Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2014

Amui-tahi-raa o te mau haapaoraa atoa—Tera anei ta te Atua ravea?

Amui-tahi-raa o te mau haapaoraa atoa—Tera anei ta te Atua ravea?

“E tahoê anei te haapaoraa ia tatou aore ra e faaamahamaha?” Tera tei uihia i te feia taio i te vea The Sydney Morning Herald. E 89 i nia i te hanere tei pahono e te faaamahamaha ra te haapaoraa i te taata.

MEA taa ê roa râ te mana‘o o te feia e faaitoito nei ia amui te mau haapaoraa atoa. Ua ani Eboo Patel tei haamau i te pǔpǔ amui tahi haapaoraa Youth Core, “a faaite mai na i te hoê haapaoraa o te ore e aroha . . . , o te ore e paruru i te natura . . . , o te ore e farii maitai i te taata.”

Ua haa amui te mau Bouddhistes, Katolika, Porotetani, Hindous, Mahometa e e rave rahi atu haapaoraa no te faaore i te veve, paruru i te tiaraa o te taata, opani i te mau ofai paaina hunahia i roto i te repo aore ra no te faaite i te mau fifi i tupu i te pae o te natura. Ua haaputuputuhia e rave rahi haapaoraa no te imi i te ravea ia hoê to ratou mana‘o e ta ratou poroi. Te faatupu nei ratou i te oroa no te faahanahana i to ratou amui-tahi-raa ma te faaama i te mau mori hinu, ma te himene, ma te pure e te vai ra ’tu â.

E tahoê anei te taata maoti te amui-tahi-raa o te mau haapaoraa atoa? Tera anei ta te Atua ravea no te taui i teie nei ao?

IA TAHOÊ, MA TEIHEA RÂ RAVEA?

Te faatietie nei hoê amui-tahi-raa haapaoraa rahi i ta ratou pǔpǔ no te mea e melo ta ratou no roto mai hau atu e 200 haapaoraa. Te haa atoa ra hoi tera pǔpǔ i roto e 76 fenua. Teie ta ratou fa, “te faaiteraa i te faaoromai e te haa-amui-raa e te mau haapaoraa i te mau mahana atoa.” Mea ohie a‘e râ ia parau i te rave! Ia au i te feia i haamau i tera pǔpǔ, ua titauhia ia haapao maitai i te mau parau o ta ratou mau faatureraa ia ore te mau melo o ta ratou amui-tahi-raa no roto mai i te mau haapaoraa e opu taata atoa ia huru ê. No te aha? Aita te taatoaraa i farii ia faahitihia te parau Atua. I te pae hopea, aita iho â te reira i faaohipa-a‘e-hia i roto i te mau faatureraa.

Ia ore te Atua e haapaohia, teihea ’tura ïa te parau o te faaroo? Eaha te taa-ê-raa o te hoê pǔpǔ amui-tahi-raa haapaoraa e te hoê faanahonahoraa tauturu i te taata? Ua parau to ratou mau taata e e ere ratou mai te hoê haapaoraa, mai te tahi “faanahonahoraa râ e haafaufaa i te haa-amui-raa.”

E NAVAI ANEI IA HAAFAUFAA I TE MEA MAITAI?

Te turu ra te Dalai Lama i te amui-tahi-raa o te mau haapaoraa atoa. Te na ô ra oia, “hoê â poroi ta te rahiraa haapaoraa: te here, te aroha e te faaoreraa  i te hara. Te mea faufaa, ia faaitehia tera mau huru i roto i to tatou oraraa i te mau mahana atoa.”

Mea faufaa iho â te here, te aroha e te faaoreraa i te hara. Ei haapotoraa, ma te faaite i tera mau huru maitatai, te haapaohia ra ïa te ture auro. Ua parau hoi Iesu: “E te mau mea atoa ta outou i hinaaro ia vetahi ê ra, e na reira atoa ’tu outou ia ratou.” (Mataio 7:12) Tera râ, e navai anei ia haafaufaa i te mea maitai no te faatupu i te faaroo mau?

Ua na ô te aposetolo Paulo no te feia e parau ra e tavini i te Atua i to ’na ra tau: “O vau te ite ia ratou, e itoito to ratou i ta te Atua, e ere râ i te itoito ite.” Eaha te fifi? Te pahono ra Paulo: “No to ratou ite ore i te parau-tia a te Atua, o ratou hoi i titau ia tupu ta ratou iho parau-tia.” (Roma 10:2, 3) Aita ratou i ite i to te Atua hinaaro, ua faufaa ore ïa to ratou itoito, na reira atoa to ratou faaroo.—Mataio 7:21-23.

TO TE BIBILIA MANA‘O I TE AMUI-TAHI-RAA O TE MAU HAAPAORAA ATOA

Ua na ô Iesu: “E ao to tei faatupu i te parau hau.” (Mataio 5:9) Ua haa Iesu ia au i ta ’na i poro. Aita oia i faaitoito ia rave i te ino, ua faaite râ i te tahi poroi o te hau i te feia no te mau haapaoraa atoa. (Mataio 26:52) Ua nehenehe tei farii i ta ’na poroi e faaite i te here mau e tahoê. (Kolosa 3:14) Ua hinaaro anei Iesu ia haa amui te taata no te mau haapaoraa atoa no te faatupu i te hau? E o ’na, tera anei ta ’na i rave?

Ma te haavarevare, ua patoi te mau tia haapaoraa Pharisea e Sadukea ia Iesu e ua hinaaro roa e haapohe ia ’na. Ua nafea o ’na? Ua faaue Iesu i ta ’na mau pǐpǐ: “E vaiiho noa ’tu, e matapo aratai matapo.” (Mataio 15:14) Aita Iesu i faaitoito a‘e ia amui e tera mau taata.

I muri a‘e, ua haamauhia te hoê amuiraa Kerisetiano i te oire Korinetia i Heleni. E rave rahi haapaoraa i reira e e mea farii-roa-hia te mau parau e tiaturiraa atoa. Mai te aha te huru o te mau Kerisetiano e tia ’i? Ua papai te aposetolo Paulo ia ratou: “Eiaha outou ia amui-au-ore-hia i te feia faaroo ore.” No te aha? Ua haaferuri Paulo ma te na ô: “Eaha to te Mesia auraa ia Behala [aore ra Satani]? e eaha to te taata faaroo ra faufaa i te taata faaroo ore?” I muri iho, ua horoa i teie a‘oraa: “E haere mai outou i rapae au mai roto mai ia ratou ra, ia taa ê outou.”—Korinetia 2, 6:14, 15, 17.

Aita roa ïa te Bibilia e haapii ra ia amui te mau haapaoraa atoa. E na ô paha oe, e nafea ïa te taata e tahoê ai?

TE TAHOÊ MAU I TE TAATA

Ua haa amui tau 15 nunaa no te hamani i te tahi pu maimiraa i roto i te reva. I to oe mana‘o, e tupu anei tera opuaraa ahiri aita tera mau nunaa i hoê no nia i te hoho‘a matini e hamani?

Tera te tupuraa o te mau pǔpǔ amui-tahi-raa haapaoraa atoa. Noa ’tu e te haafaufaa nei ratou i te haa-amui-raa e i te faatura, aita ratou i hoê no nia i te hoho‘a aore ra i te ravea e faatupu ai te taata i te faaroo. E faaamahamaha noa iho â ïa te mau mana‘o e haapiiraa a te mau haapaoraa i roto.

Tei roto i te Bibilia ta te Atua mau aratairaa, e au hoi te reira i te hoê hoho‘a. E nehenehe tatou e haapao i ta te Bibilia e haapii ra. Ua na reira vetahi e aita ’tura i hi‘o ino faahou i te taata no te fenua ê e no te tahi atu haapaoraa. Ua haapii atoa ratou ia haa amui ma te hau e te tahoê. Ma te tohu i te reira, ua parau te Atua: “Ei reira vau e tuu atu ai i te parau maitai i te taata nei, ia tiaoro paatoa ratou i te i‘oa o Iehova, e ia haamori ia ’na ma te aau hoê.” E tahoê te taata ia haapaohia “te parau maitai,” ta te Atua ïa mau aratairaa no nia i te haamoriraa.—Zephania 3:9; Isaia 2:2-4.

Te titau manihini atu nei te mau Ite no Iehova ia haere i te tahi Piha a te Basileia piri i to oe nohoraa e ia ite i te hau e te tahoê taa ê e vai ra i rotopu ia ratou.—Salamo 133:1.