Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

Eaha ta te Bibilia e haapii mau ra?

 PENE PAE

Te hoo—Te ô rahi roa ’‘e a te Atua

Te hoo—Te ô rahi roa ’‘e a te Atua
  • Eaha te hoo?

  • Mea nafea te hoo i te horoaraahia?

  • Eaha te auraa o te reira no outou?

  • E nafea outou e nehenehe ai e faaite i to outou mauruuru no te reira?

1, 2. (a) Afea te hoê ô e riro ai ei mea faufaa roa no outou iho? (b) No te aha e tia ’i ia parau e o te hoo te ô faufaa roa ’‘e ta outou e nehenehe e fana‘o?

EAHA te ô rahi roa ’‘e ta outou i fana‘o a‘enei? Te hoê ô faufaa, e ere noa i te hoê ô moni rahi. Inaha, e ere na te moni noa e faataa i te faufaa mau o te hoê ô. Ia faaoaoa râ te reira ia outou aore ra ia haamâha i te hoê hinaaro mau i roto i to outou oraraa, e ô faufaa roa ïa no outou iho.

2 I roto i te mau ô atoa ta outou e hinaaro, te vai ra te hoê ô tei hau ê roa. E ô ïa na te Atua no te huitaata. Ua horoa mai Iehova e rave rahi mea, ta ’na râ ô rahi roa ’‘e no tatou, o te tusia taraehara ïa o ta ’na Tamaiti ra o Iesu Mesia. (A taio i te Mataio 20:28.) Mai ta tatou e ite i roto i teie pene, o te hoo te ô faufaa roa ’‘e ta outou e nehenehe e fana‘o, no te mea e hopoi mai te reira i te oaoa iti rahi e e haamâha i to outou mau hinaaro faufaa roa ’‘e. O te hoo mau â te faaiteraa rahi roa ’‘e i to Iehova here ia outou.

EAHA TE HOO?

3. Eaha te hoo, e eaha te titauhia ia ite tatou no te taa i te faufaa o teie ô?

3 No te faaohie noa, e ravea te hoo na Iehova no te  faatiamâ, aore ra faaora, i te huitaata i te hara e te pohe. (Ephesia 1:7) No te taa i te auraa o teie haapiiraa Bibilia, e mea tia ia haamana‘o tatou i te ohipa i tupu i roto i te ô i Edene. E nehenehe noa e taa ia tatou no te aha e ô faufaa ’i te hoo no tatou, mai te peu e e taa ia tatou eaha ta Adamu i ere i to ’na hararaa.

4. Eaha te auraa o te ora taata tia roa no Adamu?

4 I to ’na poieteraa ia Adamu, ua horoa Iehova i te hoê mea faufaa mau na ’na—te ora taata tia roa. A feruri na i te auraa o te reira no Adamu. Poietehia ma te hoê tino e te hoê feruriraa tia roa, eita roa ’tu oia e ma‘ihia, e ruauhia, aore ra e pohe. Ei taata tia roa, e taairaa taa ê to ’na e o Iehova. Te parau ra te Bibilia e e tamaiti o “Adamu na te Atua.” (Luka 3:38) Ua fana‘o ïa Adamu i te hoê taairaa piri e te Atua ra o Iehova, mai to te hoê tamaiti e to ’na metua î i te here. Ua paraparau Iehova e ta ’na tamaiti i te fenua, a horoa ’i oia na Adamu i te tahi mau ohipa maitatai e a faaite atu ai i ta ’na e tiai ra ia ’na.—Genese 1:28-30; 2:16, 17.

5. Eaha te auraa ia parau te Bibilia e ua hamanihia Adamu “ma to [te Atua] huru”?

5 Ua hamanihia Adamu “ma to [te Atua] huru.” (Genese 1:27) E ere te auraa e ua hoho‘a roa Adamu i te Atua. Mai ta tatou i ite i roto i te pene 1 o teie buka, e Varua itea ore o Iehova. (Ioane 4:24) Aita ïa e tino i‘o e te toto to Iehova. Te auraa e ua hamanihia Adamu ma te huru o te Atua, oia ïa ua poietehia oia ma te mau huru maitatai mai to te Atua ra, mai te aroha, te paari, te parau-tia, e te mana. E au Adamu i to ’na Metua i roto i te tahi atu tuhaa faufaa, oia hoi e tiamâraa to ’na e maiti. No reira, e ere Adamu mai te hoê matini o te tere noa ia au i te opuaraa aore ra te porotarama i faataahia no te reira. E nehenehe râ ta ’na e rave i ta ’na iho mau faaotiraa, e maiti i te maitai aore ra te ino. Ahiri oia i maiti i te faaroo i te Atua,  ua ora ïa oia e a muri noa ’tu i roto i te paradaiso fenua.

6. I to Adamu faaroo-ore-raa i te Atua, eaha ta ’na i ere, e eaha te faahopearaa i nia i to ’na huaai?

6 Te taa ra ïa ia tatou e i to Adamu faaroo-ore-raa i te Atua e faautuaraahia i te pohe, ua aufau oia i te hoê hoo iti rahi. No ta ’na hara, ua ere oia i te ora taata tia roa e te mau maitai atoa o te reira. (Genese 3:17-19) Tera râ hoi, ua ere Adamu i tera ora faufaa roa eiaha no ’na noa, no to ’na atoa râ huaai no a muri a‘e. Te na ô ra te Parau a te Atua e: “No te taata hoê ra [o Adamu] i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12) Oia mau, ua taeahia tatou paatoa e te hara a Adamu. No reira te Bibilia e parau ai e ua hoo oia ia ’na iho e i to ’na huaai i te faatîtîraa a te hara e te pohe. (Roma 7:14) Aita e tiaturiraa no Adamu aore ra no Eva no te mea ua maiti raua ma te hinaaro mau e faaroo ore i te Atua. Eaha râ no to raua huaai, mai ia tatou nei?

7, 8. Eaha na auraa rahi e piti o te hoê hoo?

7 Ua tauturu mai Iehova i te huitaata maoti te hoo. Eaha te hoê hoo? E piti auraa rahi to te reira. A tahi, o te mea ïa e aufauhia no te faatiamâ aore ra no te hoo faahou mai i te tahi mea. E nehenehe e faaauhia i te moni e aufauhia no te faatiamâ i te hoê mau auri o te tama‘i. A piti, o te mea ïa e tapo‘i, aore ra aufau, i te tahi mea. E au i te moni e aufauhia no te tapo‘i i te ino i faatupuhia e te tahi ati. Ei hi‘oraa, ia faatupu te hoê taata i te hoê ati, e titauhia ia aufau o ’na i te tahi faito moni e au maite roa, aore ra tuea roa, i te faito ino i ravehia.

8 E nafea e tia ’i ia tapo‘i i te pau iti rahi ta Adamu i tutuu mai na tatou paatoa e ia faaora ia tatou i te faatîtîraa a te hara e te pohe? E hi‘o mai tatou i te hoo ta Iehova i faanaho e te auraa o te reira no outou.

 MEA NAFEA TO IEHOVA HOROARAA I TE HOO

9. Teihea huru hoo tei titauhia?

9 I te mea e ua moe te hoê ora taata tia roa, aita e ora taata tia ore e nehenehe e hoo faahou mai i te reira. (Salamo 49:7, 8) Te mea i hinaarohia, o te hoê ïa hoo o te faito i te faufaa o te mea i moe. E tuati te reira e te mana‘o tumu o te parau-tia tia roa i roto i te Parau a te Atua, o te na ô ra e: “I te pohe roa ra, ia pohe atoa ïa.” (Deuteronomi 19:21) No reira, eaha te tapo‘i i te faufaa o te ora taata tia roa ta Adamu i ere? O te tahi atu ïa ora taata tia roa te hoo aifaito tei titauhia.—Timoteo 1, 2:6.

10. Mea nafea to Iehova horoaraa i te hoo?

10 Mea nafea to Iehova horoaraa i te hoo? Ua tono mai oia hoê o ta ’na mau tamaiti varua tia roa i te fenua nei. Aita râ Iehova i tono mai i te tahi noa varua. Ua tono mai oia i te varua ta ’na e here roa ’‘e, ta ’na Tamaiti fanau tahi. (A taio i te Ioane 1, 4:9, 10.) Ua farii teie Tamaiti i te faarue i to ’na nohoraa i te ra‘i. (Philipi 2:7) Mai ta tatou i ite i roto i te pene na mua ’tu o teie buka, ua rave Iehova i te hoê semeio i to ’na tuuraa i te ora o ta ’na Tamaiti i roto i te opu o Maria. Maoti te varua mo‘a o te Atua, ua fanauhia mai Iesu ei taata tia roa aita i raro a‘e i te utua o te hara.—Luka 1:35.

Ua horoa Iehova i ta ’na Tamaiti fanau tahi ei hoo no tatou

11. E nafea te hoê noa taata e nehenehe ai e riro ei hoo no te mau mirioni taata?

11 E nafea te hoê noa taata e nehenehe ai e riro ei hoo no te mau mirioni taata? Mea nafea to te mau mirioni taata riroraa ei feia hara i te omuaraa? A haamana‘o e no to ’na hararaa, ua ere Adamu i te hoê mea faufaa roa, oia hoi te ora taata tia roa. Aita ïa i tia ia ’na ia tutuu atu i te reira na to ’na huaai, maori râ te hara ana‘e e te pohe. E ora taata tia roa to Iesu, ta te Bibilia e parau ra “te Adamu hopea,” e aita oia i hara a‘enei. (Korinetia 1, 15:45) E  nehenehe e parau e ua mono Iesu ia Adamu no te faaora ia tatou. Na roto i te horoaraa i to ’na ora taata tia roa ei tusia e te auraro-maite-roa-raa i te Atua, ua aufau Iesu i te hoo no te hara a Adamu. Ua horoa ïa Iesu i te tiaturiraa na te huaai o Adamu.—Roma 5:19; Korinetia 1, 15:21, 22.

12. Eaha ta te mauiui o Iesu i haapapu?

12 Te faataa hu‘ahu‘a ra te Bibilia i te mauiui ta Iesu i faaruru hou to ’na poheraa. Ua faaruru oia i te huiraa ino mau, te patǐtǐraa aroha ore, e te pohe mauiui i nia i te hoê pou haamauiuiraa. (Ioane 19:1, 16-18, 30; tuhaa hau “Te tumu e ore ai te mau Kerisetiano mau e faaohipa i te satauro i roto i te haamoriraa”) No te aha e titauhia ’i ia mauiui roa Iesu mai tera? I roto i te hoê pene i muri nei o teie buka, e ite tatou e ua mârô Satani i te parau e e tapea te mau tavini taata atoa a Iehova i to ratou haapao maitai i roto i te tamataraa. Na roto i te faaoromairaa ma te haapao maitai i te mauiui rahi, ua horoa Iesu i te pahonoraa maitai roa ’‘e i te mârôraa a Satani. Ua haapapu Iesu e e nehenehe ta te hoê taata tia roa e tiamâraa to ’na e maiti, e tapea i te hapa ore tia roa i te Atua noa ’tu eaha ta te Diabolo e rave. Eaha râ paha Iehova i te oaoa roa no te haapao maitai o ta ’na Tamaiti here!—Maseli 27:11.

13. Mea nafea te hoo i te aufauraahia?

13 Mea nafea te hoo i te aufauraahia? I te 14raa o te mahana o te ava‘e ati Iuda Nisana 33, ua faatia te Atua e ia haapohehia ta ’na Tamaiti tia roa e te hara ore. Ua pûpû Iesu i to ’na ora taata tia roa i “te pûpûraa hoê.” (Hebera 10:10) I te toru o te mahana i muri a‘e i to Iesu poheraa, ua faaho‘i mai Iehova ia ’na i te ora varua. I nia i te ra‘i, ua faaite atu Iesu i te Atua i te faufaa o to ’na ora taata tia roa tei pûpû-tusia-hia ei hoo no te huaai o Adamu. (Hebera 9:24) Ua farii Iehova i te faufaa o te tusia o Iesu ei hoo e hinaarohia no te faaora i te huitaata i te faatîtîraa a te hara e te pohe.—A taio i te Roma 3:23, 24.

 TE AURAA O TE HOO NO OUTOU

14, 15. Ia “faaorehia” ta tatou mau “hara,” e mea tia ia aha tatou?

14 Noa ’tu to tatou huru tupuraa hara, e nehenehe tatou e fana‘o i te mau haamaitairaa faito ore maoti te hoo. E hi‘o mai tatou vetahi o te mau haamaitairaa i teie nei e no a muri a‘e o teie ô rahi roa ’‘e a te Atua.

15 Te faaoreraa i te mau hara. No te huru tia ore i tutuuhia mai, e aroraa mau ta tatou no te rave i te mea maitai. E hara tatou paatoa na roto i te parau aore ra te ohipa. Maoti râ te tusia taraehara o Iesu, e nehenehe ta tatou mau “hara [e] faaorehia.” (Kolosa 1:13, 14) E mea tia râ ia tatarahapa mau tatou. E mea tia atoa ia tiaoro tatou ia Iehova ma te haehaa e ia ani ia faaore mai i ta tatou mau hara maoti to tatou faaroo i te tusia taraehara o ta ’na Tamaiti.—A taio i te Ioane 1, 1:8, 9.

16. Maoti te aha e nehenehe ai tatou e haamori i te Atua ma te hoê mana‘o haava mâ, e eaha te faufaa o taua mana‘o haava ra?

16 Te hoê mana‘o haava mâ i te aro o te Atua. E nehenehe te hoê mana‘o haava hapa e ere ohie i te tiaturiraa, a mana‘o atu ai tatou e mea faufaa ore tatou. Na roto râ i te faaoreraa i te mau hara maoti te hoo, te tauturu maitai ra Iehova ia tatou ia haamori ia ’na ma te hoê mana‘o haava mâ noa ’tu to tatou huru tia ore. (Hebera 9:13, 14) E nehenehe atu ai tatou e haafatata noa ’tu ia Iehova ra. No reira, e nehenehe tatou e pure noa ’tu ia ’na. (Hebera 4:14-16) E horoa mai te atuaturaa i te hoê mana‘o haava mâ i te hau o te feruriraa, te faatura ia tatou iho, e te oaoa.

17. Eaha te mau haamaitairaa ta tatou e nehenehe e fana‘o no te mea ua pohe Iesu no tatou?

17 Te tiaturiraa e ora e a muri noa ’tu i nia i te hoê fenua paradaiso. “E utua te pohe no te hara,” ta te Roma 6:23 ïa e parau ra. Te na ô atoa ra taua noa irava ra e: “Area te ora mure ore ra, e mea horoa-noa-hia mai ïa e te Atua  i roto i to tatou ra Fatu ia Iesu Mesia.” I roto i te pene 3 o teie buka, ua faahiti tatou i te mau haamaitairaa i roto i te paradaiso fenua i mua nei. (Apokalupo 21:3, 4) E nehenehe tatou e fana‘o i te reira, oia atoa te ora mure ore ma te ea maitai roa ino, no te mea ua pohe Iesu no tatou. No te reira, e mea hinaarohia ia faaite tatou i to tatou mauruuru no te ô o te hoo.

E NAFEA OUTOU E NEHENEHE AI E FAAITE I TO OUTOU MAURUURU?

18. No te aha e mea maitai ai ia mauruuru tatou ia Iehova no te ô o te hoo?

18 No te aha e mea maitai ai ia mauruuru roa tatou ia Iehova no te hoo? E mea faufaa roa te hoê ô mai te peu e e haapaeraa tei ravehia i nia i te taime, te tutavaraa, aore ra te haamâu‘araa. E putapû to tatou aau ia ite tatou e e faaiteraa taua ô ra i te here mau o te taata horoa ia tatou. Te hoo, o te ô faufaa roa ’‘e ïa o te mau ô atoa, no te mea ua rave te Atua i te haapaeraa rahi roa ’‘e no te horoa mai i te reira. “I aroha mai te Atua i to te ao, e ua tae roa i te horoa mai i ta ’na Tamaiti fanau tahi,” ta te Ioane 3:16 ïa e parau  ra. O te hoo te haapapuraa rahi roa ’‘e i to Iehova here ia tatou. E haapapuraa atoa te reira i te here o Iesu, no te mea ua farii oia i te horoa i to ’na ora no tatou. (A taio i te Ioane 15:13.) No reira maoti te ô o te hoo, ia papu ia tatou e mea here na Iehova e ta ’na Tamaiti ia tatou, te taata nei.—Galatia 2:20.

Te tutavaraa i te ite o vai Iehova, e ravea ïa no te faaite i to outou mauruuru no ta ’na ô o te hoo

19, 20. E nafea outou e nehenehe ai e faaite i to outou mauruuru no te ô o te hoo a te Atua?

19 E nafea ïa outou e nehenehe ai e faaite i to outou mauruuru no te ô o te hoo a te Atua? Na mua roa, a tutava i te ite o vai Iehova, Tei horoa i te hoo. (Ioane 17:3) E tauturu te hoê haapiiraa Bibilia maoti teie buka ia outou. A ite ai outou o vai Iehova, e puai atoa to outou here ia ’na. E no to outou here ia ’na, e hinaaro outou e faaoaoa ia ’na.—Ioane 1, 5:3.

20 A faahotu i te faaroo i te tusia taraehara o Iesu. Te na ôhia ra no nia ia Iesu: “O tei faaroo i te Tamaiti ra e ora mure ore to ’na.” (Ioane 3:36) E nafea tatou e nehenehe ai e faahotu i te faaroo ia Iesu? E ere ïa na roto noa i te parau. “Te faaroo aore e ohipa ra, e mea pohe atoa ïa,” ta te Iakobo 2:26 ïa e parau ra. Oia, na te mau “ohipa,” oia hoi ta tatou mau ohipa, e faaite e e faaroo mau to tatou. Te hoê ravea no te faaite e e faaroo to tatou ia Iesu, o te tutava-roa-raa ïa i te pee ia ’na eiaha noa i roto i ta tatou mau parau, i roto atoa râ i ta tatou mau ohipa.—Ioane 13:15.

21, 22. (a) No te aha e mea maitai ai ia haere tatou i te oroa matahiti o te Amuraa maa a te Fatu? (b) Eaha te faataahia i roto i na pene 6 e 7?

21 A haere i te oroa matahiti o te Amuraa maa a te Fatu. I te ahiahi 14 no Nisana 33, ua faatupu Iesu i te hoê oroa taa ê ta te Bibilia e parau ra “te amuraa maa a te Fatu.” (Korinetia 1, 11:20; Mataio 26:26-28) Te parau-atoa-hia ra te Oroa haamana‘oraa i te poheraa o te Mesia.  Ua haamau Iesu i te reira no te tauturu i ta ’na mau aposetolo e te feia atoa o te riro ei Kerisetiano mau i muri a‘e ia haamana‘o e maoti to ’na poheraa ei taata tia roa, ua horoa oia i to ’na ora ei hoo. Teie ta Iesu i poroi no nia i teie oroa: “E na reira outou ei mana‘oraa ia ’u.” (Luka 22:19) E haamana‘o mai te haapaoraa i te Oroa haamana‘oraa i to Iehova e to Iesu here rahi e itehia i roto i te hoo. E nehenehe tatou e faaite i to tatou mauruuru no te hoo ma te haere i te Oroa haamana‘oraa i te poheraa o Iesu i te mau matahiti atoa. *

22 E ô faufaa mau â te hoo ta Iehova i horoa. (Korinetia 2, 9:14, 15) E nehenehe te feia pohe e fana‘o atoa i tera ô faito ore. E faataa mai na pene 6 e 7 e nafea.

^ par. 21 Ei haamaramaramaraa hau no nia i te auraa o te Amuraa maa a te Fatu, a hi‘o i te tuhaa hau “Te Amuraa maa a te Fatu—Te hoê oroa o te faahanahana i te Atua.”