Koheleta 11:1-10
11 A taue* i ta oe faraoa i nia i te pape,+ e ite faahou mai oe i te reira e rave rahi mahana i muri iho.+
2 A horoa i te tahi tuhaa o ta oe mau taoˈa na e hitu aore ra e vaˈu taata,+ aita hoi oe i ite eaha te ati e tupu i nia i te fenua.
3 Ia î te ata i te pape, e topa te ûa rahi i nia i te fenua. E ia topa te hoê tumu raau i apatoa aore ra i apatoerau, e vai noa te tumu raau i te vahi i topa ˈi oia.
4 Eita te taata o te mataitai i te mataˈi e ueue i te huero maa, e eita te taata o te hiˈo i te ata e ooti.+
5 Aita oe i ite e nafea te puai ora ia ohipa i roto i te ivi o te aiû i roto i* te vahine hapû,+ aita atoa ïa oe i ite i te ohipa a te Atua mau, o te hamani i te mau mea atoa.+
6 A ueue i ta oe huero maa i te poipoi e eiaha e vaiiho i to oe rima ia faaea e ahiahi noa ˈtu.+ Aita hoi oe i ite teihea te tupu, teie anei, tera aore ra tera e piti.
7 Mea au te maramarama, e mea maitai no te mata ia ite i te mahana.
8 Ia ora hoi te taata e rave rahi matahiti, ia oaoa ïa oia pauroa te mahana.+ Ia haamanaˈo râ oia e nehenehe e rave rahi mahana ahoaho e tae mai. Mea faufaa ore pauroa te ohipa e tupu a muri aˈe.+
9 A oaoa, oe te taata apî, a apî noa ˈi oe, e ia oaoa to oe aau i te mau mahana o to oe apîraa. A pee i te mau eˈa o to oe aau e a haere i te vahi e aratai ai to oe mata ia oe. Ia ite râ oe e haava te Atua mau ia oe no teie mau mea atoa.+
10 No reira, a iriti i te mau mea faatupu ahoaho mai roto mai i to oe aau, e a faaatea i te mau mea ino i to oe tino, mea faufaa ore hoi te apîraa e te puai o te apîraa.+
