Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2014

 UA TAUI TE BIBILIA I TO ’U ORARAA

Ua faaohipa i te Bibilia no te pahono i te mau uiraa atoa!

Ua faaohipa i te Bibilia no te pahono i te mau uiraa atoa!
  • MATAHITI FANAURAA: 1950

  • FENUA: PANIORA

  • AAMU: PARETENIA KATOLIKA

NA MUA ’‘E:

I to ’u fanauraahia, e fare faaamu animara iti ta to ’u na metua i te mataeinaa i Galice i te pae apatoerau tooa o te râ o Paniora. O vau te maha o ta raua na tamarii e vau e e mea oaoa roa to matou oraraa. I Paniora, i tera ra tau, ua matauhia ia haere hoê tamarii i te haapiiraa perepitero aore ra i te fare paretenia. I roto i te utuafare, e toru matou tei rave i tera faaotiraa.

E 13 matahiti to ’u a haere ai i te fare paretenia i Madrid to reira atoa hoi to ’u tuahine. Mea huru ê roa te oraraa i ǒ, eita hoi e nehenehe e faahoa ia vetahi ê. E mau faatureraa, pure e opaniraa ana‘e i reira. I te poipoi roa, noa ’tu e aita vau i ara maitai atura, e putuputu matou i roto i te fare pure no te feruriruri. I muri a‘e, e himene e e faaoti matou i te pureraa na roto i te reo Latino, aita râ vau i taa noa ’‘e i te reira. No ’u, aita te Atua e tâu‘a maira ia ’u. I te mau mahana atoa, eita e nehenehe e paraparau. Noa ’tu e e hinaaro mâua to ’u tuahine e farerei, e faatia-noa-hia mâua ia parau: “Iaorana e Maria peata.” E vaiiho te mau paretenia ia matou ia paraparau e 30 minuti i muri a‘e i te taime tamaaraa. Mea taa ê roa ïa i to matou oraraa i te fare! Ua moemoe roa vau e e pinepine au i te ta‘i.

Noa ’tu e aita vau i faatupu i te taairaa piri e te Atua, e 17 to ’u matahiti a riro mai ai ei paretenia. Ua rave noa vau i tei parauhia mai e aita i maoro ua haamata vau i te uiui e ua maiti-mau-hia anei au no tera toroa. I parau noa na te mau paretenia e ia feruri te tahi mai tera, tei te po auahi to ratou hopearaa! Noa ’tu râ, ua tamau vau i te feaa. Ua ite au e aita Iesu i faataa ê ia ’na i te taata, ua haapii e ua tauturu noa râ ia ratou. (Mataio 4:23-25) I te 20raa o to ’u matahiti, ua faaoti au i te faarue i tera vahi. Ma te maere, ua parau mai te vahine faatere o te mau paretenia e mai te peu e tera ta ’u faaotiraa, e mea maitai ia haere oioi au i rapae. No ’u, ua riaria paha o ’na ia turai au i te tahi atu mau tamahine ia na reira atoa. Ua faarue ïa vau i tera vahi.

 Ua farii maitai mai to ’u na metua a ho‘i ai au i te fare. I te mea râ e aita e ohipa i to matou mataeinaa, ua haere au e ora i pihai iho i te tahi o to ’u taeae i Heremani. Tei roto o ’na i te hoê pǔpǔ Communiste no te mau Paniora i faarue i to ratou fenua. Aita vau i taiâ i te apiti e tera mau taata no te paruru i te mau rave ohipa e no te haa ia hoê â te tiaraa o te vahine e to te tane. Ua riro vau ei Communiste e ua faaipoipo i te tahi taata o tera pǔpǔ. No ’u, mea faufaa te ohipa ta ’u e rave ra oia hoi, te opereraa i te mau papai Communiste e te apitiraa i te mau taahiraa no te patoi.

Tera râ, ua feaa faahou vau. No ’u, e pinepine aita te mau Communiste e rave ra i ta ratou e parau ia vetahi ê. Ua rahi roa ’tu â te reira a tutui ai vetahi taata o ta matou pǔpǔ i te piha ohipa no te paruru i te tiaraa o te mau Paniora i Francfort i 1971. Ua na reira ratou no te patoi i te ohipa tia ore a te faatereraa haavî i Paniora. No ’u râ, e ere tera te ravea maitai no te faaite i te mauruuru ore.

I muri a‘e i te fanauraa i ta ’u tamarii matamua, ua parau vau i ta ’u tane e eita vau e haere faahou i te putuputuraa a te mau Communistes. Ua moemoe roa râ vau, aita hoi to ’u mau hoa i haere mai e farerei ia ’u e ta ’u aiû. Ua feruri au i te tumu mau o te oraraa e ua uiui e mea faufaa anei ia haa no te taui i te oraraa o te taata?

UA TAUI TE BIBILIA I TO ’U ORARAA:

I 1976, e piti Ite no Iehova Paniora tei patoto i to mâua opani e tei pûpû mai vetahi papai Kerisetiano ta ’u i farii. A farerei faahou ai matou, e rave rahi uiraa ta ’u no te ite no te aha te mauiui e te ohipa tia ore e tupu ai e no te aha e oraraa fana‘o to vetahi i te tahi atu. Ua maere roa vau a faaohipa ’i raua i te Bibilia no te pahono i te mau uiraa atoa! Ua farii oioi au i te haapii i te Bibilia.

I te haamataraa, mea au na ’u te haapiiraa Bibilia. Ua oaoa roa ’tu râ vau a haere ai mâua ta ’u tane i te putuputuraa i te Piha a te Basileia a te mau Ite no Iehova. I tera taime, e piti ta mâua tamarii. Ua farii te mau Ite no Iehova i te haere mai e tii ia matou e ua tauturu mai ia haapao i ta mâua tamarii i te putuputuraa. Ua putapû roa vau i te huru o te mau Ite no Iehova.

Noa ’tu râ, ua feaa noa vau no te tahi mau tiaturiraa. Ua faaoti au i te haere e farerei i to ’u fetii i Paniora. Ei perepitero, ua tamata te taeae o papa i te turai ia ’u ia faaea i te haapii i te Bibilia. Ua tauturu rahi mai râ te mau Ite no Iehova i Paniora. Ua pahonohia hoi ta ’u mau uiraa e te Bibilia mai ta te mau Ite no Iehova i Heremani i rave. Faaoti a‘era vau i te haapii faahou i te Bibilia ia ho‘i au i Heremani. Noa ’tu e aita ta ’u tane i na reira, ua tapea vau i ta ’u parau e i 1978, ua bapetizohia vau ei Ite no Iehova.

TO ’U FAUFAARAAHIA:

Ua ite au i te oaoa mau e te aratairaa papu i roto i te oraraa maoti te ite o te parau mau Bibilia. Ia au i te Petero 1, 3:1-4, te faaitoitohia ra te mau vahine ia “auraro maite” i ta ratou tane ma te faatura e ia faaite i te “aau mǎrû e te mamahu, o te mea tao‘a rahi ïa i mua i te aro o te Atua.” Na tera mau aratairaa i tauturu mai ia riro ei vahine Kerisetiano e ei metua vahine maitai.

E 35 matahiti i teie nei to ’u riroraa mai ei Ite no Iehova. Te oaoa nei au i te tavini i te Atua e to ’u mau taeae e tuahine Kerisetiano e i te ite e maha o ta ’u e pae tamarii i te na reira atoa.