vwomaphia.
^ Yẹrẹ “hwe.”
^ Yẹrẹ “erhi.”
^ Yẹrẹ “Kukoko kukoko.”
^ Yẹrẹ “ikoko.”
^ Yẹrẹ “erhi.”
^ Yẹrẹ “ke hwe.”
^ Yẹrẹ “erhi.”
^ Yẹrẹ “erhi.”
