Ukeri 12:1-16
12 Asaọkiephana Miriam vẹ Erọn ke ta ota vwọsua Mosis fikirẹ aye ri Kush rọ rọvwọnre na, kidie ọ rọvwọn aye ri Kush.
2 Kẹ ayen ta: “Mosis ọvo yen Jihova wan oma rọyen vwọ ta ota? Ọ je rhe wan oma rẹ avwanre vwọ ta ota jovwo?” Jẹ Jihova kerhọ.
3 Asaọkiephana ọshare re se Mosis na yen ohwo rọ ma dia dẹndẹn kparobọ vwẹ usun rẹ ihwo eje* rehẹ otọrakpọ na.
4 Siẹvuọvo na, Jihova da ta kẹ Mosis vẹ Erọn kugbe Miriam: “Ovwan ro otafe, ovwan ihwo erha na, vwo kpo utughẹ ra da vwoma na.” Ọtiọyena ayen ihwo erha na da ro otafe.
5 Jihova de wontọ rhe vwevunrẹ osusu rẹ evwru na, o de mudia asan ra wan rua utughẹ na, o de se Erọn vẹ Miriam. Ayen ihwo ivẹ na da jowọ kpo obaro.
6 Ọ da ta: “Biko ovwan kerhọ rẹ eta mẹ. Ọ da dianẹ ọmraro ri Jihova hẹ ohri rẹ ovwan, mi che dje oma mẹ kẹ vwevunrẹ emramrẹ, me je cha ta ota kẹ vwevunrẹ evwerhẹn.
7 Ẹkẹvuọvo ọ dia ọtiọyen ọ hepha vwọ kẹ odibo mẹ Mosisii! Mi mu uwevwin mẹ eje phiyọ obọ rọyen.*
8 Mẹ vẹ ọyen hirharokuẹ ohwohwo* ọke me da ta ota kẹ, phephẹn, ọ dia womarẹ idoo; uhoho ri Jihova yen obo rọ mrẹ. Kẹ diesorọ oshọ rhe mu ovwan rẹ ovwan vwọ ta ota vwọso odibo mẹẹ, vwọso Mosis?”
9 Ọtiọyena ophu ri Jihova da tua kpahen ayen, ọ da yanjẹ ayen vwo.
10 Evwru na da kparoma nẹ enu rẹ utughẹ na, nighere! a da vwẹ oti vwọ ghwiẹ Miriam, kọ fuan kerẹ imicho. Erọn de ni Miriam, ọ da mrẹ nẹ a vwẹ oti vwọ ghwiẹ.
11 Ugege yena Erọn da ta kẹ Mosis: “Me rẹ wẹ ọrovwovwe! Biko wọ vwẹ oja ria avwanre fikirẹ umwemwu nanaa! Emu rẹ ẹkpa yen avwanre ruru na.
12 Biko, wo jẹ ọ rha dia kerẹ ohwo ro ghwuru rẹ ẹbẹre ọvo rẹ uvwo rọyen gbon kufia ọke re vwo vwiẹẹ!”
13 Mosis ko kperẹ se Jihova rọ vwọ ta: “E Ọghẹnẹ, biko sivwon! Biko!”
14 Jihova da kpahen kẹ Mosis: “Ọsẹ rọyen de dje enya ku opharo rọyen jovwo, ọ rha dia ẹdia rẹ ophọphọvwe ẹdẹ ighwrẹn? E jẹ e sio nẹ ohri rẹ ihwo vwẹ ẹdẹ ighwrẹn rere ọ dia otafe rẹ asan rẹ ovwan wonphiyọ* na, ọyena da wan nu, ka sa reyọ rhivwin rhe.”
15 Ọtiọyena e de si Miriam nẹ ohri ri ihwo vwo kpo otafe rẹ asan rẹ ayen wonphiyọ na vwẹ ẹdẹ ighwrẹn, ihwo na rhe vrẹn nẹ asan rẹ ayen wonphiyọ naa, bẹsiẹ ra vwọ reyọ Miriam rhivwin rhe.
16 Ọyena vwọ wan nu, ihwo na de vrẹn nẹ Hazirọt, ayen de wonphiyọ aton ri Peran.
