Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2013

 E HAAFATATA ’TU I TE ATUA

“E ani, e noaa ïa ia outou”

“E ani, e noaa ïa ia outou”

Ua ani te hoê pǐpǐ ia Iesu: “E te Fatu, a haapii mai ia matou i te pure.” (Luka 11:1) Ei pahonoraa, ua faahiti oia e piti faahoho‘araa no te ite e nafea ia pure ia faaroo mai te Atua. I uiui na paha oe ‘E faaroo anei te Atua i ta ’u?’ E anaanatae iho â ïa oe i ta Iesu i parau.—A taio i te Luka 11:5-13.

Te faatia ra te faahoho‘araa matamua no te tahi taata e pure ra. (Luka 11:5-8) I roto i te aamu, e farii te hoê fatu fare i te manihini i te tuiraa po, aita râ ta ’na e maa. Te haapeapea ra iho â ïa oia. Noa ’tu te maororaa po, e haere oia i te fare o to ’na hoa e ani i te tahi faraoa. I te omuaraa, eita to ’na hoa e hinaaro e tia mai no te mea ua taoto ê na oia e to ’na utuafare. Aita râ i tuu, ua onoono atu i to ’na hoa ia horoa mai i te maa. *

Eaha ta teie faahoho‘araa a Iesu e haapii maira no nia i te pure? Mea faufaa ia onoono, ia tamau i te ani, i te imi e te patoto. (Luka 11:9, 10) Eaha hoi, eita te Atua e hinaaro e faaroo i ta tatou pure? E ere tera to Iesu mana‘o. Te faataa ra râ oia, e pahono iho â te Atua i te mau pure a te feia e tiaturi aore ra, e onoono ia ’na. E haapapuraa te reira i to tatou hinaaro mau i te mea e anihia ra e i to tatou tiaturi e e horoa mai iho â te Atua i te reira. Ia au râ i to ’na hinaaro.—Mareko 11:24; Ioane 1, 5:14.

No nia ia Iehova “tei faaroo i te pure” te piti o te faahoho‘araa. (Salamo 65:2) Te haaferuri ra Iesu: “O vai ïa metua i ǒ outou nei e hopoi atu i te ofai na te tamaiti ia ani mai i te pane ra? e ia ani mai i te i‘a, e hopoi atu anei i te ophi eiaha te i‘a, ia ’na? E ia ani mai hoi i te huero moa, e hopoi atu anei i te pata?” Mea maramarama te pahonoraa: eita iho â te metua tane e horoa i te mea ino na ta ’na tamarii. Ia au i ta Iesu faataaraa: Mai te peu e e “horoa” te metua tane tia ore “i te mea [aore ra ô] maitai” na ta ratou tamarii, “e rahi atu ïa to outou Metua i te ao ra i te horoa i te [v]arua [m]aitai,” te ô maitai roa ’‘e, na ta ’na mau tamarii i te fenua nei o te pure ra ia ’na! *Luka 11:11-13; Mataio 7:11.

E pahono iho â te Atua i te mau pure a te feia e tiaturi ra ia ’na

Eaha ïa te haapii mai no nia ia Iehova, “tei faaroo i te pure”? E au Iehova i te metua tane î i te here o te haamâha i te mau hinaaro o ta ’na tamarii. Eita iho â ïa tei haamori ia ’na e taiâ i te ani atu i ta to ratou aau e hinaaro. Ma te ite e te hinaaro ra te Atua i te mea maitai roa ’‘e no ratou, e farii noa ïa ratou i ta ’na pahonoraa noa ’tu e e ere mai ta ratou i mana‘o. *

Taioraa Bibilia

Luka 7-21

^ par. 4 Ua tano ta Iesu faahoho‘araa i te mau ta‘ere e peu o tera tau. No te mau ati Iuda, mea faufaa roa ia farii i te manihini. E euhia na te faraoa ia navai no te mahana taatoa. E peu matauhia i te ani i te tahi atu taata ua pau ana‘e te reira. Mea veve ana‘e ratou, e taoto noa te utuafare taatoa i nia i te tahua i roto i te hoê piha.

^ par. 6 I faaohipa pinepine na Iesu i te mau parau “e rahi atu ïa” no te haamahitihiti e mea maitai a‘e te Atua i te taata.

^ par. 7 No te mau haamaramaramaraa hau e nafea ia pure e ia faaroohia e te Atua, a hi‘o i te pene 17 o te buka Eaha ta te Bibilia e haapii mau ra?, piahia e te mau Ite no Iehova.