1, 2. (a) Eaha te nehenehe e turai ia tatou ia ui “Ehia â maororaa?” (b) No te aha e nehenehe te mau hiˈoraa o te mau tavini taiva ore i tahito ra e faaitoito ia tatou i teie mahana?

 “MAI te aha te maoro?” Tera te uiraa ta te peropheta taiva ore ra o Isaia e Habakuka i ui. (Isa. 6:11; Hab. 1:2) A papai ai te arii Davida i te Salamo 13, ua ui oia i tera uiraa e maha taime. (Sal. 13:1, 2) A haaatihia ˈi Iesu e te taata aore e faaroo to ratou, ua ui oia: “Ehia â maororaa?” (Mat. 17:17) E nehenehe atoa tatou e ui i te hoê â uiraa i teie mahana.

² Eaha te nehenehe e turai ia tatou ia ui “Ehia â maororaa?” Peneiaˈe ua faaruru tatou i te tahi ohipa parau-tia ore. Ua maˈihia aore ra ua paari paha tatou. Te ahoaho ra paha tatou no te mea te ora ra tatou i te “tau ino mau . . . e te fifi ia faaruru.” (Tim. 2, 3:1) Peneiaˈe te faarohirohi e te faatoaruaru ra te huru tano ore o te taata ia tatou. Noa ˈtu râ eaha te tumu, mea faaitoito ia ite e  aita Iehova i faahapa i ta ˈna mau tavini taiva ore o tei ui i tera uiraa i tahito ra.

3. Eaha te nehenehe e tauturu ia tatou tei roto anaˈe tatou i te hoê tupuraa fifi?

³ Eaha te nehenehe e tauturu ia tatou tei roto anaˈe tatou i te hoê tupuraa mea fifi ia faaoromai? Ua turai te varua moˈa o te Atua i to Iesu taeae ra o Iakobo ia papai: “A faaoromai ïa, taeae ma, e tae roa i te tau o te hoˈiraa mai o te Fatu.” (Iak. 5:7) Ia faaoromai ïa tatou paatoa. Eaha râ te faaoromai, e e nafea ia faaite i teie huru maitai nehenehe mau?

4, 5. (a) Eaha te faaoromai, e e nafea tatou e faaoromai ai? (b) E nafea Iakobo e faataa ˈi i te auraa o te faaoromai? (A hiˈo i te hohoˈa matamua.)

⁴ Te parau ra te Bibilia e no ǒ mai te faaoromai i te varua moˈa o te Atua ra. Aita anaˈe ta te Atua tauturu, e nehenehe e riro ei mea fifi no te taata tia ore ia faaoromai i roto i te mau tupuraa fifi mau. E ô no ǒ mai i te Atua ra te faaoromai, e haapapu tatou i to tatou here ia Iehova e ia vetahi ê ia faaite roa ˈtu tatou i te reira. Ia ore tatou e faaite i te faaoromai, e iti mai te here i rotopu ia tatou e ia vetahi ê. (Kor. 1, 13:4; Gal. 5:22) I roto i te faaoromai, te vai atoa ra te faarururaa i te mau tupuraa fifi a tapea noa ˈi i te hoê huru feruriraa maitai. (Kol. 1:11; Iak. 1:3, 4) E tauturu atoa mai te faaoromai ia vai taiva ore ia Iehova noa ˈtu eaha te fifi ta tatou e faaruru ra. E tauturu mai te reira ia tatou ia ore e tahoo ia mauiui tatou. Te parau ra te Bibilia e mea tia ia farii tatou ma te aau tae i te titauraa ia faaoromai. E haapiiraa faufaa te reira o ta tatou e huti mai i roto i te Iakobo 5:7, 8. (A taio.)

⁵ No te aha ia hinaaro iho â tatou e tiai ia ohipa Iehova? Te faaau ra te pǐpǐ ra o Iakobo i to tatou tupuraa i to te hoê taata faaapu. Noa ˈtu e haa rahi te taata faaapu no te tanu i ta ˈna maa, eita ta ˈna e nehenehe e ohipa i nia i te anuvera e e haavitiviti i te tupuraa o te mau maa. Mea titauhia ia ˈna ia tiai i “te hotu faufaa rahi o te fenua.” Hoê â huru, e rave rahi mea ta tatou e ore e nehenehe e haa i nia iho a tiai noa ˈi ia tupu ta Iehova i fafau. (Mar. 13:32, 33; Ohi. 1:7) Mai te taata faaapu, ia tiai maite tatou.

6. Eaha ta tatou e haapii mai i te hiˈoraa o te peropheta Mika?

⁶ Ua tia ia faaruru te peropheta Mika i te tupuraa fifi, mai ia tatou atoa i teie mahana. Ua ora oia i te tau a faatere ai te arii Ahaza. E arii ino mau o Ahaza. Mea rahi ïa te ohipa ino i itehia i te fenua i ora ˈi Mika. No te rahi o te ino i parau ai te Bibilia e “ua ineine,” aore ra aravihi roa, te nunaa i te “rave uˈana i te ino.” (A taio i te Mika 7:1-3.) Ua ite Mika e eita ta ˈna e nehenehe e taui i tera tupuraa. Eaha ïa ta ˈna e rave? Te parau ra oia ia tatou: “E hiˈo . . . vau ia Iehova; e tiai au i te Atua o to ˈu nei ora: e na tau Atua e faaroo mai e e parau mai hoi ia ˈu.” (Mika 7:7) Mai ia Mika, ia “tiai” atoa tatou.

7. No te aha mea titauhia ia rave hau atu â i te tiai-noa-raa ia faatupu Iehova i ta ˈna mau parau fafau?

 ⁷ Mai te peu e faaroo to tatou mai to Mika, e hinaaro roa tatou e tiai ia Iehova. E ere to tatou tupuraa mai to te hoê mau auri o te tiai ra i te mahana e haapohehia ˈi oia. Aita ˈtu ta ˈna e ravea, maori râ te tiairaa, e aita roa ˈtu oia e tiai ru ra i tera mahana. Mea taa ê te tupuraa no tatou! Te hinaaro ra tatou e tiai ia Iehova no te mea ua ite tatou e i te taime tia, e faatupu oia i ta ˈna parau fafau e horoa mai i te ora mure ore! No reira tatou e “faaruru maite [ai] na roto i te faaoromai e te oaoa.” (Kol. 1:11, 12) A tiai noa ˈi, e vai ara tatou eiaha e mutamuta e mea taere Iehova. Ia na reira tatou, eita oia e mauruuru.—Kol. 3:12.

8. Eaha ta tatou e haapii mai i te mau tane e vahine haapao maitai o tei ora i tahito ra?

⁸ Eaha te tauturu ia tatou ia rahi atu â to tatou hinaaro e tiai? A feruri na i te mau tane e vahine haapao maitai o tei ora i tahito ra e o tei tiai maite ia faatupu Iehova i ta ˈna mau parau fafau. (Roma 15:4) A feruri ai tatou i to ratou hiˈoraa, mea maitai ia haamanaˈo  ehia maororaa ratou i te tiairaa, no te aha ratou i hinaaro ai e tiai, e mea nafea Iehova i te haamaitairaa ia ratou no to ratou faaoromai.

9, 10. Ehia maororaa ia tiai Aberahama raua Sara ia Iehova?

⁹ A feruri na i te hiˈoraa o Aberahama raua Sara. No te mea ua faaite raua i te “faaroo” e te “faaoromai,” ua fatu raua i “te mau parau fafau.” Te parau ra te Bibilia e “i muri aˈe . . . i to Aberahama faaiteraa i te faaoromai,” ua fafau Iehova i te haamaitai ia ˈna e i te faariro ia ˈna ei metua o te hoê nunaa rahi. (Heb. 6:12, 15) No te aha i titauhia ˈi ia faaite Aberahama i te faaoromai? No te mea e titauhia i te taime ia tupu tera parau fafau. I te 14 no Nisana i te matahiti 1943 hou te Mesia, ua haere Aberahama raua Sara e te taatoaraa o to raua utuafare na te anavai Eupharate e tomo atura i te Fenua tǎpǔhia. Ua tia râ ia tiai â Aberahama 25 matahiti ia fanauhia mai ta ˈna tamaiti ra o Isaaka e 60 â matahiti ia fanauhia mai ta ˈna nau mootua ra o Esau raua Iakoba.—Heb. 11:9.

¹⁰ Eaha te tuhaa o te Fenua tǎpǔhia ta Aberahama i fatu? Te parau ra te Bibilia: “Aita . . . te Atua i horoa i te hoê tuhaa o teie fenua ia fatu oia, aita hoê noa ˈˈe tuhaa iti mai te taahiraa avae te rahi. Ua fafau râ te Atua e horoa i teie fenua no ˈna e no to ˈna huaai i muri mai ia ˈna, noa ˈtu e aita â e tamarii ta Aberahama.” (Ohi. 7:5) E 430 matahiti i muri aˈe i to Aberahama haereraa na te anavai Eupharate, to ta ˈna mau huaai riroraa mai ei nunaa o te ora i tera fenua.—Exo. 12:40-42; Gal. 3:17.

11. No te aha Aberahama i hinaaro ai e tiai ia Iehova, e eaha te mau haamaitairaa ta ˈna i ite no to ˈna faaoromairaa?

¹¹ Ua hinaaro Aberahama e tiai, no te mea ua papu ia ˈna e e tapea Iehova i ta ˈna i fafau. Ua faatupu oia i te faaroo ia Iehova. (A taio i te Hebera 11:8-12.) Ua oaoa Aberahama i te tiai noa ˈtu aita oia i ite pauroa te parau fafau a te Atua i te tupuraa hou oia a pohe ai. A feruri na râ te oaoa o Aberahama ia faatia-faahou-hia mai oia i roto i te paradaiso i te fenua nei. E maere oia i te taio no nia i te aamu o to ˈna oraraa e o to ˈna utuafare i roto e rave rahi tuhaa o te Bibilia. * A feruri na i to ˈna oaoa ia ite oia e e tuhaa faufaa roa ta ˈna i amo i roto i te tupuraa o te opuaraa a Iehova no nia i te Mesia fafauhia! Eita e ore e e parau oia e ua hoona to ˈna taime i te tiairaa i tera mau haamaitairaa.

12, 13. No te aha i titauhia ia faaoromai Iosepha, e eaha te manaˈo tano ta ˈna i faatupu?

¹² Ua hinaaro atoa te hina a Aberahama ra o Iosepha e faaoromai. Ua tia hoi ia ˈna ia faaruru i te tahi mau ohipa parau-tia ore ino mau. A tahi, piri i te 17 matahiti to ˈna, a hoo ai to ˈna mau taeae ia ˈna ei tîtî. I muri iho, ua pari-haavare-hia oia i te tamataraa i te mafera i te vahine faaipoipo a to ˈna  fatu e tuuhia ˈtura oia i te fare tapearaa. (Gen. 39:11-20; Sal. 105:17, 18) E tavini taiva ore a te Atua o Iosepha, tera râ, e au ra e ua faautuahia oia, aita oia i haamaitaihia. I muri aˈe râ 13 matahiti, ua taui te mau mea atoa. Ua matara mai Iosepha mai te fare tapearaa e ua riro mai oia te piti o te faatere puai roa ˈˈe i Aiphiti.—Gen. 41:14, 37-43; Ohi. 7:9, 10.

¹³ Ua tapea anei Iosepha i te inoino i muri aˈe i teie mau ohipa parau-tia ore? Ua manaˈo anei oia e ua faarue Iehova ia ˈna? Aita. Ua faaoromai Iosepha. Eaha tei tauturu ia ˈna? O to ˈna faaroo ïa ia Iehova. Ua taa ia ˈna e tei roto i te rima o Iehova tera mau tupuraa. Te ite ra tatou i te reira na roto i ta ˈna i parau i to ˈna mau taeae: “Eiaha e mǎtaˈu; tei ia ˈu anei ta te Atua? o ta outou i opua ei ino no ˈu ra, o ta te Atua ïa i opua ei maitai; ia tupu ia ˈna ta tatou e ite nei, oia te taata atoa nei e rave rahi i te oraraa i teie nei mahana.” (Gen. 50:19, 20) Ua ite Iosepha e mea hoona ia tiai i te mau haamaitairaa no ǒ mai ia Iehova ra.

14, 15. (a) No te aha mea faahiahia te faaoromai o Davida? (b) Eaha tei tauturu ia Davida ia tiai maite?

¹⁴ Ua faaruru atoa te arii Davida e rave rahi ohipa parau-tia ore. Ua faatavai Iehova ia Davida no te riro mai ei arii i nia ia Iseraela i to ˈna apîraa. Ua titauhia râ ia tiai Davida e 15 matahiti hou oia a riro mai ai ei arii i nia i to ˈna noa iho opu. (Sam. 2, 2:3, 4) I te hoê taime, ua titauhia ia horo Davida e tapuni ia ore oia e itehia mai e te arii Saula o tei tamata i te haapohe ia ˈna. * Aita ïa Davida i nehenehe e fatu i te fare no ˈna iho. Ua titauhia hoi ia faaea oia i te hoê fenua ê aore ra i roto i te mau ana i roto i te medebara. I muri aˈe, ua haapohehia Saula i roto i te hoê aroraa. Ua titauhia râ ia tiai Davida e hitu â matahiti hou oia a nehenehe ai e riro mai ei arii i nia i te taatoaraa o te nunaa Iseraela.—Sam. 2, 5:4, 5.

¹⁵ No te aha Davida i hinaaro ai e tiai maite? Te horoa mai ra oia i te pahonoraa i roto noa â i tera salamo i reira to ˈna uiraa e maha taime: “Mai te aha ra te maoro?” Te parau ra oia: “Te tiaturi nei au i te aroha no oe ra; e oaoa tau aau i te ora na oe ra; e himene au ia Iehova, ua hamani maitai mai hoi oia ia ˈu.” (Sal. 13:5, 6) Ua ite Davida e mea here na Iehova ia ˈna e e vai taiva ore noa oia ia ˈna. Ua haamanaˈo oia i te mau taime Iehova i tauturu ai  ia ˈna na mua ˈˈe, e ua tiai ru oia i te taime Iehova e faaore ai i to ˈna mau ati. Ua ite Davida e mea maitai aˈe ia tiai i te mau haamaitairaa no ǒ mai ia Iehova ra.

16, 17. Eaha te hiˈoraa maitai roa ta Iehova e Iesu i vaiiho mai no nia i te hinaaroraa e tiai?

¹⁶ Aita Iehova i faaue mai ia rave i te tahi mea ta ˈna iho e ore e hinaaro i te rave. Ua vaiiho mai oia i te hiˈoraa maitai roa ˈˈe no nia i te hinaaroraa e tiai. (A taio i te Petero 2, 3:9.) Ei hiˈoraa, e rave rahi tausani matahiti i roto i te ô i Edene, ua pari Satani ia Iehova i te haaraa ma te parau-tia ore. Te “tiai” ra Iehova i te taime e moˈa roa ˈi to ˈna iˈoa. E mau haamaitairaa faahiahia roa te niniihia i nia i “te feia atoa i tiai maite ia ˈna.”—Isa. 30:18.

¹⁷ Ua hinaaro atoa Iesu e tiai. I nia i te fenua, ua vai taiva ore oia e tae roa ˈtu i to ˈna poheraa. I te matahiti 33, ua faaite Iesu i te faufaa o to ˈna tusia ia Iehova i te raˈi. Ua tia râ ia ˈna ia tiai e tae roa i 1914 no te haamata i te faatere ei Arii. (Ohi. 2:33-35; Heb. 10:12, 13) Tera râ, te titau-faahou-hia ra ia Iesu ia tiai i te hopea o ta ˈna Faatereraa tausani matahiti, i reira e haamouhia ˈi to ˈna mau enemi. (Kor. 1, 15:25) Mea roa tera tiairaa. Eita râ e mâuˈa te taime i te tiairaa i te mau haamaitairaa.

18, 19. Na te aha e tauturu ia tatou ia tiai maite?

¹⁸ Mea papu, te hinaaro ra Iehova ia faaoromai tatou, ia hinaaro tatou e tiai. Na te aha e tauturu ia tatou ia na reira? Mea titauhia ia pure tatou no te ani i te varua moˈa o te Atua. A haamanaˈo, no ǒ mai te faaoromai i te varua moˈa o te Atua. (Eph. 3:16; 6:18; Tes. 1, 5:17-19) A taparu ïa ia Iehova ia tauturu ia oe ia faaoromai maite.

¹⁹ A haamanaˈo atoa eaha tei tauturu ia Aberahama, Iosepha e Davida ia tiai maite i te tupuraa o ta Iehova mau parau fafau. Na to ratou faaroo e tiaturi ia Iehova i tauturu ia ratou. Aita ratou i manaˈo noa ia ratou iho e i ta ratou i hinaaro. Ia feruri tatou eaha tei tupu no ratou, e faaitoito-atoa-hia tatou ia tiai.

20. Eaha te faaotiraa maitai e rave?

²⁰ Noa ˈtu e haafifi teie mau tamataraa ia tatou, e faaoti papu tatou e “tiaturi,” aore ra faaoromai. I te tahi taime, e ui paha tatou: “Mai te aha te maoro, e Iehova?” (Isa. 6:11) Maoti râ te tauturu a te varua moˈa o te Atua, e nehenehe tatou e pee i te hiˈoraa o te peropheta Ieremia a parau atu ai: “O Iehova ta ˈu nei tufaa, . . . , no reira vau i tiaturi [aore ra tiai] atu ai ia ˈna.”—Oto 3:21, 24.