Koheleta 3:1-22
3 E taime faataahia to te mau mea atoa,E taime to te mau ohipa atoa i raro aˈe i te raˈi:
2 E taime no te fanau e e taime no te pohe.E taime no te tanu e e taime no te iriti tumu.
3 E taime no te haapohe e e taime no te faaora.E taime no te vavahi e e taime no te patu.
4 E taime no te taˈi e e taime no te ata.E taime no te auê e e taime no te ori.*
5 E taime no te faarue i te ofai e e taime no te haaputu i te ofai.E taime no te tauahi e e taime no te ore e tauahi.
6 E taime no te imi e e taime no te faarue, mai te huru ra ua moˈe.E taime no te tapea mai e e taime no te faarue.
7 E taime no te hahae+ e e taime no te nira.E taime no te mamû+ e e taime no te paraparau.+
8 E taime no te here e e taime no te hae.+E taime no te tamaˈi e e taime no te hau.
9 Eaha te noaa mai i te rave ohipa no ta ˈna rohiraa taatoa?+
10 Ua ite au i te ohipa ta te Atua i tuu na te mau tamaiti a te taata ei ohipa na ratou.
11 Ua faanehenehe* oia i te mau mea atoa i to ratou tau mau.+ Ua tuu atoa oia i te manaˈo e ora e a muri noa ˈtu i roto i to ratou aau. Eita atoa râ te huitaata e ite mai i te ohipa ta te Atua mau i rave mai te haamataraa e tae roa i te hopea.
12 I te hopea, taa ihora ia ˈu e aita e mea maitai aˈe no ratou ia oaoa noa e ia rave i te maitai i te roaraa o to ratou oraraa,+
13 e ia tamaa atoa, ia inu e ia oaoa no ta ratou ohipa rohirohi taatoa. O te ô tera a te Atua.+
14 Ite ihora vau e vai noa te mau mea atoa ta te Atua e rave e a muri noa ˈtu. Aita e mea e puoi atu, e aita e mea e iriti mai. Mai tera to te Atua raveraa i te reira, ia mǎtaˈu te taata ia ˈna.+
15 Ua tupu aˈena te mau ohipa e tupu ra, e i vai ê na te ohipa e tupu a muri aˈe.+ E imi râ te Atua i tei tuatapapahia.*
16 Ua ite aˈena atoa vau i teie i raro aˈe i te mahana: Te vai ra te ino i te vahi parau-tia e te vai ra te ino i te vahi afaro.+
17 Na ô ihora vau i roto i to ˈu aau: “E haava te Atua i te taata parau-tia e te taata ino,+ e taime hoi to te mau ohipa atoa e to te mau raveraa atoa.”
18 Ua na ô atoa vau i roto i to ˈu aau e tamata te Atua mau i te mau tamaiti a te taata e e faaite oia ia ratou e mai te animara ra ratou,
19 e hopea hoi to te tamaiti a te taata e e hopea to te animara. E hopea to ratou pauroa.+ Te pohe nei te tahi, te pohe atoa nei te tahi atu. E hoê â aho to ratou pauroa.+ Aita ïa te taata i hau aˈe i te animara, mea faufaa ore hoi te mau mea atoa.
20 Te haere ra ratou pauroa i te hoê â vahi.+ No te repo mai ratou pauroa,+ e e hoˈi ratou pauroa i te repo.+
21 O vai mau â tei ite e e haere anei te puai ora o te taata i nia, e e haere anei te puai ora o te animara i raro i te fenua?+
22 E ite ihora vau e aita e mea maitai aˈe no te hoê taata ia oaoa oia i ta ˈna ohipa,+ tera hoi ta ˈna haamaitairaa.* O vai hoi te nehenehe e faaite ia ˈna eaha te tupu ua reva anaˈe oia?+
Nota i raro i te api
^ Heb: “ouˈa.”
^ Aore ra “faanahonaho.”
^ Huri-atoa-hia “moˈe.”
^ Aore ra “tuhaa.”
