Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2013

 UA TAUI TE BIBILIA I TO ’U ORARAA

“Na mua ’‘e, e taata ino mau vau”

“Na mua ’‘e, e taata ino mau vau”
  • MATAHITI FANAURAA: 1960

  • FENUA: FILELANE

  • AAMU: TAATA HIMENE I TE HEAVY METAL

NA MUA ’‘E:

Mea piri to matou vahi faaearaa i te tapaeraa pahi o te oire o Turku. I reira, mea veve te rahiraa o te taata. E aito motoraa to ’u papa e mea au iho â ïa na to ’u teina e vau i te reira. I te fare haapiiraa, i pinepine na vau i te moto. Ei taurearea, ua ô vau i roto i te hoê pǔpǔ taata ohipa ino mau tei turai mai ia apiti i te mau aroraa haavî u‘ana. Ua haamata ’tura vau i te au i te upaupa parauhia heavy metal a hinaaro atu ai e riro ei taata himene rock tuiroo.

Ua hoo mai au i te tahi mau faatete e ua haamau i te hoê pǔpǔ faata‘i upaupa. Aita i maoro, riro atura vau ei taata himene o te pǔpǔ. I nia i te tahua, e taata taehae roa vau oia atoa te toea o te pǔpǔ. Ua atutu to matou parau no to matou huru e faaahuraa. Haamata ’tura matou i te hauti i mua i te nahoa taata e i te haruharu i te tahi mau pehe. O te himene hopea râ tei au-roa-hia. I 1980, ua reva ’tu matou i Marite no te faaiteite i ta matou mau himene i New York e Los Angeles. Hou a ho‘i ai i Filelane, ua farerei au i te tahi mau ona haruharu upaupa.

Noa ’tu e mea au na ’u e himene, te ere ra vau i te tahi mea. Ua inoino roa vau i te huru e peu a te mau ona haruharu pehe. Aita atoa vau i oaoa i to ’u oraraa. No to ’u ino, i riaria na vau i te haere i roto i te po auahi. Ua imi au i te tahi pahonoraa i roto i te mau buka faaroo. Noa ’tu e e ere au i te taata maitai, ua pure noa vau ia tauturu mai te Atua.

UA TAUI TE BIBILIA I TO ’U ORARAA:

I rave na vau i te ohipa i te fare rata. I te hoê mahana, ua faaroo vau e e Ite no Iehova te tahi hoa rave ohipa. Hopea ore au i te uiui ia ’na. No te tano e te ohie o ta ’na mau pahonoraa i farii ai au na ’na e faatere i ta ’u haapiiraa Bibilia. Tau hebedoma i muri a‘e, e parau faaau tei noaa mai i ta ’u pǔpǔ no te haruharu i te mau pehe e nehenehe e matara  i Marite. No ’u mea faahiahia mau, e farii iho â ïa vau!

Parau atura vau i te Ite e faatere ra i ta ’u haapiiraa e i muri a‘e noa teie haruharuraa hopea e faaohipa ’i au i te mau faaueraa Bibilia. Aita oia i parau noa ’‘e i te tahi mea, ua ani mai râ ia taio i te Mataio 6:24 o te na ô ra: “E ore te taata e tia ia faaroo i te fatu toopiti.” Taa ’tura ia ’u ta Iesu parau. Tau mahana i muri a‘e, o te taeae e faatere ra i ta ’u haapiiraa tei hitimahuta i to ’u parauraa ’tu e ua faarue au i ta ’u pǔpǔ no to ’u hinaaro e pee ia Iesu!

E au te Bibilia i te hoê hi‘o o tei faaite mai i to ’u mau paruparu. (Iakobo 1:22-25) Ua taa ’tura ia ’u e na mua ’‘e e taata ino mau vau no to ’u teoteo e nounou i te tiaraa. Ua matau atoa na vau i te parau faufau, moto, puhipuhi i te avaava e te inu hua i te ava. Ua riri au ia ’u iho a ite ai au e aita to ’u oraraa i tuea i te mau faaueraa Bibilia. Ua ite vau e e ere i te mea ohie, ua ineine râ vau i te rave i te mau tauiraa.—Ephesia 4:22-24.

“E Atua hamani maitai to tatou Metua i te ra‘i e te hinaaro ra oia e faaore i te mau pepe o te feia e tatarahapa i ta ratou hara”

I faahapahapa na vau ia ’u no to ’u oraraa na mua ’‘e, ua tauturu rahi mai râ te taeae i faatere i ta ’u haapiiraa. Ua faaite mai oia i ta te Isaia 1:18 e parau ra: “Ia uteute roa ta outou mau hara ra, e riro ïa mai te hiona.” Na teie irava e te tahi atu i haapapu mai ia ’u e e Atua hamani maitai to tatou Metua i te ra‘i e te hinaaro ra oia e faaore i te mau pepe o te feia e tatarahapa i ta ratou hara.

I to ’u iteraa e hereraa ia Iehova, ua pûpû vau i to ’u oraraa ia ’na. (Salamo 40:8) Ua bapetizohia vau i 1992 i te hoê tairururaa nunaa rau a te mau Ite no Iehova i Saint-Pétersbourg, i Rusia.

TO ’U FAUFAARAAHIA:

E rave rahi to ’u hoa maitai i rotopu i te mau Ite no Iehova. Te amui nei matou no te hauti i te upaupa au mau e no te haafaufaa i taua ô a te Atua. (Iakobo 1:17) Te hoê haamaitairaa taa ê, o to ’u ïa faaipoiporaa i ta ’u vahine here o Kristina. Te ite ra mâua i te oaoa e te fifi atoa râ. Hau atu â, te vai noa nei â to ’u mau mana‘o faahapahapa.

Ahiri aita vau i riro ei Ite no Iehova, ua pohe ê na vau. Na mua ’‘e, e hepohepo noa vau no te rahi o to ’u mau fifi e peapea. I teie nei râ, e oraraa oaoa mau to ’u.