Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2014

E nehenehe e patoi i te faahemaraa!

E nehenehe e patoi i te faahemaraa!

“Aita vau i hinaaro e mataitai i te hoho‘a faufau. Ua haere râ vau i nia i te Internet e faura mai nei te hoê poroi faatianiani. Ua pata noa vau i nia iho e matara mai nei te reira.”—CODY. *

“I te vahi raveraa ohipa, ua faahinaaro te tahi vahine haviti ia ’u. I te hoê mahana, ua parau mai o ’na ia haere i te hotera no te faaanaanatae noa ia mâua. Ua taa maitai râ ia ’u i ta ’na i hinaaro.”—DYLAN.

I ROTO i te aau o vetahi, e ohipa hauti te faahemaraa. No te tahi atu, e enemi ïa te reira. Eaha to oe mana‘o? I mua i te faahemaraa, e fati anei oe aore ra e patoi?

Eita paha to oe oraraa e ino roa i te amuraa i te tahi faraoa monamona ma te huna. Eaha râ te huru ia fati oe i mua i te tahi atu faahemaraa, mai te mau ohipa e turai i te taata ia rave i te peu faufau? Te faaara ra te Bibilia:“O tei moiheuo [aore ra faaturi] râ, e maamaa rahi ïa; o tei na reira ra, ua taparahi ïa ia ’na iho.”—Maseli 6:32, 33.

Ia hinaaro aore ra ia turaihia oe ia rave i te peu faufau, eaha te rave? Te na ô ra te Bibilia: “Teie hoi to te Atua hinaaro ia haamaitaihia outou; ia ore outou ia faaturi; ia ite to outou atoa e ati noa ’‘e i te vaiiho i to ’na iho tino ma te maitai e te tura.” (Tesalonia 1, 4:3, 4) E nafea ia ore ia fati i mua i te faahemaraa? E hi‘opoa ana‘e e toru mana‘o o te tauturu atu.

Mana‘o 1: A haavî i to oe mata

E rahi atu â te mau hinaaro tia ore ia mataitai tatou i te hoho‘a faufau. Ua haapapu Iesu e e tupu te hinaaro i ta to tatou mata e hi‘o ra. Ua faaara ïa oia: “O te hi‘o noa ’tu i ta vetahi ê ra vahine ei faatupu i te hinaaro, ua faaturi ïa ia ’na i to ’na ihora aau.” Ua faarahi atu â oia ta ’na i parau i teie a‘oraa: “E te hapa na oe i to mata atau, e ohiti e faarue ê atu.” (Mataio 5:28, 29) Eaha te haapii mai? No te patoi i te faahemaraa, e mea tia ia haa oioi e ia ore e mataitai i te mau hoho‘a faufau.

Ia ite oe i te hoho‘a faufau, a fariu ê i to mata

 A feruri na tei mua oe i te taata e faaohipa ra i ta ’na matini tapiri tapau. Ia ite oe i te mori purapura, e tamau anei oe i te hi‘o i te reira? Eita, e fariu ê aore ra e ape oe ia ore to oe mata ia ino. A na reira atoa i mua i te hoho‘a faufau i roto i te mau papai, afata teata, Internet e te vai ra ’tu â. Ia ore, e fa mai te mau mana‘o faufau. I mataitai noa na Juan i te hoho‘a faufau na mua ’‘e, te na ô ra o ’na: “Ia ite vau i te vahine nehenehe, e pinepine au i te hinaaro e hi‘o noa ia ’na. E haavî râ vau ia ’u no te hi‘o i te vahi ê e e na ô vau ia ’u, a pure ia Iehova! Haaviti, a pure oe i teie nei! I muri a‘e, e ore tera hinaaro tia ore.”—Mataio 6:9, 13; Korinetia 1, 10:13.

E taata taiva ore Ioba, a hi‘o na i ta ’na i parau: “Ua faaau vau i te faufaa i o ’u nei pue mata; e eiaha vau e tiatonu i te paretenia.” (Ioba 31:1) No te aha e ore ai e rave atoa i tera faaotiraa?

Ta oe e rave: Ia ite oe i te hoho‘a faufau, ia oioi oe i te fariu ê i to mata. A pee i te hi‘oraa o te taata papai Bibilia tei na ô i roto i te pure: “E faafariu ê i tau mata ia ore ia hi‘o i te mea faufaa ore.”—Salamo 119:37.

Mana‘o 2: A haavî i to oe feruriraa

Mea tia ore tatou paatoa, e tupu mai iho â ïa te mau hinaaro tano ore. Te na ô ra te Bibilia: “Ua haavarehia râ te taata ia faahahau-ê-hia, e ia riro noa ’tu i to ’na iho hinaaro tia ore. E ua tô ana‘e taua hinaaro tia ore ra, fanau maira ta ’na, o te hara.” (Iakobo 1:14, 15) E nafea ia ore ia hema a ino atu ai to oe oraraa e ia ore ia riro ei tîtî no tera mau hinaaro?

Ia fa mai te mana‘o faufau, a vaiiho i ta oe ohipa e a pure

Ia tupu mai te tahi hinaaro tano ore, a haamana‘o e na oe e faaoti e nafea. A patoi i tera mau hinaaro e eiaha e mana‘ona‘o i te reira. Eiaha roa e feruri noa i te peu faufau. I matau na Troy i te mataitai i te hoho‘a faufau i nia i te Internet. Te na ô ra oia: “Ua tutava vau i te faaore i te mau mana‘o ino ma te feruri i te mau ohipa maitatai. E ere i te mea ohie. E rave rahi taime, ua hara faahou vau. I muri a‘e râ, ua nehenehe au e haavî i to ’u feruriraa.” I to ’na apîraa, ua tutava te vahine  ra o Elsa i te haapae i te rave i te peu faufau. Te na ô ra o ’na: “Ma te ohipa noa e ma te pure ia Iehova, ua faaea roa vau i te mana‘o i te reira.”

Ta oe e rave: Ia fa mai te mana‘o faufau, a vaiiho i ta oe ohipa e a pure. A feruri i “te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitatai ra; te vai na te tahi maitai e te tahi mea haamaitai ra.”—Philipi 4:8.

Mana‘o 3: A vai ara

Te vai ra ana‘e te hinaaro, te faahemaraa e aita hoê a‘e haafifiraa, e hema ohie noa oe. (Maseli 7:6-23) E nafea ïa?

“E haere noa vau i nia i te Internet to reira ana‘e te taata”

Teie te a‘oraa paari a te Bibilia: “E ite te taata haapao i te ino, e ua ape ihora; te haere noa ra râ te ite ore e pohe atura.” (Maseli 22:3) A vai ara ïa! A feruri i te nehenehe e turai ia oe i roto i te fifi e a ape i te reira. (Maseli 7:25) Ua faaea roa Filipe i te mataitai i te hoho‘a faufau, te na ô ra oia: “Ua tuu vau i te matini roro uira a te utuafare i te vahi e nehenehe ai matou paatoa e ite i te reira. Ua rave atoa mai au i te tahi ravea roro uira no te ore e haere i nia i te tahi mau reni Internet. E haere noa vau i nia i te Internet to reira ana‘e te taata.” Te na ô atoa ra Troy tei faahitihia ’tu: “E haapae au i te mataitai i te hoho‘a e faatupu i te hinaaro, eita atoa vau e amui i te feia e paraparau hanoa no nia i te peu faufau. Eita vau e hinaaro e imi i to ’u iho ati.”

Ta oe e rave: A hi‘opoa maitai ia oe no te ite i to oe mau paruparu. A feruri atoa i te nehenehe e faahema ia oe no te vai ineine noa.—Mataio 6:13.

EIAHA E TAORA I TE TAUERA!

Noa ’tu ta oe mau tutavaraa, e hema paha oe. E nafea ïa? Eiaha e taora i te tauera e a faaitoito. Te na ô ra te Bibilia: “E hi‘a te parau-tia e ia taihitu noa ’tu i te hi‘araa, e e tia faahou mai.” (Maseli 24:16) Oia mau, te faaitoito maira to tatou Metua i te ra‘i ra ia “tia.” E farii anei oe i ta ’na tauturu î i te here? Eiaha ïa e faaea i te fariu i te Atua na roto i te pure e a faatupu i te faaroo ma te haapii i ta ’na Parau. No te tapea i ta oe faaotiraa, a haere i te mau putuputuraa Kerisetiano. A haamana‘o i ta te Atua parau fafau: “E faaetaeta vau ia oe, e tauturu vau ia oe.”—Isaia 41:10.

Te na ô ra Cody tei faahitihia i te omuaraa: “E ere i te mea ohie no ’u ia faaea i te mataitai i te hoho‘a faufau. E rave rahi taime, ua hema faahou vau. Ma te tauturu râ a te Atua, ua ore roa tera peu.” Te parau atoa ra Dylan: “Mea ohie roa no ’u ia taoto e to ’u hoa rave ohipa, ua faaoti papu râ vau i te pahono ia ’na ‘Aita!’ Mea au a‘e te hoê mana‘o haava mâ e hau roa ’tu â, ua ite au e ua faaoaoa vau i te aau o Iehova.”

Ia ore oe ia fati i mua i te faahemaraa, a patoi i te reira, e faaoaoa atoa ïa oe i te aau o te Atua!—Maseli 27:11.

^ par. 2 Ua tauihia te mau i‘oa.

No te ite atu â

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.