Ukeri 25:1-18
25 Ọke rẹ Izrẹl vwọ dia Shitim, ihwo na vẹ emetẹ ri Moab ke ton ọfanrhiẹn egbe phiyọ.
2 Eya na de durhie ihwo na vwo kpo izobo eze rẹ eghẹnẹ rayen, ihwo na ke ria je vwẹ uyovwin kpotọ vwọ kẹ eghẹnẹ rayen.
3 Ọtiọyena Izrẹl da vwomaba ẹga ri Bel ri Piọ, ophu de mu Jihova gangan kpahen Izrẹl.
4 Jihova da ta kẹ Mosis: “Reyọ isun* rẹ ihwo nana rere wọ vwẹ ayen vwọ ya vwẹ obaro ri Jihova vwẹ aruphẹn,* rere ophu ọgangan rẹ Jihova muẹ kpahan Izrẹl na vwo fuen.”
5 Ọtiọyena Mosis da ta kẹ iguẹdjọ rẹ Izrẹl: “E jẹ ọvuọvo rẹ ovwan hwe eshare rọyen re vwomaba ẹga ri Bel ri Piọ.”
6 Vwẹ ọke yena vuọvo na, ọvo vwẹ usun rẹ ihwo rẹ Izrẹl na kọ reyọ aye ri Midian ọvo cha asan rẹ iniọvo rọyen hepha vwẹ irharo ri Mosis vẹ ọghwẹgbe rẹ ihwo rẹ Izrẹl eje, ọke rẹ ayen vwọ viẹ vwẹ asan ra wan rua utughẹ ra da vwoma na.
7 Ọke rẹ Finihas ọmọ rẹ Ẹlieza ọmọ rẹ Erọn orherẹn na vwọ mrẹ, ugege yena, o de vrẹn nẹ ohri rẹ ọghwẹgbe na, ọ da reyọ oshuẹ.*
8 Ọ da vwọ kpahen ọshare rẹ Izrẹl na ro utughẹ na, o de duvwun ayen ihwo ivẹ na fi, ọshare rẹ Izrẹl na fiẹ oma rẹ aye na. Ọtiọyena ọtiekọ rọhẹ ohri rẹ ihwo rẹ Izrẹl na da dobọji.
9 Ihwo ri ghwuru fikirẹ ọtiekọ na da dia 24,000.
10 Jihova da ta kẹ Mosis:
11 “Finihas ọmọ rẹ Ẹlieza ọmọ rẹ Erọn orherẹn na nẹrhẹ ophu ri mi muẹ kpahan ihwo rẹ Izrẹl na fuen re, kidie ọ vwẹ uphẹn kẹ jẹ evun ẹfuọn vuọvo vwọ kpahen ovwẹ vwẹ ohri rayeen. Fikirẹ ọtiọyena me rha ghwọrọ ihwo rẹ Izrẹẹl dede nẹ me guọnọ ẹga ọsoso.
12 Ọtiọyena vuẹ nẹ, ‘Me vwẹ ọphọ rẹ ufuoma mẹ vwọ kẹ.
13 Kọ cha dia kerẹ ọphọ rẹ ẹdia rẹ orherẹn ri bẹdẹ vwọ kẹ vẹ emọ rọyen re cha vwẹ obuko, kidie ọ vwẹ uphẹn kẹ jẹ evun ẹfuọn vuọvo vwọ kpahen Ọghẹnẹ rọyeen, o ji ru arhuẹrẹ vwọ kẹ ihwo rẹ Izrẹl.’”
14 Dakẹ odẹ rẹ ọshare rẹ Izrẹl re hweri vẹ aye ri Midian na Zimrai ọmọ ri Selu, osun rẹ uwevwin rẹ ọsẹ ọvo vwẹ uvwiẹ ri Simiọn.
15 Odẹ rẹ aye ri Midian re hweri na yen Kọzbai ọmọtẹ ri Zọ; Zọ ọyen osun rẹ erua rẹ uwevwin rẹ ọsẹ ọvo vwẹ Midian.
16 Jihova da rhoma ta kẹ Mosis:
17 “Ovwan kpokpo ihwo ri Midian na rere ovwan teyen ayen hwe,
18 kidie ayen vwẹ idjerhe rẹ oriẹriẹvwe vwọ họnra ovwan womarẹ irueru ri Piọ kugbe ọ ri Kọzbai ọmọte rẹ osun ri Midian ọvo, oniọvo rayen re hweri vwẹ ẹdẹ rẹ ọtiekọ vwọ vwomaphia fikirẹ irueru ri Piọ.”
