Koheleta 6:1-12
6 Te vai ra te tahi atu ati ta ˈu i ite i raro aˈe i te mahana, e e roohia pauroa te taata i te reira:
2 E horoa te Atua mau na te hoê taata i te faufaa, te taoˈa rahi e te hanahana, ia ore oia ia ere i te mea ta ˈna e hinaaro. Eita râ te Atua e vaiiho ia ˈna ia fanaˈo i te reira, na te taata ê e fanaˈo. Mea faufaa ore atoa te reira e mea aroha roa.
3 Ia riro te hoê taata ei metua tane hoê hanere taime, ia ora oia e rave rahi matahiti e ia raea ia ˈna te matahiti rahi, aita râ e fanaˈo ra i ta ˈna mau mea maitatai hou a haere ai i roto i te apoo hunaraa,* o vau teie e parau atu nei e mea au aˈe te hoê aiû tei pohe i te fanauraa, ia ˈna.+
4 Ua haere faufaa ore noa mai hoi tera aiû a reva ˈtu ai i roto i te poiri, e ua mure to ˈna iˈoa i roto i te poiri.
5 Noa ˈtu aita oia i ite aˈenei i te mahana aore ra i ite i te tahi mea, mea au aˈe oia* i te taata tei faahitihia na mua ˈtu.+
6 Eaha te faufaa ia ora e tausani matahiti e piti taime, ma te ore râ e oaoa? Eita anei te taata atoa e haere i te hoê â vahi?+
7 E rave te hoê taata i te ohipa rohirohi no te faaî i to ˈna vaha,+ eita râ to ˈna hiaai e mâha.
8 Eaha hoi te apî a te taata paari hau aˈe i ta te maamaa,+ aore ra eaha te faufaa no te veve ia ite e nafea ia ora ˈtu?*
9 Mea au aˈe ia oaoa i ta te mata e ite ra i te overe haere na muri i to ˈna mau hiaai. Mea faufaa ore atoa te reira, e aˈuaˈuraa mataˈi.
10 Te mau mea e vai nei, ua topa-ê-hia na te iˈoa, e ua itehia te huru o te taata. E eita ta ˈna e nehenehe e mârô* i te taata puai aˈe ia ˈna.
11 Rahi noa ˈtu te parau, rahi atoa te faufaa ore. E eaha te apî no te hoê taata?
12 O vai tei ite eaha te ohipa maitai roa ˈˈe no te hoê taata ia rave i te roaraa o na mahana rii o to ˈna oraraa faufaa ore, o te mairi mai te marumaru?+ O vai hoi te nehenehe e faaite i te taata eaha te tupu i raro aˈe i te mahana ua reva anaˈe oia?
Nota i raro i te api
^ Aore ra “e aita atoa oia i fatu i te apoo hunaraa.”
^ Heb: “ua faafaaea aˈe ïa oia.”
^ Heb: “e nafea ia haere i mua i te feia ora.”
^ Aore ra “e horo i te haavaraa.”
