E oraraa oaoa to Iesu—No te aha?
UA OAOA iho â anei Iesu? Ua ora hoi oia i roto i te hoê utuafare riirii e aita rea faufaa ta ˈna. Oia mau, “aita o na tuaroi.” (Luka 9:57, 58) Hau atu â, ua ririhia, faainohia e haapohehia o ˈna e to ˈna mau enemi.
E na ô paha oe, ‘No ˈu, e ere tera te oraraa oaoa!’ Mea rahi atu â te haapii mai i te oraraa o Iesu. E hiˈopoa anaˈe e maha tuhaa.
1. TA IESU FA I ROTO I TE ORARAA—E RAVE I TO TE ATUA HINAARO.
“Teie ta ˈu maa, o te haapao i to ˈna hinaaro o to tei tono mai ia ˈu nei.”—Ioane 4:34.
Ma ta ˈna mau parau e ohipa, ua tutava Iesu i te rave faahope i te hinaaro o to ˈna Metua i te raˈi ra o Iehova. * Ua oaoa mau Iesu i te na reira. Ia au i te irava i nia ˈtu, ua tae roa oia i te faaau atu i te maa. A hiˈo na eaha tei tupu hou a faahiti ai oia i tera mau parau.
I hahaere na oia na roto i te oire o Samaria i te poipoi taatoa. I te avatea, ua poia iho â ïa Iesu. Na ô atura ta ˈna mau pǐpǐ: “E Rabi, a amu.” (Ioane 4:6, 31) Pahono atura oia i tei faahitihia ˈtu na. Ma ta ˈna pahonoraa, ua faaite Iesu e ua mahâ to ˈna mau hinaaro e ua itoitohia oia i te rave i ta te Atua ohipa. E ere anei tera ta te hoê taata oaoa e pahono?
2. UA HERE MAU IESU I TO ˈNA METUA.
“Te here nei au i te Metua.”—Ioane 14:31, Te Faufaa Api.
E taairaa piri roa to Iesu e to to ˈna Metua i te raˈi. Ua here mau oia i te Atua a faaite atu ai o vai o ˈNa, to ˈna iˈoa, huru maitatai e ta ˈna mau opuaraa. Ma to ˈna haerea, ta ˈna mau parau e ohipa, ua haapapu Iesu e ua tia to ˈna huru i to Iehova. A taio ai i to Iesu aamu, i roto i te tahi auraa, te ite ra ïa tatou i te huru mau o to ˈna Metua. I to Philipa aniraa ia Iesu: “E faaite mai ia matou i te Metua,” pahono aˈera Iesu: “O tei hiˈo mai ia ˈu ra, ua hiˈo ïa i te Metua.”—Ioane 14:8, 9.
No to Iesu here mau i to ˈna Metua i auraro ai oia ia ˈna e tae atu i te pohe. (Philipi 2:7, 8; Ioane 1, 5:3) Maoti taua here rahi ra i te Atua i faufaa roa ˈi to Iesu oraraa a oaoa ˈtu ai.
3. UA HERE MAU IESU I TE TAATA.
“Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira.”—Ioane 15:13.
Mea peapea mau to tatou oraraa. Te faataa ra te Bibilia: “No te taata hoê ra [o Adamu] i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa. “ (Roma 5:12) Aita e ravea ta tatou no te ape i te faahopearaa o te hara, te pohe.—Roma 6:23.
Auaa, ma te here ua horoa mai Iehova i te tahi ravea. Ua vaiiho oia i ta ˈna Tamaiti tia roa o Iesu ia mauiui e ia pohe ei hoo no te faatiamâ i te taata i te hara e te pohe. No to ˈna here i to ˈna Metua e te taata, ua farii Iesu i te horoa i to ˈna ora tia roa no tatou. (Roma 5:6-8) Na tera here i turai ia Iesu ia haapae ia ˈna iho a faufaa ˈtu ai to ˈna oraraa. *
4. TO TE METUA HERE IA ˈNA E TA ˈNA FARII MAITAI.
“Tau Tamaiti here teie, ua mauruuru roa vau ia ˈna.”—Mataio 3:17.
Tera ta Iehova i parau a bapetizohia ˈi Iesu. Ua haapapu ïa o ˈna i ta ˈna Tamaiti i to ˈna here e ta ˈna farii maitai. Ua tia ˈtura ia Iesu i te na ô: “I here mai ai tau Metua ia ˈu.” (Ioane 10:17) No reira oia i itoito roa ˈi i te faaruru i te patoiraa, te faahaparaa e te pohe. (Ioane 10:18) I te mea e te here ra to ˈna Metua ia ˈna e te fanaˈo ra oia i ta ˈna farii maitai, ua oaoa ˈtu â Iesu.
E oraraa oaoa mau to ˈna. Mea rahi atu â râ te haapii mai i to ˈna hiˈoraa no te fanaˈo i te hoê oraraa oaoa. No reira, i to muri nei tumu parau, e hiˈopoa anaˈe i ta Iesu mau aˈoraa papu i ta ˈna mau pǐpǐ.
^ O Iehova te iˈoa o te Atua i roto i te Bibilia.
^ No te ite atu â i te faufaaraa o to Iesu tusia taraehara, a hiˈo i te pene 5 o te buka Eaha ta te Bibilia e haapii mau ra? piahia e te mau Ite no Iehova.
