Koheleta 5:1-20
5 A haapao maitai ia oe ia haere oe i te fare o te Atua mau.+ Mea au aˈe ia haere no te faaroo atu+ i te pûpû atu i te hoê tusia mai ta te maamaa e rave,+ aita hoi ratou i ite e mea ino ta ratou e rave ra.
2 Eiaha to oe vaha ia ru, eiaha atoa e vaiiho i to oe aau ia paraparau ma te haapaoraa ore i mua i te Atua mau,+ tei te raˈi hoi te Atua mau, tei te fenua nei râ oe. No reira ïa mea tano ia faaiti oe i ta oe mau parau.+
3 E tupu hoi te moemoeâ ia rahi roa te haapeapearaa,*+ e e tupu te aparauraa a te maamaa ia rahi roa te parau.+
4 I te mau taime atoa e euhe ai oe i te Atua, eiaha e haamaoro i te haapao i te reira,+ eita hoi oia e mauruuru i te maamaa.+ Ta oe i euhe, a haapao.+
5 Mea au aˈe no oe eiaha e euhe, i te euhe a ore atu ai e haapao.+
6 Eiaha e vaiiho i to oe vaha ia turai ia oe* ia hara,+ e eiaha e parau i mua i te hoê melahi* ua hape oe i te euheraa.+ Eaha oe e faainoino ai i te Atua mau no ta oe mau parau a turaihia ˈtu ai oia e haamou i te ohipa a to oe rima?+
7 Mai te haapeapearaa hoi e rave rahi e faatupu i te moemoeâ,+ oia atoa e faufaa ore te noaa mai i te parau e rave rahi. A mǎtaˈu râ i te Atua mau.+
8 Ia ite oe e te haavîhia ra te veve e te ofatihia ra te mea afaro e te parau-tia i to oe tuhaa fenua, eiaha e maere.+ Te hiˈopoahia ra hoi taua taata mana ra e te tahi tei hau aˈe ia ˈna, e te vai ra ˈtu â tei hau aˈe ia raua.
9 E ua vahi-atoa-hia te faufaa o te fenua i rotopu ia ratou pauroa. No roto atoa mai i te mau faaapu te maa a te arii.+
10 Eita roa te taata mea au na ˈna te ario e mauruuru i te ario, eita atoa te taata mea au na ˈna te taoˈa rahi e mauruuru i te moni ohipa.+ Mea faufaa ore atoa te reira.+
11 Ia rahi mai te mau ohipa maitatai, e rahi atoa tei rave i te reira.+ E eaha ta te fatu faufaaraa, maori râ te hiˈoraa i te reira i to ˈna mata?+
12 E taoto maitai te taata e tavini ra, mea iti anei ta ˈna maa aore ra mea rahi. No te rahi râ o ta ˈna mau taoˈa e ore ai e topa te taoto o te taata taoˈa rahi.
13 E ati rahi mau ta ˈu i ite i raro aˈe i te mahana: e taoˈa rahi tei haaputuhia e to ratou fatu no to ˈna iho ati.
14 Moˈe atura taua mau taoˈa ra no te hoê opuaraa* ino mau, e i te riroraa oia ei metua tane no te hoê tamaiti, aita faahou atura ta ˈna e taoˈa.+
15 Mai te taata i haere mai roto mai i te opu o to ˈna metua vahine, e haere tahaa ˈtu oia, mai ia ˈna i haere mai.+ E eita ta ˈna e nehenehe e hopoi ê i te tahi mea no ta ˈna ohipa rohirohi atoa.+
16 E ati rahi mau atoa teie: Mai ia ˈna iho â i haere mai, e na reira atoa oia ia haere. E eaha te faufaa no te taata e rave noa i te ohipa rohirohi no te mataˈi?+
17 Hau atu â, pauroa te mahana, e tamaa oia i roto i te poiri, ma te haapeapea, te maˈi e te riri.+
18 Teie ta ˈu i ite mea maitai e mea au: ia tamaa te taata, ia inu e ia oaoa no ta ˈna ohipa rohirohi atoa+ ta ˈna i rohi i raro aˈe i te mahana i te roaraa o na mahana rii o to ˈna oraraa ta te Atua mau i faafanaˈo ia ˈna, tera hoi ta ˈna haamaitairaa.*+
19 Oia atoa, ia horoa te Atua mau na te hoê taata i te faufaa e te taoˈa rahi+ e te neheneheraa e fanaˈo i te reira, ia rave ïa oia i ta ˈna haamaitairaa* e ia oaoa oia i ta ˈna ohipa rohirohi. Tera te ô a te Atua.+
20 Eita oia e ite* maitai i te mau mahana o to ˈna oraraa ia mairi, no te mea e faaoaoa noa te Atua mau i to ˈna aau.+
Nota i raro i te api
^ Aore ra “tapitapiraa.”
^ Heb: “i to oe tino.”
^ Aore ra “vea.”
^ Aore ra “ohipa.”
^ Aore ra “tuhaa.”
^ Aore ra “tuhaa.”
^ Aore ra “haamanaˈo.”
