Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Me 2013

Fana‘o i te oraraa oaoa—Ua faaite mai Iesu e nafea

Fana‘o i te oraraa oaoa—Ua faaite mai Iesu e nafea

“Ia haere atoa oia na nia i te ea i haerehia e Iesu e ti’a ai.”—Ioane 1, 2:6, Te Faufaa Api.

MAI tei itehia i to na mua ’tu tumu parau, e oraraa oaoa to Iesu. Ma te pee i to ’na hi‘oraa e ta ’na mau a‘oraa e fana‘o ai tatou i taua oraraa ra.

Te faaue maira iho â Iehova ia na reira mai ta te irava i nia ’tu e faaite ra. Te haereraa na nia i te e‘a i haerehia e Iesu, o te faaauraa ïa i to tatou oraraa i nia i to ’na hi‘oraa e ta ’na mau haapiiraa. Ma te na reira e fana‘o ai tatou i ta te Atua farii maitai e te oraraa oaoa.

Ua haapii atoa Iesu i te mau faaueraa o te tauturu mai ia haere na nia i te e‘a i haerehia e ana. E rave rahi to roto i ta ’na A‘oraa tuiroo i nia i te mou‘a. E hi‘opoa ana‘e vetahi no te faaohipa i roto i to tatou oraraa.

FAAUERAA: “O tei faaroo â e ua haapao i te parau a te Atua, o ratou tei maitai.”—Luka 11:28.

FAAUERAA NO TE HOÊ ORARAA OAOA:

Ua faaite Iesu e e hinaaro mau te taata e ite o vai te Atua oia atoa i te mau pahonoraa o teie mau uiraa: No te aha tatou e parahi ai i te fenua nei? No te aha i rahi roa ’i te mauiui? Te tâu‘a mau ra anei te Atua ia tatou? E oraraa anei to muri a‘e i te pohe? Ia itehia te pahonoraa o teie mau uiraa e oaoa ’i tatou. No Iesu, tei roto ana‘e te reira i te Parau a te Atua. Ia ’na i pure i to ’na Metua, ua na ô oia: “O to parau na te parau mau.” (Ioane 17:17) E tauturu mau anei te Bibilia ia ite o vai te Atua a oaoa ’tu ai?

HI‘ORAA:

Noa ’tu e ua fatata Esa i te riro ei taata himene rock tuiroo, aita oia i oaoa noa ’‘e. Ua parau oia: “Noa ’tu e mea au na ’u e himene, te ere ra vau i te tahi mea.” I te hoê taime, a farerei ai oia i te hoê Ite no Iehova, ua na ô oia: “Hopea ore au i te uiui ia ’na. No te tano e te ohie o ta ’na mau pahonoraa i farii ai au na ’na e faatere i ta ’u haapiiraa Bibilia.” Putapû atura to Esa aau, pûpû a‘era i to ’na ora ia Iehova. Te na ô ra oia: “Na mua ’‘e, e hepohepo noa vau no te rahi o to ’u mau fifi e peapea. I teie nei râ, e oraraa oaoa mau to ’u.” *

FAAUERAA: “E ao to tei aroha ia vetahi ê.”—Mataio 5:7.

FAAUERAA NO TE HOÊ ORARAA OAOA:

E hamani maitai te taata aroha ia vetahi ê. Ua na reira Iesu i te feia e hinaaro ra i te tauturu a tamahanahana ’i oia ia ratou. (Mataio 14:14; 20:30-34) Mai te peu e e pee tatou i to ’na hi‘oraa, e oaoa ïa tatou. (Ohipa 20:35) E aroha ana‘e ïa vetahi ê ma ta tatou mau parau e haaraa. E tamahanahanahia ïa tei hinaaro i te tauturu. E maitaihia anei ia na reira?

Maria e Carlos

HI‘ORAA:

E tane ivi te papa o Maria e aita i maoro a‘enei, eita faahou ta ’na e nehenehe e hauti. Ua faaite Maria e ta ’na tane Carlos i te hamani maitai a rave mai ai ia ’na i to raua fare no te haapao i to ’na mau hinaaro atoa.  Ehia po to raua araraa e faahororaa ia ’na i te fare ma‘i no to ’na ma‘i omaha tihota. I te tahi taime, ua rohirohi roa. Mai ta Iesu râ i parau, te oaoa ra i te mea e te aupuru ra raua i to Maria papa.

FAAUERAA: “E ao to tei faatupu i te parau hau.”—Mataio 5:9.

FAAUERAA NO TE HOÊ ORARAA OAOA:

No te aha tei faatupu i te hau e oaoa ’i? No te mea e maitai te taairaa e vetahi ê. E pee ana‘e i teie a‘oraa Bibilia: “E mai te mea e te tia ra ia outou, e parahi hau noa outou i rotopu i te taata’toa.” (Roma 12:18, Te Bibilia Mo’a V.C.J.S., 1976) Te auraa ïa te melo utuafare oia atoa te taata e ere i te Ite. E oaoa mau anei ia na reira?

Nair

HI‘ORAA:

A hi‘o na i te tupuraa o te hoê vahine, o Nair te i‘oa. E rave rahi matahiti to ’na faarururaa i te mau fifi. E ere i te mea ohie no ’na ia faaea hau noa, e te mau melo iho â râ o to ’na utuafare. I te mea e ua faarue ta ’na tane ia ’na a 15 matahiti i teie nei, na ’na noa i haapao i te mau tamarii. Hoê o ta ’na tamaroa te rave ra i te raau taero. E pinepine e riri hanoa oia a parau ino atu ai ia ’na e ta ’na tamahine. No Nair, maoti te Bibilia i itoitohia ’i oia ia vai hau noa i roto i taua mau tupuraa ra. Eita oia e aimârô aore ra e tatama‘i. E tutava râ oia i te faaite i te mǎrû e te hamani maitai. (Ephesia 4:31, 32) Ua papu ia ’na e ia vai hau noa oia, e maitai mau to ’na mau taairaa e te mau melo o to ’na utuafare e vetahi ê.

TE ITE I TE TUPU A MURI A‘E

A pee ai i ta Iesu a‘oraa paari e ite ai tatou i te oaoa e te mauruuru. Mea faufaa atoa râ ia ite eaha te tupu a muri a‘e. Oia mau, mea oaoa anei ia ite e e ruauhia, e ma‘ihia e e pohe tatou? Tera hoi te tupuraa mau i roto i teie ao.

Te vai ra râ te tahi parau apî oaoa! E haamaitai rahi mai Iehova i te feia e tutava ra i te ‘haere na nia i te ea i haerehia e Iesu.’ Ua fafau te Atua e ua fatata oia i te haamau i te hoê ao apî parau-tia. I reira te taata taiva ore e ora ’i e a muri noa ’tu ma te ea tia roa ia au i ta ’Na i opua na. Te na ô ra ta ’Na Parau: “Inaha tei ǒ te taata ra te sekene o te Atua, e e parahi oia i roto ia ratou ra, e ei taata ratou no ’na, e ei pihai atoa iho te Atua ia ratou, ei Atua no ratou. E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

Te oaoa ra Maria i faahitihia ’tu na i te ite e e tupu iho â teie mau parau. E oe? E hinaaro anei oe e ite atu â no nia i “te ora mau” a faatere ai te Basileia o te Atua? (Timoteo 1, 6:19) Mai te peu e e, a ani atu i te tauturu a te mau Ite no Iehova o to oe vahi aore ra a papai i te feia i pia i teie vea. *

^ par. 18 Ua tauturuhia e rave rahi taata ia ite i ta te Bibilia e parau ra no nia e rave rau tumu parau maoti te buka Eaha ta te Bibilia e haapii mau ra? piahia e te mau Ite no Iehova.