Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA ME 2013

Ua ite anei oe?

Ua ite anei oe?

No te aha Nineve i parauhia ’i “te oire i viivii i te toto”?

Patu nana‘ohia e faaite ra i te mau faehau e haapue ra i te mau upoo o te taata i haruhia

O Nineve te oire pu o te Hau emepera o Asura. I roto i tera oire rahi, te vai ra te mau aorai e hiero nehenehe roa, aroâ aano e patu rarahi. Ua parau te peropheta Nahuma no Nineve e “oire i viivii i te toto.”—Nahuma 3:1.

Te haapapu ra iho â te mau hoho‘a i nia i te aorai o Senakeriba i tera huru taehae o to Asura. Te vai ra te tahi e faaite ra ta ratou hamani-ino-raa i tei haruhia. E hutihia te arero o tera taata, e patiahia te hoê tarau na roto i te ihu aore ra utu a huti atu ai ia ’na e te taura. Ei faaoooraa, e faaheihia te mau tia mana haruhia e te mau upoo o to ratou mau arii.

Te faaite ra te taata maimi o Archibal Henry Sayce i te mau ohipa riaria ravehia e to Asura: “E vaiiho ratou i te mau haapueraa upoo taata i te oire haruhia; e tutui-oraora-hia te mau tamaroa e tamahine aore ra e hamani-ino-hia ’tu â ratou i te tahi atu taime. E patiatiahia na te tino o te mau tane. A ora noa ’i, e hohorehia to ratou iri e e paarohia te mata a tâpûhia ’tu ai i te rima, avae, tari‘a e ihu.”

No te aha i hamanihia ’i te hoê paruru no nia iho i te mau fare ati Iuda?

Teie ta te Atua i faaue i te mau ati Iuda: “Ia patu oe i te fare apî ra, ei paruru ta oe e hamani no nia iho; o te taa mai te hoê taata i raro, o te viivii to fare ia oe i te toto.” (Deuteronomi 22:8) I te mea e e faaohipa pinepine na te mau utuafare ati Iuda i tahito ra i te niaraa o to ratou fare, mea faufaa iho â ïa te tahi paruru.

Mea parahurahu te niaraa o te rahiraa fare i Iseraela. E vahi au mau te reira no te faafaaea, tamǎrû e no te rave i te ohipa. I te tau veavea, no te taoto ïa. (Samuela 1, 9:26) I reira atoa te taata faaapu e tarai ai i te suke, vine e huero o te faahu‘ahu‘ahia i muri a‘e.—Iosua 2:6.

I faaohipa-atoa-hia na tera vahi no te haamori ia Iehova aore ra i te idolo. (Nehemia 8:16-18; Ieremia 19:13) I reira atoa to Petero pureraa i te avatea. (Ohipa 10:9-16) Ia hamanihia te tahi tamǎrû vine aore ra niau i reira, mea au mau ïa no te faafaaea.

Ia au i te papai The Land and the Book, i Iseraela ua matauhia e e e‘a “to rapae au i te fare, i roto râ i te aua” no te paiuma ’tu i nia. E nehenehe ïa te taata e faarue i tera vahi ma te ore e haere atu na roto i te fare. Tera paha te tumu i faaara ’i Iesu ia faarue oioi i te oire e roohia i te ati: “Eiaha tei nia iho i te fare e pou i raro a rave ai i te tao‘a i roto i to ’na fare.”—Mataio 24:17.